ហែមថុន វិទីនី៖ «គ្មានអី្វដែលត្រូវលាក់បាំងតទៅទៀត ចំពោះមនុស្សដែលគាត់ផ្តល់តំលៃពិតប្រាកដមកដល់ខ្ញុំ និងគ្រួសាររបស់ខ្ញុំ»..!

ភ្នំពេញ៖ ក្រោយពីដំណឹងភ្ជាប់ពាក្យរវាង កីឡាការិនីហែលទឹក ហែមថុន វិទីនី និងខ្សែការពារ សំអឿន ពិដោរ ត្រូវបានប្រកាសកាលពីម្សិលមិញ បានធ្វើឲ្យមហាជន និងអ្នកគាំទ្រជាច្រើន មានការភ្ញាក់ផ្អើលយ៉ាងខ្លាំង។

ខ្សែការពាររបស់ក្រុមជម្រើសជាតិ សំអឿន ពិដោរ បានប្រកាសដំណឹងភ្ជាប់ពាក្យនេះ នៅក្នុងគណនីហ្វេសប៊ុករបស់ខ្លួន ក្រោយពីមានមន្ទិលសង្ស័យពីអ្នកគាំទ្រអស់រយៈពេលជាយូរមកហើយ។

ចំពោះដំណឹងភ្ជាប់ពាក្យនេះដែរ ត្រូវបាន កីឡាការិនី ហែមថុន វិទីនី បញ្ជាក់នៅក្នុងបណ្តាញសង្គមហ្វេសប៊ុករបស់ខ្លួនឲ្យដឹងថា «គ្មានអី្វដែលត្រូវលាក់បាំងតទៅទៀត ចំពោះមនុស្សដែលគាត់ផ្តល់តំលៃពិតប្រាកដមកដល់ខ្ញុំ និងគ្រួសាររបស់ខ្ញុំ» ។

គួរបញ្ជាក់ថា មុនពេលប្រកាសភ្ជាប់ពាក្យ អ្នកទាំងពីរបានធ្វើឲ្យអ្នកគាំទ្រ និងមហាជនមួយចំនួនមានការសង្ស័យរួចទៅហើយ ដោយសារកន្លងមក ពួកគេតែងតែទៅណាមកណាជាមួយគ្នា និងថតរូបផ្អែមល្ហែមជាច្រើន គ្រាន់តែសាមីខ្លួនទាំងសងខាង មិនបានប្រកាសពីទំនាក់ទំនងស្នេហាជាសាធារណៈ។

យ៉ាងណាមិញ ម្ចាស់មេដាយមាសកីឡាជាតិ ផ្នែកហែលទឹក វ័យក្មេងស្រស់ស្អាតរូបនេះ ក៏បានអរគុណទៅកាន់អ្នកគាំទ្រផងដែរ ដែលបានគាំទ្រនូវទំនាក់ទំនងរបស់ពួកគេ ដោយក្នុងនោះ វិទីនី បាននិយាយថា «ខ្ញុំសូមអគុណសំរាប់ពាក្យល្អៗមកលើខ្ញុំ មានតែម្រាមដៃដប់សំពះអគុណដែលបានជូនពរអោយខ្ញុំមានក្តីសុខជាមួយគូរអនាគតខ្ញុំហើយខ្ញុំក៏សូមជូនពរអ្នកទាំងអស់គ្នាដូចគ្នា ខ្ញុំជឿថាអ្នកក៏ចង់បានអ្វីដែរពិតប្រាកដដូចខ្ញុំដែរ» ៕ 

• ស្នេហា