Offset អតីតស្វាមី Cardi B ត្រូវបានគេបាញ់ ពេលនេះប៉ូលីសកំពុងស៉ើបអង្កេត

ហូលីវូដ រដ្ឋផ្លរីដា — តារាចម្រៀងរ៉េប Offset ត្រូវបានគេបាញ់ត្រូវរបួស កាលពីយប់ថ្ងៃចន្ទថ្មីៗកន្លងទៅ នេះបើយោងតាមអ្នកនាំពាក្យរបស់ក្រុមតារាចម្រៀងរ៉េប Migos ប៉ុន្តែស្ថានភាពពិតប្រាកដរបស់គាត់មិនទាន់ដឹងនៅឡើយទេ។

អ្នកនាំពាក្យរូបនេះបាននិយាយនៅក្នុងសេចក្តីថ្លែងការណ៍មួយថា Offset កំពុងត្រូវបានព្យាបាលនៅមន្ទីរពេទ្យ ត្រូវបានតាមដានយ៉ាងដិតដល់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

នាយកដ្ឋានប៉ូលីស Seminole បាននិយាយថា ជនរងគ្រោះ មិនមានរបួសដែលគំរាមកំហែងដល់អាយុជីវិតទេ ហើយក៏មិមទាន់អាចបង្ហាញដែរថា តើអ្នកណាជាអ្នកបាញ់នៅឡើយទេ។

ហេតុការណ៍នេះបានកើតឡើងនៅល្ងាចថ្ងៃចន្ទ នៅកន្លែងចតរថយន្តមួយនៅខាងក្រៅ Seminole Hard Rock ក្នុងទីក្រុង Hollywood រដ្ឋផ្លរីដា។ នាយកដ្ឋានប៉ូលីសមិនបានកំណត់អត្តសញ្ញាណជនរងគ្រោះពិតប្រាកដនោះ ពោលគឺមិនដឹងថា Offset ជាជនបង្កឬជាជនរងគ្រោះ។

យោងតាមសេចក្តីថ្លែងការណ៍មួយពីនាយកដ្ឋានប៉ូលីស មនុស្សពីរនាក់ត្រូវបានប៉ូលីសឃាត់ខ្លួន ហើយមន្ត្រីកំពុងស៊ើបអង្កេតហេតុការណ៍នេះ។ បើតាមនាយកដ្ឋានប៉ូលីសបាននិយាយថា "ទីតាំងនេះមានសុវត្ថិភាព ហើយមិនមានការគំរាមកំហែងដល់សាធារណជនទេ"។ "ប្រតិបត្តិការនៅតែបន្តដូចធម្មតា"៕

ប្រភព៖ AP News

• តារាអន្តរជាតិ