សពសម្តេចវិបុលបញ្ញា សុខ អាន បានដង្ហែទៅដល់មុខវត្តបទុមវត្តី ដើម្បីបូជានាព្រឹកនេះ

(ភ្នំពេញ)៖ នៅព្រឹកព្រលឹម ថ្ងៃទី១៩ ខែមីនា ឆ្នាំ២០១៧នេះ ក្រុមគ្រួសារ មន្រ្តីរាជការ និងភ្ញៀវចូលរួមបុណ្យជាច្រើនាក់ បានចូលដង្ហែសព សម្តេចវិបុលបញ្ញា សុខ អាន ឧបនាយករដ្ឋមន្រ្តី និងជារដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ទៅកាន់ឈាបនដ្ឋាន មុខវត្តបទុមវត្តីហើយ ដើម្បីរៀបចំពិធីបូជា។

ការដង្ហែសពសម្តេចវិបុលបញ្ញា សុខ អាន បានចាកចេញពីគេហដ្ឋានសម្តេច នាសង្កាត់បឹងរាំង ខណ្ឌដូនពេញ រាជធានីភ្នំពេញ។ ក្នុងពិធីបូជាសពនេះ មានការចូលរួមពីមន្រ្តីជាន់ខ្ពស់ និងឥស្សរជន ព្រមទាំងមន្រ្តីគណបក្សសង្រ្គោះជាតិ ក្រុមគ្រួសារសពជាច្រើននាក់ចូលរួមយ៉ាងច្រើនកុះករ។

យោងតាមលិខិតជូនដំណឹងបានបញ្ជាក់ថា នៅក្នុងពិធីបូជាសព សម្តេចវិបុលបញ្ញា សុខ អាន នៅថ្ងៃស្អែកនេះ សម្តេចវិបុលសេនាភក្តី សាយ ឈុំ នឹងអានវិយោគកថា និងជីវប្រវត្តិ ចំណែក សម្តេចពញាចក្រី ហេង សំរិន ជូនព្រះអគ្គីដល់សពផងដែរ។ 

ប្រភព៖ freshnews

កំណត់ហេតុខ្មែរឡូត៖

កាលពីថ្ងៃទី១៦ ខែមីនា នៅម៉ោងប្រមាណ៦៖០០នាទី សពរបស់សម្តេចវិបុលបញ្ញា សុខ អាន ឧបនាយករដ្ឋមន្រ្តី រដ្ឋមន្រ្តីទីស្តីការគណៈរដ្ឋមន្រ្តី បានដឹកតាមរថយន្តពេទ្យទៅដល់គេហដ្ឋានរបស់សម្តេចវិបុលបញ្ញា សុខ អាន ស្ថិតនៅផ្ទះលេខ៧០ ផ្លូវ២១៤ សង្កាត់បឹងរាំង ខណ្ឌដូនពេញ។

សពសម្តេចវិបុលបញ្ញា សុខ អាន បានដឹកតាមយន្តហោះមកដល់កម្ពុជានៅម៉ោងប្រមាណ៥៖០៤នាទី ថ្ងៃទី១៦ ខែមីនា ឆ្នាំ២០១៧។ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ព្រមទាំងគណៈប្រតិភូមួយចំនួនក៏បានអញ្ជើញមកជាមួយផងដែរ។

សម្តេចវិបុលបញ្ញា សុខ អាន ឧបនាយករដ្ឋមន្រ្តី និងជារដ្ឋមន្រ្តីទទួលបន្ទុក ទីស្តីការគណៈរដ្ឋមន្រ្តី បានទទួលមរណភាពនៅវេលាម៉ោង ៦៖៣២នាទីល្ងាច នាថ្ងៃទី១៥ ខែមីនា ឆ្នាំ២០១៧នេះ ក្នុងជន្មាយុ៦៦ឆ្នាំ ដោយរោគាពាធ។ សម្តេចគឺជាអ្នកមានគុណបំណាច់ដ៏ធំធេងមួយ ក្នុងការបំពេញការងារ និងពលីគ្រប់យ៉ាង ដើម្បីបុព្វហេតុជាតិ។

ក្រោយទទួលដំណឹងមរណភាពនេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចេញសេចក្តីសម្រេចមួយ ដោយបង្កើតគណៈកម្មការ ដើម្បីរៀបចំបុណ្យសព សម្តេចវិបុលបញ្ញា សុខ អាន រដ្ឋមន្រ្តីទីស្តីការគណៈរដ្ឋមន្រ្តី។ គណៈកម្មការរៀបចំបុណ្យសពនេះដឹកនាំដោយ ឧបនាយករដ្ឋមន្រ្តី ប៊ិន ឈន ជាប្រធាន និង សម្តេចព្រះពោធិវង្ស អំ លឹមហេង ព្រះសង្ឃនាយករងទី២ នៃព្រះរាជាណាកចក្រកម្ពុជា ជាអនុប្រធាន រួមទាំងសមាជិកជាច្រើនទៀត៕