រាជធានីភ្នំពេញ ៖ បុរសម្នាក់ត្រូវបានបងប្អូន និងប្រជាពលរដ្ឋឃាត់ខ្លួនប្រគល់ឲ្យសមត្ថកិច្ច បន្ទាប់ពីបុរសរូបនោះចាក់សាំង ដុតផ្ទះខ្លួនឯងសង្ស័យ ខឹងម្តាយមិនដណ្ដឹងប្រពន្ធឲ្យ ។ ហេតុការណ៍នេះបង្ក ឲ្យមានការភ្ញាក់ផ្អើល កាលពីវេលាម៉ោង៦ និង៤៥នាទីព្រលប់ ថ្ងៃទី១១ ខែកញ្ញា ឆ្នាំ២០១៦ នៅចំណុចផ្ទះលេខ១០២ ផ្លូវបេតុង ភូមិខ្វិត សង្កាត់សាក់សំពៅ ខណ្ឌដង្កោ ។
បុរសដែលចាក់សាំងដុតផ្ទះមានឈ្មោះ ហូ ផល្លីម អាយុ២៧ឆ្នាំ មុខរបរកម្មករសំណង់ ស្នាក់នៅផ្ទះកើតហេតុ ជាកូនទី៦ក្នុងគ្រួសារ ប្រុស២នាក់ ស្រី៥នាក់ មានម្ដាយឈ្មោះ យ៉ង ពៅ អាយុ៥៧ឆ្នាំ មុខរបរកសិករ កំព្រាឪពុក ហើយផ្ទះដែលបុរសនោះដុតមានទំហំ៥ម៉ែត្រគុណនឹង៦ម៉ែត្រ ថ្មក្រោមឈើលើ បណ្ដាលឲ្យខូចខាតខោអាវអស់មួយចំនួន និងតុមួយប៉ុណ្ណោះ ។
បើតាមសម្តីបងប្អូនរបស់ជនបង្ក ខាងលើបាននិយាយថា ឈ្មោះ ហូ ផល្លីម ជាមនុស្សញៀនថ្នាំ ឪពុកម្តាយស្តីប្រដៅលែងស្តាប់ទៅហើយ គិតតែបំផ្លាញទ្រព្យសម្បត្តិក្នុងផ្ទះ មុនពេលកើតហេតុ ពេលល្ងាចជនបង្ករូបនោះ ត្រឡប់មកពីដើរលេងវិញ ស្រាប់តែដេញម្ដាយឲ្យទៅចងការលុយយកទៅសងគេ ព្រោះអីរូបគេលេងបាល់ចាញ់ និងជំពាក់គេច្រើនណាស់ ពេលនោះម្ដាយជនបង្កមិនព្រមធ្វើតាមជនទេ ដោយសារតែមិនធ្វើតាម ជនបង្កបានលើកយកទូររទូស្សន៍ទៅបញ្ចាំបាត់ ។
លុះដល់វេលាកើតហេតុខាងលើ បុរសរូបនោះមិនដឹងជាយ៉ាងមិច ចេះតែរអ៊ូរទាំ រួចហើយបានដើរឡើងទៅលើផ្ទះចាក់សោទ្វារផ្ទះពីខាងក្នុងជិត បន្ទាប់មកក៏ស្រាប់តែមានភ្លើង និងផ្សែងហុយខ្មួលខ្មាញ់ចេញពីលើផ្ទះ ឃើញដូច្នេះបងប្អូនប្រជាពលរដ្ឋដែលរស់នៅក្បែរនោះបាននាំគ្នាជួយយកទឹកទៅពន្លត់ម្នាក់មួយដៃមួយជើង ទើបភ្លើងរលត់ទៅវិញ ដោយមិនបណ្តាលឲ្យឆាបឆេះផ្ទះទេ គ្រាន់តែឆេះខោអាវ និងរបស់របរក្នុងផ្ទះអស់មួយចំនួន ។ ភ្លាមៗនោះប្រជាពលរដ្ឋបានរាយការណ៍ទៅសមត្ថកិច្ចមូលដ្ឋានឲ្យចុះមកមើល និងឃាត់ខ្លួនបុរសរូបនោះ យកទៅសាកសួរនៅអធិការដ្ឋានខណ្ឌដង្កោ ។
នៅពេលដែលសមត្ថកិច្ចសាកសួរ បុរសរូបនោះបានសារភាពថា រូបគេពិតជាមានបំណងដុតផ្ទះពិតប្រាកដមែន ដោយសារតែខឹងម្ដាយមិនដណ្ដឹងប្រពន្ធឲ្យ ហើយរូបគេបានសុំម្តាយយកប្រពន្ធតាំងពីឆ្នាំ២០០៧មកម្ល៉េះ រហូតដល់ពេលនេះ គ្មានអ្នកណាយល់ចិត្ត និងអារម្មណ៍របស់គេឡើយ ម្យ៉ាងទៀតដោយសារមានការសើចចំអកពីមិត្តភក្ដិផងនោះ ធ្វើឲ្យរូបគេតូចចិត្តតូចថ្លើម ក៏ទិញសាំងចាក់ដុតផ្ទះចោលតែម្ដងទៅ ។
ក្រោយពីសាកសួររួច បុរសរូបនោះត្រូវបានសមត្ថកិច្ចកសាងសំណុំរឿងបញ្ជូនខ្លួនទៅតុលាការ ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា ដោយឡែកករណីមួយវិញទៀត បុរសម្នាក់ក្រោយពេល មានទំនាស់ជាមួយប្រពន្ធ ហើយខឹងប្រពន្ធ មិននៅផ្ទះ កើតការក្តៅក្រហាយ ដុតផ្ទះខ្លួនឯងចោល នៅម៉ោង ១៩៖៣០នាទីថ្ងៃទី២០ ខែមេសា ឆ្នាំ២០១៦កន្លងទៅ នៅភូមិប្រធាតុ ឃុំស្រឡប់ ស្រុកត្បូងឃ្មុំ។
អាជ្ញាធរមូលដ្ឋាន បានបញ្ជាក់ថា ក្នងហេតុការណ៍នេះ ធ្វើអោយមានការខូចខាត ផ្ទះឈើ០១ខ្នង ប្រក់ក្បឿង ទំហំ ៧ម X ៨ម បង្ករដោយម្ចាស់ផ្ទះឈ្មោះ: ឈន់ ឈឿន អាយុ ៣៧ឆ្នាំ ប្តី ក្រោយពីឈ្លោះជាមួយប្រពន្ធឈ្មោះ ញ ស៊ីណា អាយុ៣៥ឆ្នាំ និងមានកូនក្នុងបន្ទុក៤នាក់។ មន្ត្រីនគរបាលមូលដ្ឋាន បានឲ្យដឹងថា ឈ្មោះ ឈឿន បានដុតផ្ទះខ្លួនឯង ដោយសារខឹងប្រពន្ធមិននៅផ្ទះ ហើយនៅរសៀលថ្ងៃដដែលនេះ ឈឿន បានប្រើអំពើហឹង្សាលើប្រពន្ធនិងកូន។ បច្ចុប្បន្ន: ឈ្មោះឈន់ ឈឿន ត្រូវបាននាំខ្លួនទៅសួរនាំនៅអធិការដ្ឋាននគរបាលស្រុកត្បូងឃ្មុំ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
