មកមើលផ្ទះ Ronaldo ស្អាតប្រណីត ខណៈ ទើបនឹងរៀបចំរួច

កម្សាន្ត៖ កីឡាករបាល់ទាត់ លោក Cristiano Ronaldo និង គូដណ្តឹងរបស់ខ្លួន ទើបតែបានបញ្ចប់ការសាងសង់ផ្ទះវីឡាប្រណីតតម្លៃ ២៥ លានអឺរ៉ូ របស់ពួកគេ នៅក្នុងប្រទេសព័រទុយហ្គាល់ ដែលត្រូវបានចាត់ទុកថា ជាវីឡាធំជាងគេនៅក្នុងប្រទេស។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យោងតាមទស្សនាវដ្តី Semana បានឲ្យដឹងថា វីឡានេះ មានទីតាំងស្ថិតនៅក្នុងតំបន់ Quinta de Marinha ដ៏ប្រណីតនៃទីក្រុងឆ្នេរសមុទ្រ Cascais ចម្ងាយប្រហែល ២៥ គីឡូម៉ែត្រពីទីក្រុង Lisbon។ អចលនទ្រព្យនេះ មានទីតាំងស្ថិតនៅចម្ងាយប្រហែល ២០០ ម៉ែត្រ ពីមហាសមុទ្រអាត្លង់ទិក ដែលត្រូវបានសាងសង់លើដីទំហំ ១២០០០ ម៉ែត្រការ៉េ ជាមួយនឹងទំហំប្រើប្រាស់ ៥០០០ ម៉ែត្រការ៉េ។ 

ផ្ទះវីឡានេះ ត្រូវបានរៀបចំ បំពាក់ដោយគ្រឿងបរិក្ខារទំនើបៗដូចជា អាងហែលទឹកក្នុងផ្ទះ និងក្រៅផ្ទះ រោងកុនឯកជន កន្លែងហាត់ប្រាណ និងស្ប៉ា និងសួនច្បារធំទូលាយ។ យានដ្ឋានអាចផ្ទុករថយន្តបានរហូតដល់ទៅ ២០ គ្រឿង ដែលស័ក្តិសមនឹងការប្រមូលផ្តុំរថយន្តទំនើបៗដ៏ល្បីល្បាញ របស់ Cristiano Ronaldo ផងដែរ។

គួររំឭកផងដែរថា ការសាងសង់ផ្ទះមួយនេះ បានចាប់ផ្តើមនៅឆ្នាំ ២០២០ ហើយចំណាយពេល ប្រាំឆ្នាំដើម្បីបញ្ចប់ផ្ទះប្រណិតមួយនេះ។ វិមាននេះត្រូវបានចាត់ទុកថា ជាលំនៅដ្ឋានអចិន្ត្រៃយ៍របស់ Ronaldo និងក្រុមគ្រួសាររបស់លោក នៅស្រុកកំណើត បន្ទាប់ពីចូលនិវត្តន៍។ យោងតាមប្រភពព័ត៌មាន តារាបាល់ទាត់ព័រទុយហ្គាល់រូបនេះ និងគូដណ្ដឹង Georgina ព្រមទាំងកូនៗរបស់ពួកគេ នឹងផ្លាស់ទៅទីនោះ នៅចុងឆ្នាំ ២០២៦ បន្ទាប់ពី ពួកគេរៀបការ៕

ប្រភព៖ Ngoisao.net

សូមទស្សនារូបភាពខាងក្រោម៖ 

• រូបភាព
• តារាអន្តរជាតិ