អ្នកនាំពាក្យក្រសួងការពារជាតិអះអាងថា វីរកងទ័ពកម្ពុជានៅតែឈរជើងយ៉ាងរឹងមាំក្នុងការតស៊ូប្រយុទ្ធយ៉ាងស្វិតស្វាញតតាំងជាមួយសត្រូវឈ្លានពាន

លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានអះអាងថា បើទោះបីជាយោធាថៃបានបាញ់ប្រហារយ៉ាងខ្លាំងក្លាមកលើកងទ័ពកម្ពុជាក្នុងរយៈពេលប៉ុន្មានថ្ងៃជាប់ៗគ្នានេះក្តី ក៏វីរកងទ័ពកម្ពុជានៅតែអាចឈរជើងយ៉ាងរឹងមាំ ស្វាហាប់ មោះមុត ក្នុងការតស៊ូប្រយុទ្ធយ៉ាងស្វិតស្វាញតតាំងជាមួយសត្រូវឈ្លានពាន និងមានការប្រុងប្រយ័ត្នខ្ពស់ជានិច្ចក្នុងការបំពេញតួនាទីរបស់ខ្លួន ដើម្បីការពារបូរណភាពទឹកដីរបស់កម្ពុជា។

ការអះអាងរបស់អ្នកនាំពាក្យក្រសួងការពារជាតិកម្ពុជាយ៉ាងដូច្នេះ ក្នុងឱកាសនៃការធ្វើបច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃបានបើកការវាយប្រហារមុនមកលើកងទ័ព និងជនស៊ីវិលកម្ពុជា គិតត្រឹមព្រឹកថ្ងៃសុក្រ ទី១២ ខែធ្នូ ឆ្នាំ២០២៥។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោកជំទាវ ឧត្តមសេនីយ៍ឯកបានបន្តថា កម្ពុជាសូមបញ្ជាក់ឡើងវិញនូវសិទ្ធិស្វ័យការពារចំពោះដែនអធិបតេយ្យរបស់ខ្លួនដូចដែលមានចែងក្នុងច្បាប់អន្តរជាតិ ដើម្បីការពារបូរណភាពទឹកដី និងអាយុជីវិតប្រជាជនទោះក្នុងតម្លៃណាក៏ដោយ។ កម្ពុជានឹងមិនចុះចាញ់នឹងការបង្ខិតបង្ខំ ការបំភិតបំភ័យទោះក្នុងទម្រង់ណាមួយឡើយ ហើយសូមប្រជាពលរដ្ឋទាំងអស់បន្តជឿជាក់ និងលើកទឹកចិត្តដល់វីរកងទ័ពដ៏អង់អាចរបស់យើងដែលកំពុងតស៊ូប្រយុទ្ធយ៉ាងខ្លាំងក្លានៅគ្រប់សមរភូមិទាំងអស់។

លោកជំទាវ ឧត្តមសេនីយ៍ឯក ម៉ាលី សុជាតា បានគូសបញ្ជាក់ថា រាជរដ្ឋាភិបាល កងទ័ព និងប្រជាជនកម្ពុជាបានរួបរួមគ្នាជាធ្លុងមួយក្នុងការការពារទឹកដី សេចក្តីថ្លៃថ្នូរ និងអធិបតេយ្យភាពរបស់ខ្លួនដោយអង់អាចក្លាហាន និងដោយមិនងាករេជាដាច់ខាត ទោះបីក្នុងតម្លៃណាក៏ដោយ៕ 

ប្រភព៖ ក្រសួងព័ត៌មាន