កម្ពុជា-ថៃ សម្រេចលទ្ធផលការងារវាស់វែង និងបោះបង្គោលព្រំដែនលេខ ៥២-៥៩ ជាង ៧០% នៃផែនការ

(បាត់ដំបង)៖ មន្ត្រីជាន់ខ្ពស់នៃរដ្ឋលេខាធិការដ្ឋានកិច្ចការព្រំដែន នៅល្ងាចថ្ងៃទី៣ ខែធ្នូ ឆ្នាំ២០២៥ នេះ បានបង្ហាញពីវឌ្ឍនភាពគួរឱ្យកត់សម្គាល់ នៃការងារចុះវាស់វែង និងបោះបង្គោលព្រំដែនបណ្តោះអាសន្នរវាងកម្ពុជា និងថៃ នៅតំបន់កំណាត់ខ្សែព្រំដែនចន្លោះបង្គោលលេខ ៥២-៥៩។

យោងតាមរបាយការណ៍បានឱ្យដឹងថា ប្រតិបត្តិការនេះធ្វើឡើងនៅក្នុងភូមិសាស្រ្ត ស្រុកកំរៀង ខេត្តបាត់ដំបង ដែលមានព្រំប្រទល់ជាប់នឹងស្រុកពោងណាំរ៉ន ខេត្តចាន់បុរី នៃព្រះរាជាណាចក្រថៃ។ ចាប់តាំងពីថ្ងៃទី២៧ ខែវិច្ឆិកា ដល់ថ្ងៃទី០៣ ខែធ្នូ ឆ្នាំ២០២៥ ក្រុមការងារវាស់វែងចម្រុះនៃភាគីទាំងពីរ បានសហការគ្នាអនុវត្តការងារថតរូបពីលើអាកាសដោយប្រើប្រាស់បច្ចេកវិទ្យាដ្រូន ដើម្បីបង្កើតផែនទីរូបថត (Photomap)។ ជាលទ្ធផល ការងារបច្ចេកទេសនេះសម្រេចបានលើចម្ងាយប្រមាណ ៦.៤គីឡូម៉ែត្រ ដែលស្មើនឹងប្រមាណ ៧៦% នៃផែនការសរុប។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គួរបញ្ជាក់ផងដែរថា មុននឹងឈានដល់ដំណាក់កាលថតរូបពីលើអាកាសនេះ ក្រុមវាស់វែងចម្រុះនៃប្រទេសទាំងពីរ បានចុះអនុវត្តការងារវាស់វែងនៅលើដីជាក់ស្ដែងរួចរាល់ហើយ ចាប់ពីថ្ងៃទី៨ ដល់ថ្ងៃទី២៦ ខែវិច្ឆិកា ឆ្នាំ២០២៥។ នៅក្នុងដំណាក់កាលទីមួយនោះ ការងារបានគ្របដណ្តប់លើកំណាត់ខ្សែព្រំដែនប្រវែងសរុបប្រមាណ ៨.៣គីឡូម៉ែត្រ (ចន្លោះបង្គោលលេខ ៥២-៥៩) ដោយបានបញ្ចប់ការបោះបង្គោលបណ្តោះអាសន្នសរុបចំនួន ១៦៦បង្គោល ប្រកបដោយជោគជ័យ។

លទ្ធផលនេះបានឆ្លុះបញ្ចាំងពីកិច្ចសហប្រតិបត្តិការដ៏ល្អប្រសើររវាងអាជ្ញាធរព្រំដែននៃប្រទេសទាំងពីរ ក្នុងគោលដៅកំណត់ខ្សែព្រំដែនឱ្យបានច្បាស់លាស់ ដើម្បីធានានូវសន្តិភាព និងការអភិវឌ្ឍនៅតាមតំបន់ព្រំដែន៕

ប្រភព៖ ក្រសួងព័ត៌មាន