បទយកការណ៍៖ ព្រឹត្តិការណ៍បុណ្យបង្ហើរខ្លែងឯកខ្មែរ រួមចំណែកអភិរក្ស និងអភិវឌ្ឍន៍ខ្លែងខ្មែរ

ដោយសារតែវាជាវប្បធម៌ ទំនៀមទម្លាប់របស់ប្រជាជនខ្មែរ តាំងតែបុរាណកាលមកឱ្យតែដល់ដូវរំហើយមានខ្យល់ធ្លាក់មករំភើយៗនារដូវប្រមូលផលដំណាំស្រូវ ប្រជាពលរដ្ឋកម្ពុជាតែង តែបាននាំគ្នាធ្វើខ្លែងបង្ហើរ តាមសហគមន៍ ស្រែចម្ការក្នុងតំបន់នានា នៃប្រទេសកម្ពុជា។ ជាមួយគ្នានេះ ដើម្បីថែរក្សាការពារ តម្លៃវប្បធម៌ដ៏ល្អមួយនេះ រដ្ឋបាលខេត្តសៀមរាប បាន រៀបចំព្រឹត្តិការណ៍បុណ្យបង្ហើរខ្លែងឯកខ្មែរ និងខ្លែងសេរី នៅព្រលានយន្តហោះអន្តរជាតិសៀមរាបចាស់ រយៈពេល៣ ថ្ងៃ ចាប់ពីថ្ងៃទី២០ ដល់២២ ខែកុម្ភៈ ឆ្នាំ២០២៦ ដោយមានការចូលរួមទស្សនាដោយសេរី។ហើយព្រឹត្តិការណ៍បុណ្យបង្ហើរខ្លែងឯកខ្មែរ និង ខ្លែងសេរីនេះ មានគោលបំណងធ្វើការផ្សព្វផ្សាយ លើកតម្កើន មរតកវប្បធម៌ជាតិ ដើមី្បជំរុញវិស័យទេសចរណ៍ វប្បធម៌ ក្នុងាការទាក់ទាញអ្នកទេសចរណ៍ឱ្យមកកម្សាន្តនៅក្នុងខេត្តសៀមរាបផង។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្តសៀមរាប បានលើកឡើងថា ការបង្ហើរខ្លែងខ្មែរ បានកើតមានឡើងនៅក្នុងប្រពៃណីរបស់ខ្មែរ រាប់ពាន់ឆ្នាំមកហើយ រហូតដល់មានការចានៅក្នុងសិលាចរិកនៅក្នុងសទវត្សរ៍ទី៩ យើងឃើញមានភស្តុតាងដែលខ្មែរយើងមានខ្លែង។ លោកបានបន្តថា រដូវបង្ហោះខ្លែង គឺចាប់ពីខែធ្នូរហូតដល់ខែមីនា ហើយការបង្ហោះខ្លែងនេះ គឺជាពិធីមួយដែលគេសុំកុំឱ្យមានភ្លៀង ព្រោះជារដូវច្រូតកាត់។ លោកប្រធានមន្ទីរបានថ្លែងបញ្ជាក់ថា៖ «ខ្មែរមានពិធីសុំទឹកភ្លៀងនារដូវបង្កបង្កើនផលស្រូវ និងពិធីសុំកុំឱ្យមានភ្លៀង គឺនៅរដូវប្រមូលផលស្រូវ។ ប៉ុន្តែមួយរយៈកាលកន្លងមកនេះ ខ្លែងខ្មែរ ជាពិសេសខ្លែងឯកនេះ ស្ទើរតែបាត់បង់។ ដូចនេះហើយ ទើបថ្នាក់ដឹកនាំ ស្ថាប័នជាតិបានគិតគូរ និងយកចិត្តទុកដាក់រៀបចំឱ្យមានព្រឹត្តិការណ៍នានាដែលទាក់ទងនឹងខ្លែងនេះ ដើម្បីជាការអភិរក្ស និងធ្វើឱ្យក្មេងៗជំនាន់ក្រោយបានឃើញ និងបានស្គាល់ខ្លែងឯកខ្មែរ និងធ្វើឱ្យខ្លែងខ្មែរមានភាពរស់រវើកឡើងវិញ។ក្រសួងវប្បធម៌ និងវិចិត្រសិល្បៈ ក៏មាន បំណងយកខ្លែងឯករបស់ខ្មែរនេះ ចុះក្នុងបញ្ជីសម្បត្តិបេតិកភណ្ឌពិភពលោកផងដែរ ។»

បើតាមលោក មួន សុភាព បានឱ្យដឹងបន្ថែមថា ព្រឹត្តិការណ៍បង្ហើរខ្លែងប្រចាំឆ្នាំ២០២៦នេះ បានទទួលពាក្យ បេក្ខជន បេក្ខនារីប្រកួតខ្លែងឯក ខ្លែងសេរី និង ចំនួនខ្លែងដែលត្រូវចូលរួមក្នុងព្រឹត្តិការណ៍មានសរុបចំនួន១៣៨ ក្នុងនោះ ខ្លែងឯកមានចំនួនសរុប ៩៣ ខ្លែងឯក ខ្លែងសេរីមានចំនួនសរុប ៤៥ ខ្លែង មកពីបណ្តា រាជធានី-ខេត្តមានដូចជា ខេត្តស្ទឹងត្រែង ខេត្តពោធិ៍សាត់ រាជធានីភ្នំពេញ ខេត្តកណ្ដាល ខេត្តស្វាយរៀង និងខេត្តសៀមរាបដែលជាម្ចាស់ផ្ទះ។ លោកបានអះអាងថា បើធៀបទៅនឹងកាលពីព្រឹត្តិការណ៍លើកទី១ គឺឆ្នាំនេះចំនួនខ្លែងមានការថយចុះជាងឆ្នាំមុន ដោយសារតែមានបញ្ហាជំម្លោះនៅព្រំដែនកម្ពុជា-ថៃ ធ្វើឱ្យអ្នកលេងខ្លែងមួយចំនួនមិនបានមកចូលរួម។

