អ្នកនាំពាក្យរាជរដ្ឋាភិបាល៖ ការលំបាករបស់យើងនៅពេលនេះ មិនអាចវាយបំបាក់ទឹកចិត្តស្នេហាជាតិដ៏ជ្រាលជ្រៅរបស់យើងបានឡើយ

អ្នកនាំពាក្យរាជរដ្ឋាភិបាលបានរម្លឹកជូនរួមជាតិកម្ពុជាថា ប្រទេសជាតិ និងប្រជាជនកម្ពុជាបានហែលឆ្លងកាត់ដំណាក់កាលដ៏លំបាកលំបិនបំផុត ឈឺចាប់ខ្លោចផ្សាបំផុត និងខ្ទេចខ្ទាំបំផុតរួចហើយកាលពីក្នុងអំឡុងសម័យសង្គ្រាមស៊ីវិល សម័យកាលនៃការបែកបាក់ជាតិ និងជាពិសេសក្នុងសម័យកាលនៃរបបប្រល័យពូជសាសន៍ ប៉ុល ពត។ ថ្នាក់ដឹកនាំរៀមច្បងរបស់យើងបានបិទទំព័រប្រវត្តិសាស្ត្រដ៏ខ្មៅងងឹតនេះចោល និងបានបើកទំព័រប្រវត្តិសាស្ត្រថ្មីដែលប្រកបដោយក្តីសង្ឃឹមសម្រាប់យើងទាំងអស់គ្នារួចចរាល់ហើយដែរ។ ដូច្នេះការលំបាករបស់យើងនៅពេលនេះមិនអាចវាយបំបាក់ទឹកចិត្តស្នេហាជាតិដ៏ជ្រាលជ្រៅរបស់យើងបានឡើយ ផ្ទុយទៅវិញវាបានក្លាយជាកម្លាំងចលករដ៏ខ្លាំងក្លាដើម្បីការពារអធិបតេយ្យភាពជាតិ បូរណភាពទឹកដីរបស់យើងឱ្យខាងតែបានតាមមធ្យោបាយសន្តិវិធី ដោយមានច្បាប់អន្តរជាតិ ជាទីពឹង។

ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលបាន ក្នុងឱកាសនៃការធ្វើបច្ចុប្បន្នភាពស្ដីពីការវិវត្តន៍ស្ថានការណ៍ព្រំដែនកម្ពុជា-ថៃ នាព្រឹកថ្ងៃទី៩ ខែមករា ឆ្នាំ២០២៦ បានថ្លែងថា កម្ពុជានៅតែប្រកាន់ជំហរ យ៉ាងម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបានបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែបន្ទាត់ព្រំដែនមិនកែប្រែ គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានា ដែលភាគីទាំងពីរបានឯកភាពគ្នានាពេលកន្លងមក។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ឯកឧត្តម ប៉ែន បូណា បានគូសបញ្ជាក់ថា កម្ពុជាមិនទទួលស្គាល់នូវការកែប្រែខ្សែព្រំដែនណាមួយដែលកើតចេញពីប្រើកម្លាំងនោះឡើយ។ សរុបមកវិញជំហរច្បាស់លាស់ និងម៉ឺងម៉ាត់បំផុតរបស់រាជរដ្ឋាភិបាលកម្ពុជា គឺស្របជាមួយនឹងជំហររបស់សហគមន៍អន្តរជាតិទាំងស្រុង ខណៈដែលភាគីថៃក៏បានឯកភាពដោះស្រាយបញ្ហាព្រំដែនដោយប្រើប្រាស់យន្តការដែលមានស្រាប់ និងអនុលោមតាមច្បាប់អន្តរជាតិដូចមានចែងនៅត្រង់ចំណុចទី៣នៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ដែលនេះគឺជាក្តីសង្ឃឹមក្នុងការដោះស្រាយបញ្ហាព្រំដែនប្រកបដោយភាពត្រឹមត្រូវ យុត្តិធម៌ជាមួយប្រទេសថៃ ដោយរក្សាបានទាំងស្រុងនូវដែនអធិបតេយ្យភាពស្របច្បាប់របស់កម្ពុជា។ ដូច្នេះនេះគឺជាកាលៈទេសៈដ៏សំខាន់មួយ ដែលខ្មែរត្រូវប្រើកម្លាំងមហាសាមគ្គីជាតិដ៏ខ្លាំងក្លារបស់ខ្លួនដោយផ្តល់នូវទំនុកចិត្ត និងការគាំទ្រយ៉ាងមោះមុតដល់រាជរដ្ឋាភិបាលក្នុងការការពារអធិបតេយ្យភាពជាតិ បូរណភាពទឹកដី ដែលត្រូវបានការពារយ៉ាងរឹងមាំដោយច្បាប់អន្តរជាតិ៕