ក្រសួងប្រៃសណីយ៍ និងក្រសួងសាធារណការ ប្រកាសដាក់ឲ្យប្រើប្រាស់ DG SuperApp អាវុធឌីជីថលថ្មីរបស់កម្ពុជា នាំយក AI និងសេវាសាធារណៈមកដាក់ក្នុងដៃពលរដ្ឋ

(ភ្នំពេញ)៖ លាហើយភាពស្មុគស្មាញក្នុងការស្វែងរកសេវារដ្ឋតាមកម្មវិធីច្រើនដាច់ដោយឡែកពីគ្នា។ ឈានចូលមកដល់យុគសម័យថ្មី ក្រសួងប្រៃសណីយ៍និងទូរគមនាគមន៍ ត្រៀមបញ្ចេញអាវុធឌីជីថលដ៏មុតស្រួច DG SuperApp ដែលមិនត្រឹមតែជាច្រកចេញចូលសេវាសាធារណៈតែមួយប៉ុណ្ណោះទេ ប៉ុន្តែថែមទាំងនាំយក AI ដែលកំពុងតែពេញនិយមប្រើប្រាស់នៅលើអ៊ីនធឺណិត មកឱ្យពលរដ្ឋប្រើប្រាស់ដោយឥតគិតថ្លៃ ដើម្បីផ្លាស់ប្តូររបៀបដែលយើងសិក្សា ធ្វើការ និងរស់នៅឱ្យកាន់តែទំនើបជាងមុន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

បើតាមប្រភពព័ត៌មាន ថ្នាល DG SuperApp នេះនឹងត្រូវប្រកាសដាក់ឱ្យប្រើប្រាស់សាកល្បងជាផ្លូវការនៅថ្ងៃទី១៣ ខែឧសភា ឆ្នាំ២០២៦ ខាងមុខនេះ។ ចំណុចដែលធ្វើឱ្យ DG SuperApp មានភាពលេចធ្លោបំផុត និងខុសប្លែកពីកម្មវិធីផ្សេងៗនោះគឺ ការដាក់បញ្ចូលនូវបច្ចេកវិទ្យាបញ្ញាសិប្បនិម្មិត (AI) ដែលកន្លងមកពលរដ្ឋអាចនឹងត្រូវបង់ប្រាក់ដើម្បីប្រើប្រាស់ ប៉ុន្តែពេលនេះនឹងផ្តល់ជូនដោយឥតគិតថ្លៃ និងគ្មានដែនកំណត់៖

• DG ChatGPT: ជាជំនួយការឆ្លាតវៃដែលមានសមត្ថភាពប្រហាក់ប្រហែលនឹង ChatGPT។ វាអាចជួយតាក់តែងអត្ថបទ វិភាគទិន្នន័យស្មុគស្មាញ និងឆ្លើយសំណួរគ្រប់វិស័យ ដែលជាឧបករណ៍ដ៏មានតម្លៃសម្រាប់សិស្ស និស្សិត និងអ្នកស្រាវជ្រាវ។

• TranslateKH: ជំនាញក្នុងការបកប្រែអត្ថបទរវាងភាសាខ្មែរ និងអង់គ្លេស ដែលត្រូវបានអភិវឌ្ឍឡើងឱ្យចំគោលដៅ និងបរិបទនៃភាសាខ្មែរយើងផ្ទាល់។

ក្រៅពីភាពឆ្លាតវៃនៃ AI ថ្នាលនេះក៏ជាមជ្ឈមណ្ឌលឌីជីថល  ដែលប្រមូលផ្តុំកម្មវិធីរដ្ឋបាលសំខាន់ៗជាច្រើន (Mini Apps) មកដាក់ក្នុងកន្លែងតែមួយ ដើម្បីកាត់បន្ថយការស៊ាំញ៉ាំ៖

• Qr.gov.kh: សម្រាប់ការប្រើប្រាស់ក្នុងការបង្កើត QR កូដតាមតម្រូវការ។

• MyHealth: អនុញ្ញាតអោយប្រជាពលរដ្ឋចូលមើលកំណត់ត្រាការទទួលថ្នាំបង្ការរបស់ខ្លួន បានយ៉ាងងាយស្រួល។

