ថ្ងៃនេះគឺជាថ្ងៃទី១០ហើយ ដែលយោធាថៃ បានធ្វើការឈ្លានពានដោយមិនញញើត មកលើដែនអធិបតេយ្យរបស់កម្ពុជា

គិតត្រឹមថ្ងៃទី១៦ ខែធ្នូ ឆ្នាំ២០២៥នេះ គឺជាថ្ងៃទី១០ហើយដែលយោធាថៃបានធ្វើការឈ្លានពានដោយមិនញញើតមកលើដែនអធិបតេយ្យរបស់កម្ពុជា ដោយភាគីថៃនៅតែបន្តរំលោភបំពានលើបទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ ដែលភាគីទាំងពីរបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥កន្លងទៅ។ នេះតាមការលើកឡើងរបស់លោកជំទាវ ឧត្តម សេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិក្នុងឱកាសនៃការធ្វើ បច្ចុប្បន្នភាពស្តីពីស្ថានការណ៍ព្រំដែនកម្ពុជា-ថៃ បន្ទាប់ពីកងទ័ពថៃបានបើកការវាយប្រហារមុនមកលើកងទ័ពនិងជនស៊ីវិលកម្ពុជា នាព្រឹកថ្ងៃទី១៦ ខែធ្នូ ឆ្នាំ២០២៥នេះ។

លោកជំទាវបានបន្តថា នៅតាមតំបន់មួយចំនួនគិតត្រឹមព្រឹកថ្ងៃនេះយោធាថៃនៅតែបន្តបាញ់ផ្លោងចូល មកក្នុងដែនអធិបតេយ្យរបស់កម្ពុជា រួមមាន ខេត្តឧត្តរមានជ័យ ព្រះវិហារ បន្ទាយមានជ័យ និងខេត្តពោធិ៍សាត់ ខណៈដែលស្ថានការណ៍នៅតំបន់ផ្សេងទៀតមានសភាពស្ងប់ស្ងាត់ ដោយកងកម្លាំងរបស់យើងនៅតែបន្តតាមដានស្ថានការណ៍ដោយការយកចិត្តទុកដាក់ខ្ពស់បំផុត។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្នុងនាមក្រសួងការពារជាតិ លោកជំទាវ ឧត្តមសេនីយ៍ឯក ម៉ាលី សុជាតា បានច្រានចោលទាំងស្រុងចំពោះការផ្សព្វផ្សាយព័ត៌មាន ក្លែងក្លាយ បំភ្លៃខុសពីការពិតរបស់ភាគីថៃ ដែលបានចោទប្រកាន់លាបពណ៌ផ្ទុយស្រឡះខុសពីការពិត ដោយក្រសួងការពារជាតិកម្ពុជាសូមធ្វើការបញ្ជាក់ជូនថា គោលដៅនៃការវាយប្រហាររបស់កម្ពុជាគឺជាការការពារខ្លួន ដោយផ្តោតែលើគោលដៅរបស់យោធាថៃតែប៉ុណ្ណោះ ពុំបានសំដៅលើជនស៊ីវិលឡើយ គឺផ្ទុយពីយោធាថៃ ដែលបានបើកការវាយប្រហារមកលើជនស៊ីវិលកម្ពុជាយ៉ាងអនុស្សធម៌បណ្តាលឱ្យមានអ្នក ស្លាប់ និងរបួសជាបន្តបន្ទាប់ និងមានការកើនឡើងជាលំដាប់រហូតមកទល់ពេលនេះ។

លោកជំទាវ ឧត្តមសេនីយ៍ឯក ម៉ាលី សុជាតា បានគូសបញ្ជាក់ថា អ្វីដែលគួរឱ្យកត់សម្គាល់គឺថារហូតមកដល់ពេលនេះយោធាថៃបានបង្កើនការប្រើប្រាស់យន្ត F16 ក្នុងការវាយប្រហារពីលើអាកាសមកលើកម្ពុជា ហើយចូលមកកាន់តែជ្រៅក្នុងទឹកដីកម្ពុជា តួយ៉ាងដូចជាកាលពីថ្ងៃទី១៥ ខែធ្នូ ឆ្នាំ២០២៥ម្សិល មិញយន្តហោះ F16 របស់ថៃបានហោះចូលមកទម្លាក់គ្រាប់បែកនៅជិតជំរុំជនភៀសខ្លួនកម្ពុជាក្នុងភូមិសាស្ត្រស្រុកស្រីស្នំ ខេត្តសៀមរាប ហើយចំពោះការប្រើប្រាស់គ្រាប់បែកចង្កោមក៏មានការកើនឡើង។ ក្រសួងការពារជាតិកម្ពុជាបានទាមទារឱ្យភាគីថៃបញ្ឈប់នូវការវាយប្រហារដោយមិនរើសអើង និងបញ្ឈប់ការផ្សព្វផ្សាយខុសពីការពិតពីភាគីថៃជាបន្ទាន់៕

ប្រភព៖ ក្រសួងព័ត៌មាន