ពិធីករទូរទស្សន៍បាយ័ន លោក ជា សុវណ្ណារិទ្ធ បានកូនប្រុស ម្នាក់ហើយ!

ភ្នំពេញ៖ នៅព្រឹក ថ្ងៃទី១៨ ខែកញ្ញា ឆ្នាំ២០១៥ នេះ ពិធីករប្រចាំស្ថានីយ៍ទូរទស្សន៍ បាយ័ន លោក ជា សុវណ្ណារិទ្ធ ទទួលបាន កូនប្រុសម្នាក់ហើយ បន្ទាប់ភរិយា ជាទីស្រលាញ់ របស់លោក ខិតខំពរពោះ អស់រយៈពេល ជាច្រើនខែ និងបានឆ្លងទន្លេ នៅឯមន្ទីរពេទ្យ ពហុព្យាបាល រោគស្រ្តី និងសម្ភព ហ្ស៊ូលី។

លោក ជា សុវណ្ណារិទ្ធ និងភរិយា រួមទាំង កូនប្រុស ដែលទើបនឹងកើត

ជាមួយគ្នានេះដែរ លោក ជា សុវណ្ណារិទ្ធ បានសម្តែងការរីករាយ និងសប្បាយចិត្ត យ៉ាងខ្លាំង ហើយបានបង្ហោះរូបថត ភរិយា និងកូនប្រុស រួមទាំងសារ នៅលើបណ្តាញសង្គម ហ្វេសប៊ុក ដោយរៀបរាប់ថា «សួស្តី ពុកម៉ែពូមីង បងប្អូន ទាំងអស់គ្នា ឥឡូវនេះ ម៉ោងនេះ កូនខ្ញុំ បានកើតហើយ ឈ្មោះ ជា ប្រសិទ្ធិរិទ្ធ ភេទប្រុស កើតថ្ងៃទី១៨ ខែកញ្ញា ឆ្នាំ២០១៥ វេលាម៉ោង ៨ និង ១២នាទីព្រឹក ទំងន់ ៣,៣១៥ក្រាម ប្រវែង ៥០សង់ទីម៉ែត្រ និងឆ្នាំមមែ»។

ជាងនេះទៅទៀត បើមើលតាមរូបថត ដែលលោក ជា សុវណ្ណារិទ្ធ បានបង្ហោះ បានឲ្យឃើញថា ជា ប្រសិទ្ធិរិទ្ធ និងម្តាយ របស់គេ ពិតជាមានសុខភាពល្អ ខណៈគេមានសម្បុរស និងថ្លោសស្អាត គួរឲ្យស្រលាញ់ណាស់។

យ៉ាងណាមិញ អ្នកនិយមប្រើប្រាស់ បណ្តាញសង្គម ហ្វេសប៊ុក ជាច្រើន ក៏បានសម្តែងក្តីរីករាយ និងចូលរួមត្រេកអរ ចំពោះលោក ជា សុវណ្ណារិទ្ធ ផងដែរ ដែលឥឡូវនេះ លោកបានក្លាយទៅជា ឱពុកគេហើយ៕

ប្រភព ៖ ហ្វេសប៊ុក

ដោយ ៖ ប៊ី

ខ្មែរឡូត