• DG Frame: បង្ហាញស្មារតីគាំទ្ររដ្ឋាភិបាល តាមរយៈការដាក់តាំងរូបភាពក្នុងរូបស៊ុមគាំទ្រយុទ្ធនាការណ៍ និងព្រឹត្តិការណ៍នានា របស់រដ្ឋាភិបាល។

• TopUp: ផ្តល់ភាពងាយស្រួលក្នុងការបញ្ជូលលុយកាតទូរសព្ទពីគ្រប់ប្រព័ន្ធ។

•  SIM Verifier: គឺជាកម្មវិធីដែលអនុញ្ញាតអោយអ្នកប្រើប្រាស់ផ្ទៀងផ្ទាត់អត្តសញ្ញាណស៊ីមកាត ដោយភ្ជាប់វាទៅនឹងគណនីធនាគារ ឬគណនីទូទាត់ប្រាក់របស់អ្នកប្រើប្រាស់។

ការមកដល់នៃ DG SuperApp នឹងជួយសម្រួលដល់ជីវភាពប្រចាំថ្ងៃរបស់មជ្ឈដ្ឋានជុំវិញ៖

1. មន្ត្រីរាជការ៖ បង្កើនប្រសិទ្ធភាពការងាររដ្ឋបាលតាមរយៈប្រព័ន្ធស្វ័យប្រវត្តិកម្ម។

2. ធុរជន៖ ងាយស្រួលក្នុងការទំនាក់ទំនង និងប្រើប្រាស់សេវាឌីជីថលរបស់រដ្ឋសម្រាប់ការវិនិយោគ។

3. សិស្ស-និស្សិត៖ មានជំនួយការ AI នៅក្បែរខ្លួនជានិច្ចសម្រាប់ការសិក្សា។ របៀបទាញយក និងកាលបរិច្ឆេទ សូមត្រៀមខ្លួននៅថ្ងៃទី១៣ ខែឧសភា ឆ្នាំ២០២៦ វេលាម៉ោង ២:៣០ រសៀល។

សាធារណជនអាចទាញយក DG SuperApp មកប្រើប្រាស់បានដោយងាយស្រួល និងឥតគិតថ្លៃ ដោយគ្រាន់តែចូលទៅកាន់ App Store ឬ Play Store រួចវាយពាក្យថា DG SuperApp ឬគ្រាន់តែស្កេន QR Code ដែលមាននៅលើសេចក្តីប្រកាសរបស់ក្រសួងជាការស្រេច។ នេះគឺជាមោទនភាពជាតិថ្មីមួយ ដែលបញ្ជាក់ថាបច្ចេកវិទ្យាខ្ពស់មិនមែនជារឿងឆ្ងាយដៃសម្រាប់ពលរដ្ឋខ្មែរទៀតឡើយ។ DG SuperApp នឹងក្លាយជាដៃគូដ៏សំខាន់ដែលមិនអាចខ្វះបាន ក្នុងការរុញច្រានកម្ពុជាឱ្យក្លាយជាសង្គមឌីជីថលដ៏រឹងមាំ និងរស់រវើកក្នុងពេលដ៏ខ្លីខាងមុខ។

អមជាមួយគ្នានេះដែរ ក្រសួងសាធារណការ និងដឹកជញ្ជូន និងក្រសួងប្រៃសណីយ៍និងទូរគមនាគមន៍ ជម្រាបជូនដល់សាធារណជនក្នុងគោលបំណងលើកកម្ពស់ប្រសិទ្ធភាពសេវាសាធារណៈ បង្កលក្ខណៈងាយស្រួលក្នុងការត្រួតពិនិត្យ និងបង្ការការក្លែងបន្លំឯកសារសាធារណៈ ក្រសួងសាធារណការ និងដឹកជញ្ជូន នឹងប្រើប្រាស់ជាផ្លូវការលើការផ្ទៀងផ្ទាត់ទិន្នន័យបណ្ណបើកបរយានយន្តលើថ្នាលផ្ទៀងផ្ទាត់ឯកសារ verify.gov.kh របស់ក្រសួងប្រៃសណីយ៍និងទូរគមនាគមន៍ ចាប់ពីថ្ងៃទី១៣ ខែឧសភា ឆ្នាំ២០២៦ នេះតទៅ។