ជាមួយគ្នានេះដែរ លោកគ្រូ អន គុណរ័ត្ន នាយកសាលាបឋមសិក្សាវត្តបូព៌ ក្រុងសៀមរាប ខេត្តសៀមរាបបានថ្លែងថា សម្រាប់សាលាបឋមសិក្សាវត្តបូព៌នេះជាលើកទី១ហើយ ដែលបានចូលរួមបង្ហើរខ្លែងឯក ដោយសារតែចង់ឱ្យសិក្សានុសិស្សបានស្គាល់ និងរក្សាតម្លៃអ្វីដែលជាសម្បត្តិវប្បធម៌ និងជាប្រពៃណីរបស់យើង។ លោកបាននិយាយថា សម្រាប់ខ្លែងឯកដែលយកមកចូលរួមបង្ហើរនៅក្នុងព្រឹត្តិការណ៍នេះ គឺជាការបង្កើតឡើងដោយសិស្សរបស់សាលាបឋមសិក្សាវត្តបូព៌ផ្ទាល់តែម្តង ដោយពួកគាត់បានកែច្នៃ និងរចនាដោយខ្លួនឯង ដែលអាចធ្វើឱ្យខ្លែងឯកបង្ហើរបានយ៉ាងល្អ។ លោកនាយកសាលាបឋមសិក្សាវត្តបូព៌យល់ឃើញផងដែរថា៖ «ការបង្កើតព្រឹត្តិការណ៍បុណ្យបង្ហើរខ្លែងឯកខ្មែរ និងខ្លែងសេរីនេះ ពិតជាមានសារសំខាន់ ដោយទី១បានអភិរក្ស និងអភិវឌ្ឍន៍ខ្លែងខ្មែរ ហើយទី២ បានធ្វើក្មេងៗជំនាន់ក្រោយស្គាល់ខ្លែងឯកខ្មែរ និងទី៣ ទាក់ទាញភ្ញៀវទេសចរ»។

ពាក់ព័ន្ធនឹងការរៀបចំព្រឹត្តិការណ៍នេះដែរ លោក លី សារី អភិបាលរងខេត្តសៀមរាបបានលើកឡើងថា ការបង្ហើរខ្លែងខ្មែរ មិនគ្រាន់តែបង្កបរិយាកាសឱ្យប្រជាពលរដ្ឋ សាធារណជន ទស្សនាប្រកបដោយសេចក្ដីសប្បាយរីករាយប៉ុណ្ណោះទេ ប៉ុន្តែវាជាការផ្ទេរនូវចំណេះដឹងខាងទំនៀមទម្លាប់ប្រពៃណី ដល់យុវជនជំនាន់ក្រោយឱ្យបានស្គាល់ យល់ដឹង និង ចូលរួមប្រតិបត្តិ ថែរក្សាការពារ លើកស្ទួយអត្តសញ្ញាណជាតិ តម្លៃវប្បធម៌អរូបី ព្រមទាំងចូលរួមយ៉ាងសកម្មក្នុងការសិក្សាស្រាវ ជ្រាវ ចងក្រងរក្សាទុកនូវឯកសារបេតិកភណ្ឌវប្បធម៌នេះឱ្យបានស្ថិតស្ថេរគង់វង្ស ។ លោក លី សារី បានបន្តទៀតថា ព្រឹត្តិការណ៍បុណ្យបង្ហើរខ្លែងឯកខ្មែរ និងខ្លែងសេរី ប្រារព្ធធ្វើជាលើកទី២ នៅខេត្តសៀមរាប គឺជាចលករមួយចូលរួមចំណែកយ៉ាងសំខាន់ ក្នុងការទាក់ទាញកំណើនភ្ញៀវទេសចរជាតិ និងអន្តរជាតិ ឱ្យមកទស្សនាខេត្តសៀមរាបកាន់តែច្រើនឡើងផងដែរ ។

បន្ថែមពីនេះទៀត លោកអភិបាលរងខេត្ត្តបានបញ្ជាក់យ៉ាងដូច្នេះថា៖ «សម្រាប់ឆ្នាំ២០២៧ខាងមុខ ដើម្បីបន្តរក្សាកំណើន និង ទាក់ទាញភ្ញៀវទេសចរ និងថែរក្សាបាននូវប្រពៃណីទំនៀមទម្លាប់ជាតិយើង។ ក្នុងនាមអាជ្ញាធរខេត្តសៀមរាប ខ្ញុំសូមធ្វើការអំពាវនាវដល់ថ្នាក់ដឹកនាំមន្ទីរ អង្គភាព រដ្ឋបាលក្រុង ស្រុក វិស័យឯកជន បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិទាំងអស់ មេត្តាបន្តគាំទ្រ ឱ្យបានផុលផុស ដើម្បីបន្តការរៀបចំនូវកម្មវិធី និងព្រឹត្តិការណ៍នានា ក្នុងខេត្តសៀមរាបយើងនៅឆ្នាំបន្តបន្ទាប់ទៀត»៕

ប្រភព៖ ក្រសួងព័ត៌មាន