ឯកឧត្តម ប៉ែន បូណា៖ កម្ពុជាគោរពយ៉ាងខ្ជាប់ខ្ជួននូវបទឈប់បាញ់ និងគ្រប់ចំណុចទាំងអស់នៃសេចក្តីប្រកាសរួមក៏ដូចជាកិច្ចព្រមព្រៀងពាក់ព័ន្ធផ្សេងទៀត រួមទាំងសេចក្តីថ្លែងការណ៍រួមទីក្រុងគូឡាឡាំពួ

ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលបានថ្លែងថា រហូតមកទល់ថ្ងៃនេះសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅដែលបានផ្តល់កំណើតដល់បទឈប់បាញ់កាលពីវេលាម៉ោង១២ថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥ មានអាយុ២០ថ្ងៃហើយ។

ក្នុងអំឡុងពេលនេះកម្ពុជាគោរពយ៉ាងខ្ជាប់ខ្ជួននូវបទឈប់បាញ់ និងគ្រប់ចំណុចទាំងអស់នៃសេចក្តីប្រកាសរួមនេះក៏ដូចជាកិច្ចព្រមព្រៀងពាក់ព័ន្ធផ្សេងទៀត រួមទាំងសេចក្តីថ្លែងការណ៍រួមទីក្រុងគូឡាឡាំពួស្តីពីកិច្ចព្រមព្រៀងសន្តិភាពរវាងកម្ពុជា និងថៃ កាលពីថ្ងៃទី២៦ ខែតុលា ឆ្នាំ២០២៥ ផងដែរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ឯកឧត្តម ប៉ែន បូណា បានគូសបញ្ជាក់ថា ក្រៅពីបទឈប់បាញ់ដែលជាលទ្ធផលបដំបូង និងធំជាងគេ និងឆ្លុះបញ្ចាំងពីបំណងដ៏ពិសិដ្ឋរបស់រាជរដ្ឋាភិបាលកម្ពុជា សេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ក៏បានផ្តល់សេរីភាពដល់យោធិនកម្ពុជាចំនួន១៨នាក់ ដែលបានវិលត្រឡប់មកជួបជុំគ្រួសារវិញកាលពីថ្ងៃទី៣១ ខែធ្នូ ឆ្នាំ២០២៥ ខណៈដែលជនភៀសសឹកភាគច្រើនបានវិលត្រឡប់ទៅកាន់ផ្ទះសំបែងវិញ ជាក់ស្តែងរហូតមកទល់ពេលនេះមានជនភៀសសឹកសរុបជាង៥០ម៉ឺននាក់ហើយ ក្នុងចំណោមជាង៦៤ ម៉ឺននាក់ដែលបានវិលត្រឡប់ទៅកាន់ផ្ទះសំបែងវិញក្រោមការជួយជ្រោមជ្រែងពេញទំហឹងពីរាជរដ្ឋាភិបាល អាជ្ញាធរដែនដី ក្រសួង ស្ថាប័នពាក់ព័ន្ធនានាជាសេនាធិការ ហើយនៅសល់ជនភៀសសឹកប្រមាណ ១៤ម៉ឺននាក់ផ្សេងទៀតកំពុងបន្តស្នាក់នៅក្នុងមណ្ឌលសុវត្ថិភាពនៅឡើយ។

ឯកឧត្តម ប៉ែន បូណា បានបន្ថែមថា ក្នុងអំឡុងពេលនេះដែរក្រុមការងារចំពោះកិច្ចដែលបង្កើតឡើងដោយរាជរដ្ឋាភិបាល បាន និងកំពុងចុះបំពេញការងារយ៉ាងសកម្មដើម្បីវាយតម្លៃពីផលប៉ះពាល់លើជន ស៊ីវិលក៏ដូចជាហេដ្ឋារចនាសម្ព័ន្ធស៊ីវិល ដែលរងការបំផ្លិចបំផ្លាញដោយការវាយប្រហាររបស់ទាហានថៃដែលបំពានមកលើដែនអធិបតេយ្យភាពរបស់កម្ពុជា៕ 

ប្រភព៖ ក្រសួងព័ត៌មាន