ក្រសួងបានបញ្ជាក់ជូនដល់សាធារណជនផងដែរ ចំពោះបណ្ណបើកបរយានយន្តដែលបានចេញមុនថ្ងៃទី១៣ ខែឧសភា ឆ្នាំ២០២៦ ដែលមិនមាន ឬ មាន QR Code នៅតែអាចបន្តប្រើប្រាស់បានតាមការកំណត់របស់ក្រសួងសាធារណការ និងដឹកជញ្ជូន ហើយសម្រាប់បណ្ណបើកបរដែលមាន QR Code ទាំងអស់នឹងមានបង្ហាញទិន្នន័យទៅលើថ្នាលផ្ទៀងផ្ទាត់ឯកសារ verify.gov.kh តាមរយៈការស្គែន QR Code ដែលមាននៅលើបណ្ណបើកបរយានយន្ត។

ក្រសួងសាធារណការ និងដឹកជញ្ជូន សូមជម្រាបជូនក្រសួង ស្ថាប័នពាក់ព័ន្ធ និងសាធារណជន ទាំងអស់ផងដែរថា ក្រសួងនឹងដាក់ឱ្យប្រើប្រាស់ជាផ្លូវការចំពោះការស្នើសុំបណ្ណបើកបរទម្រង់ឌីជីថល តាមរយៈ កម្មវិធី DG SuperApp របស់ក្រសួងប្រៃសណីយ៍និងទូរគមនាគមន៍ ដោយការស្គែន QR Code របស់ក្រសួងសាធារណការ និងដឹកជញ្ជូននៅលើបណ្ណបើកបរយានយន្តដែលមានស្រាប់ ដើម្បីរក្សាទុកបណ្ណបើកបរទម្រង់ឌីជីថលសម្រាប់ការប្រើប្រាស់ជាផ្លូវការទៅតាមជំហាននីមួយៗដូចមានភ្ជាប់ក្នុងឧបសម្ព័ន្ធនៃសេចក្ដីជូនដំណឹងនេះ ឬចូលទស្សនាវីដេអូណែនាំអំពីជំហាននីមួយៗ តាមរយៈតំណភ្ជាប់ https://go.gov.kh/mptc/ddl-um។អ្នកបើកបរយានយន្តទាំងអស់អាចប្រើប្រាស់បណ្ណបើកបរក្នុងទម្រង់ឌីជីថល ដើម្បីបង្ហាញដល់ស្ថាប័នមានសមត្ថកិច្ចពាក់ព័ន្ធនានា។

សូមជូនភ្ជាប់ជាមួយនូវ៖

- ឧបសម្ព័ន្ធទម្រង់បណ្ណបើកបរយានយន្ត និងការប្រើប្រាស់បណ្ណបើកបរ

- ឧបសម្ព័ន្ធការស្នើសុំបណ្ណបើកបរទម្រង់ឌីជីថលតាមរយៈកម្មវិធី DG SuperApp និងលេខទូរសព្ទ Hotline និងតេឡេក្រាមប៊ត (Telegram Bot) របស់ក្រសួងប្រៃសណីយ៍និងទូរគមនាគមន៍

ក្នុងករណីសាធារណជនជួបប្រទះបញ្ហាប្រឈមណាមួយក្នុងការទាញយក និងការប្រើប្រាស់កម្មវិធី DG SuperApp សូមទាក់ទងមកកាន់ក្រុមការងារបច្ចេកទេសរបស់អគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល តាមរយៈ លេខទូរសព្ទ Hotline ១២៣ ឬតាមរយៈតេឡេក្រាមប៊ត (Telegram Bot) https://go.gov.kh/dgc/dgsupportក្រសួងសាធារណការ និងដឹកជញ្ជូន និងក្រសួងប្រៃសណីយ៍និងទូរគមនាគមន៍ សង្ឃឹមយ៉ាងមុតមាំថា សាធារណជន និងបណ្តាញសារព័ត៌មានទាំងអស់ នឹងចូលរួមផ្សព្វផ្សាយព័ត៌មាននេះឱ្យបានទូលំទូលាយ ដើម្បីជាប្រយោជន៍ក្នុងការប្រើប្រាស់សេវាឌីជីថលឱ្យកាន់តែមានប្រសិទ្ធភាព។អាស្រ័យដូចបានជម្រាបជូនខាងលើ សូមក្រសួង ស្ថាប័ន និងសាធារណជនទាំងអស់ មេត្តាជ្រាបជាព័ត៌មាន និងចូលរួមសហការអនុវត្ត៕