ក្រោយទៅសម្ដែងនៅទីក្រុងសេអ៊ូល ជោគជ័យ N'John អាចនឹងសហការជាមួយតារា K-Pop?

កាលពីព្រឹកថ្ងៃទី២៨ ខែឧសភា ឆ្នាំ២០២៦ ម្សិលមិញនេះ N’John និងក្រុមការងារផលិតកម្មតន្ត្រីរបស់ខ្លួន បានជួបនិងសំណេះសំណាលជាមួយ ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ។

N’John (សុវត្ថិ មុនីនាគ) បានចូលរួមក្នុងនាមជាសិល្បករ ( Global Artist) ក្នុងផលិតកម្ម Circa 13 Music របស់សហរដ្ឋអាមេរិក និងជាសិល្បករសញ្ជាតិខ្មែរ និងជាកូនប្រុសរបស់កំពូលតារាចម្រៀងលោកព្រាប សុវត្ថិ នៅស្ថានទូតកម្ពុជាប្រចាំសាធារណរដ្ឋកូរ៉េ ក្នុងឱកាសដែលលោកត្រូវបានគេអញ្ជើញទៅសម្តែងក្នុងកម្មវិធីប្រគំតន្ត្រីរួមគ្នាជាមួយតារាចម្រៀង K-pop នៅទីក្រុងសេអ៊ូល ប្រទេសកូរ៉េ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ក្នុងឱកាសនៃជំនួប លោក Pete Dinero អ្នកគ្រប់គ្រងក្រុមហ៊ុន Circa 13 Music បានជម្រាបឯកឧត្តមឯកអគ្គរាជទូតថា នេះជាលើកទី១ ដែលក្រុមរបស់លោកបានមកសម្តែងក្នុងកម្មវិធីប្រគំតន្រ្តីនៅទីក្រុងសេអ៊ូល។ លោកបន្តថា ក្រោយការសម្តែងថ្ងៃនេះ ក្រុមហ៊ុនរបស់លោកនឹងបន្តកិច្ចសហការកាន់តែល្អជាមួយក្រុមហ៊ុនសិល្បៈកម្សាន្តរបស់កូរ៉េ ដើម្បីឱ្យលោក N’ John មានឱកាសសម្តែងកាន់តែច្រើននៅប្រទេសកូរ៉េ ដោយសាររូបលោកមានមហិច្ឆតាចង់ជំរុញប្រជាប្រិយភាពរបស់លោក N’ John ឱ្យកាន់តែល្បីល្បាញ ក្នុងទឹកដីនៃប្រទេសកូរ៉េ និងបណ្តាប្រទេសនានាក្នុងតំបន់អាស៊ីអាគ្នេយ៍។

ឯកឧត្តមឯកអគ្គរាជទូតបានសម្តែងនូវមោទកភាពដែលបានឃើញតារាចម្រៀងខ្មែរឡើងសម្តែងលើឆាកអន្តរជាតិ។ ឯកឧត្តមសង្ឃឹមថាលោក N’ John នឹងអាចធ្វើការសហការជាមួយស្ថានទូត ក្នុងការចូលរួមសម្តែងក្នុងកម្មវិធីធំៗរបស់ស្ថានទូត ដើម្បីឱ្យបងប្អូនខ្មែរបានជួប និងទស្សនាការសម្តែងរបស់លោក។

ជាពិសេស នៅក្នុងវិស័យ Kpop ឃើញថាតារាចម្រៀងភាគច្រើនសុទ្ធតែស្គាល់បទ Sweet Love និង បទ Pop Out របស់តារាចម្រៀងប្រុសរបស់យើង ហើយថែមទាំងបាននាំគ្នារាំបង្ហោះទៅក្នុងបណ្ដាញសង្គម TikTok ដែលមានអ្នកទស្សនារាប់លាននាក់ទៀតផង។ គោលដៅបន្ទាប់របស់ផលិតកម្ម Circa 13 Music គឺចង់ចូលទៅក្នុងវិស័យតន្ត្រីជាមួយ Kpop ជាពិសេសគឺដោយមានការសហការគ្នានាពេលខាងមុខ ដើម្បីនាំ N'John ឲ្យកាន់តែមានភាពល្បីល្បាញស័កសមនឹងសមត្ថភាពរបស់លោក៕

ប្រភព៖ ស្ថានទូតកម្ពុជាប្រចាំសាធារណរដ្ឋកូរ៉េ

វីដេអូការសម្ដែងនៅកូរ៉េ៖ N.John

• តារាខ្មែរ