រោងភាពយន្ត លេជេន សហការជាមួយអ៊ែរអេស៊ា ខេមបូឌា ដើម្បីពង្រីកវិសាលភាពទីផ្សារក្នុងស្រុក

រាជធានីភ្នំពេញ – ក្រុមហ៊ុនអាកាសចរណ៍ អ៊ែរអេស៊ា ខេមបូឌា បានចុះហត្ថលេខាលើអនុស្សរណៈនៃការយោគយល់ ជាផ្លូវការជាមួយ រោងភាពយន្ត លេជេន ដែលជាខ្សែសង្វាក់រោងភាពយន្តឈានមុខរបស់កម្ពុជា។ នេះគឺជា កិច្ចសហការយុទ្ធសាស្ត្ររវាងម៉ាកយីហោល្បីៗចំនួនពីរក្នុងវិស័យអាកាសចរណ៍ និងការកម្សាន្ត។  

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ភាពជាដៃគូរនេះ ផ្តោតសំខាន់លើការបន្តពង្រឹងសម្ព័ន្ធភាពពាណិជ្ជកម្មក្នុងស្រុក និងការរួបរួមរវាងក្រុមហ៊ុនទាំងពីរ តាមរយៈ គំនិតផ្តួចផ្តើមទីផ្សាររួមគ្នា និងការផ្សព្វផ្សាយពាណិជ្ជកម្ម ។ ដោយផ្អែកលើវិសាលភាពនៃក្រុមហ៊ុនទាំងពីរ ក្នុងគោលបំណងបង្កើតឱ្យមានការចូលរួមយ៉ាងស្អិតរមួត ជាមួយអតិថិជន និងភ្ញៀវជាតិ-អន្តរជាតិ នៅទូទាំងប្រទេសកម្ពុជា។

រយៈពេលមួយឆ្នាំនៃភាពជាដៃគូ ក្រុមហ៊ុនទាំងពីរនឹងសហការគ្នាយ៉ាងយកចិត្តទុកដាក់ ដើម្បីបង្កើនយុទ្ធនាការកម្សាន្ត បែបចម្រុះ និងការធ្វើដំណើរដ៏សម្បូរបែប ដែលឆ្លើយតបទៅនឹងតម្រូវការរបស់អ្នកទស្សនានិងអ្នកធ្វើដំណើរ  ព្រមទាំងរួម ចំណែកគាំទ្រដល់វិស័យពាណិជ្ជកម្មនៃប្រទេសកម្ពុជាផងដែរ។

លោក ណម វិស្សុត ប្រធាននាយកប្រតិបត្តិនៃក្រុមហ៊ុន អ៊ែរអេស៊ា ខេមបូឌា បានមានប្រសាសន៍ថា៖ “អ៊ែរអេស៊ា ខេមបូឌា បានផ្សារភ្ជាប់ទំនាក់ទំនងប្រជាជាតិទៅកាន់ពិភពលោក រីឯរោងភាពយន្ត លេជេន បានតភ្ជាប់ទំនាក់ទំនងសាធារណជនទៅកាន់ការកម្សាន្តដែលមានគុណភាព។ ភាពជាដៃគូនេះ គឺជាការប្តេជ្ញាចិត្តរបស់យើងក្នុងការធ្វើឱ្យ អ៊ែរអេស៊ា កាន់តែមានភាពលេចធ្លោនៅក្នុងប្រព័ន្ធផ្សព្វផ្សាយ និងការពង្រីកវិសាលភាពទីផ្សារឱ្យកាន់តែទូលំទូលាយ” ។

លោក Tan Twu Yang  អគ្គនាយកផ្នែកទំនាក់ទំនងទីផ្សារ​  និងផ្នែកលក់ តំណាងរោងភាពយន្ត លេជេន បានបង្ហាញពីទស្សនៈ​សំខាន់ថា៖ “នេះគឺជាកិត្តិយសដ៏ធំធេងសម្រាប់រោងភាពយន្តលេជេន ក្នុងការសហការ ជាមួយក្រុមហ៊ុនដែលមានសេវាកម្មល្អ និងការទុកចិត្តពីអន្តរជាតិ។ កិច្ចសហការនេះ នឹងផ្តល់ជូននូវបទពិសោធន៍ដ៏វិសេស វិសាលជូនដល់អតិថិជនរាប់លាននាក់ ទាំងការកម្សាន្តក្នុងរោងភាពយន្ត និងការធ្វើដំណើរតាមផ្លូវអាកាស។ យើងជឿជាក់ យ៉ាងមុតមាំលើការរីកចម្រើនដ៏លេចធ្លោរវាងក្រុមហ៊ុនទាំងពីរ”។

តាមរយៈការរួមបញ្ចូលការធ្វើដំណើរដែលមានតម្លៃសមរម្យ ជាមួយនឹងការ​កម្សាន្តដែលមានគុណភាព ក្រុមហ៊ុនទាំងពីរ ត្រៀមខ្លួនរួចជាស្រេចដើម្បីចូលរួមចំណែកគាំទ្រដល់វិស័យទេសចរណ៍ និងការកម្សាន្តក្នុងស្រុក តាមរយៈគំនិតផ្តួចផ្តើមប្រកបដោយភាពច្នៃប្រឌិត ។

រោងភាពយន្ត លេជេន គឺជារោងភាពយន្តឈានមុខនៅក្នុងប្រទេសកម្ពុជា ដែលដំណើរការតាមស្តង់ដារអន្តរជាតិ បង្កើតឡើង និងគ្រប់គ្រងដោយជនជាតិខ្មែរចាប់តាំងពីឆ្នាំ២០១១ ដោយបច្ចុប្បន្ន រោងភាពយន្តនេះមាន សរុបចំនួន ១២ សាខានៅទូទាំងប្រទេស។ រោងភាពយន្ត លេជេន តែងតែផ្តល់ជូនបទពិសោធន៍ការទស្សនាភាពយន្តកម្រិតខ្ពស់ និងសេវាកម្មល្អ ប្រកបដោយភាពរាក់ទាក់ និងអត្តសញ្ញាណបែបខ្មែរ។

អ៊ែរអេស៊ា ខេមបូឌា គឺជាផ្នែកមួយនៃក្រុមហ៊ុនសម្ព័ន្ធ AirAsia Group ដែលជាបណ្តាញក្រុមហ៊ុនអាកាសចរណ៍ តម្លៃសមរម្យបំផុតលើពិភពលោក ​នឹងប្តេជ្ញាធ្វើឱ្យអ្នកគ្រប់គ្នាអាចធ្វើដំណើរតាមផ្លូវអាកាសបាន។ ជាមួយនឹងការពង្រីកជើងហោះហើរជាអន្តរជាតិដែលកំពុងកើនឡើង ជាមួយសេវាកម្មដ៏ល្អឥតខ្ចោះក្នុងការធ្វើដំណើរប្រកបដោយសុវត្ថិភាពនិងទំនុកចិត្តខ្ពស់។