Jennifer Lopez បង្ហាញអារម្មណ៍ បែបនេះ ក្រោយ លែងលះគ្នា ជាមួយ អតីតស្វាមី

កម្សាន្ត៖ តារាចម្រៀងស្រី Jennifer Lopez បានចែករំលែកអំពីជីវិតរបស់នាង បន្ទាប់ពីលែងលះជាមួយស្វាមីទីបួនរបស់នាង គឺតារាសម្តែង Ben Affleck ក្នុងឆ្នាំ ២០២៤។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

នៅក្នុងបទសម្ភាសន៍មួយ នៅក្នុងកម្មវិធី Nightline ដែលបានចាក់ផ្សាយនៅថ្ងៃទី ១១ ខែមីនា កន្លងទៅនេះ តារាចម្រៀងស្រី Jennifer Lopez បានសារភាពថា «ខ្ញុំស្ថិតក្នុងដំណាក់កាលដ៏រីករាយមួយ។ ខ្ញុំគិតថា ជាលើកដំបូងក្នុងជីវិតរបស់ខ្ញុំ ខ្ញុំមានអារម្មណ៍ថាមានសេរីភាព។ ខ្ញុំរស់នៅដោយឯករាជ្យ។ ហើយវាពិតជាអស្ចារ្យណាស់»។

Jennifer Lopez បាននិយាយថា នាងស្ទើរតែមិនដែលជួបប្រទះអារម្មណ៍នេះ ចាប់តាំងពីនាងមានអាយុម្ភៃឆ្នាំមក។ តារាស្រីរូបនេះ ក៏បានរំលឹកថា «សូម្បីតែមុននោះក៏ដោយ។ ខ្ញុំតែងតែមានមិត្តប្រុស។ ហើយតែងតែមាននរណាម្នាក់នៅក្នុងជីវិតរបស់ខ្ញុំ ហើយមានរឿងជាច្រើនដែលមានអារម្មណ៍ថា មិនអាចគ្រប់គ្រងបាន»។

តារាចម្រៀងស្រីរូបនេះ ក៏បានប្រាប់ពិធីករ Juju Chang ថា នាងបានរៀនឈប់ដាក់សម្ពាធច្រើនពេកលើខ្លួនឯង ដោយបានលើកឡើងថា «ឥឡូវនេះ ខ្ញុំជឿជាក់ និងឱ្យតម្លៃខ្លួនឯងច្រើនជាងមុន ជំនួសឱ្យការរឹងរូសលើខ្លួនឯង ហើយតែងតែព្យាយាមបញ្ជាក់ពីខ្លួនឯង»។

នាងបាននិយាយថា នាងត្រូវតែ បញ្ឈប់អ្វីៗគ្រប់យ៉ាង ហើយឈប់សម្រាកមួយឆ្នាំ ដើម្បីងើបឡើងវិញពីការលែងលះ។ នាងបានរៀបរាប់ថា «ខ្ញុំបានលុបចោលដំណើរកម្សាន្ត ហើយសម្រេចចិត្តស្នាក់នៅផ្ទះ ប្រឈមមុខនឹងអ្វីដែលបានកើតឡើង ជំនួសឱ្យការរត់គេចពីការងារ ទំនាក់ទំនងផ្សេងទៀត ឬអ្វីផ្សេងទៀត។ គ្រាន់តែអង្គុយចុះ ហើយទទួលយកវា» ។

គួររំឭកផងដែរថា ការបែកបាក់ពី Ben Affleck គឺជាលើកទីបួនហើយដែល Jennifer Lopez បានលែងលះគ្នា​ ក្នុងរយៈពេលប្រហែល ២៧ ឆ្នាំ។ ពីមុន នាងធ្លាប់បាននិយាយថា ពិភពលោករបស់នាង បានដួលរលំទាំងស្រុង នៅពេលដែលអាពាហ៍ពិពាហ៍របស់នាង ជាមួយតារាសម្តែងរូបនេះ បានបញ្ចប់៕

ប្រភព៖ Ngoisao.net

សូមទស្សនារូបភាពខាងក្រោម៖ 

• រូបភាព
• តារាអន្តរជាតិ