SDF សហការជាមួយវិស័យឯកជន គាំទ្រការបណ្ដុះបណ្ដាលជំនាញក្នុងវិស័យទេសចរណ៍ ដល់សិក្ខាកាមជាង ៦ពាន់នាក់

ស្របតាមយុទ្ធសាស្ត្រទេសចរណ៍ជាតិ ឆ្នាំ២០២៣-២០២៨ មូលនិធិអភិវឌ្ឍន៍ជំនាញ (SDF) បានបន្តពង្រឹងកិច្ចសហការជាមួយវិស័យឯកជន ដោយផ្តល់ការគាំទ្រផ្នែកហិរញ្ញវត្ថុ (ថវិកាបដិភាគ) សម្រាប់ការបណ្ដុះបណ្ដាល និងអភិវឌ្ឍជំនាញក្នុងវិស័យទេសចរណ៍។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

គិតចាប់តាំងពីឆ្នាំ២០១៨ រហូតមកដល់បច្ចុប្បន្ន SDF បានគាំទ្រការបណ្ដុះបណ្ដាលជំនាញដល់សិក្ខាកាមសរុបចំនួន ៦,៣១៩ នាក់ ក្នុងគោលបំណងពង្រឹងគុណភាពសេវាកម្មទេសចរណ៍ និងលើកកម្ពស់សមត្ថភាពប្រកួតប្រជែងនៅក្នុងវិស័យនេះ។

ការវិនិយោគលើការអភិវឌ្ឍធនធានមនុស្សតាមរយៈកម្មវិធីបណ្តុះបណ្តាលជំនាញ ត្រូវបានចាត់ទុកជាអតិភាពដ៏សំខាន់ ក្នុងការចូលរួមពង្រឹងគុណភាពសេវាកម្មទេសចរណ៍ រួមចំណែកបង្កើនប្រាក់ចំណូល និងគាំទ្រការអភិវឌ្ឍសេដ្ឋកិច្ចជាតិប្រកបដោយចីរភាព។

ជាមួយគ្នានេះ SDF ក៏បន្តជំរុញឱ្យយុវជនកម្ពុជាបន្តអភិវឌ្ឍសមត្ថភាពវិជ្ជាជីវៈ និងលើកទឹកចិត្តឱ្យវិស័យឯកជនបង្កើនការវិនិយោគលើការបណ្ដុះបណ្ដាលជំនាញ ដើម្បីកសាងកម្លាំងពលកម្មមានសមត្ថភាពខ្ពស់ និងរួមចំណែកសម្រេចគោលដៅប្រែក្លាយកម្ពុជាទៅជាប្រទេសចំណូលខ្ពស់ត្រឹមឆ្នាំ២០៥០៕