ខ្លាំងមែន! អាយុ៨១ឆ្នាំ រត់មួយថ្ងៃ១៨គ.ម​ និងឈ្នះពានរង្វាន់ស្រីសាច់ដុំច្រើនរាប់មិនអស់

បរទេស៖ ស្របពេលដែលស្ត្រីវ័យចំណាស់ជាច្រើននិយមដេរប៉ាក់ ឬសម្រាកនៅផ្ទះលេងជាមួយចៅៗនោះ លោកយាយ Ernestine Shepherd បែរជាមានទម្លាប់ក្រោកពីព្រឹកម៉ោង៣ ដើម្បីរត់ហាត់ប្រាណ១៨គីឡូម៉ែត្រក្នុងមួយថ្ងៃ និង ទៅហាត់លើកសាច់ដុំទៅវិញ។

អ្នកមានឃើញដែរទេ? លោកយាយ Ernestine មើលទៅនៅរឹងមាំខ្លាំងណាស់។ កាលពីឆ្នាំ ២០១០ លោកយាយធ្លាប់បានជាប់នៅក្នុងកំណត់ត្រាពិភពលោក ជានារីសាច់ដុំដែលមានវ័យចំណាស់បំផុតនៅក្នុងលោក។ ប៉ុន្តែ មួយឆ្នាំក្រោយមក កំណត់ត្រានោះ ក៏ត្រូវបានបំបែកដោយលោកយាយមួយរូបផ្សេងទៀត ដែលមានវ័យចាស់ជាងលោកយាយ Ernestine ត្រឹមតែមួយឆ្នាំតែប៉ុណ្ណោះ។ ទោះជាយ៉ាងណា នៅក្នុងឆ្នាំ ២០១៦ និងឆ្នាំ ២០១៧ លោកយាយក៏បានក្លាយជាម្ចាស់នៃកំណត់ត្រានោះម្តងទៀត។ ក្រៅពីនេះ លោកយាយក៏បានយកឈ្នះនៅក្នុងកម្មវិធីប្រកួតនារីសាច់ដុំផ្សេងៗទៀតជាច្រើនផងដែរ ហើយអ្វីដែលធ្វើឲ្យអ្នកទាំងអស់គ្នាភ្ញាក់ផ្អើលខ្លាំងនោះគឺនៅពេលដឹងថា នៅក្នុងឆ្នាំនេះ លោកយាយមានអាយុ ៨១ឆ្នាំហើយ។

ទោះជាយ៉ាងណា ពីមុនមក លោកយាយ Ernestine មិនមែនជាអ្នកហាត់សាច់ដុំនោះទេ។ លោកយាយ Ernestine បានចាប់កំណើតជាមួយរូបរាងដ៏ស្រស់ស្អាត ហើយក៏ធ្លាប់ធ្វើជាតារាម៉ូដែលនៅក្នុងទីក្រុង Baltimore អស់រយៈពេលជាច្រើនឆ្នាំផងដែរ។ ប៉ុន្តែនៅពេលដែលវ័យរបស់លោកយាយកាន់តែចាស់ឡើង រូបរាងរបស់លោកយាយក៏បានផ្លាស់ប្តូរទៅតាមនឹងដែរ។

រហូតដល់ពេលលោកយាយមានអាយុ ៥៦ឆ្នាំ លោកយាយបានសាកល្បងស្លៀកឈុតហែលទឹកជាមួយបងស្រីរបស់លោកយាយមួយរូប ដែលមានឈ្មោះថា Mildred Blackwell ហើយពួកគេក៏បានភ្ញាក់ខ្លួនថា រូបរាងរបស់ពួកគេមិនស្អាតដូចពីមុនទៀតទេ។ បន្ទាប់មក ពួកគេក៏បានហាត់រាំ Aerobic។ បន្ទាប់មកទៀត ពួកគេក៏បានធ្វើការផ្លាស់ប្តូរពីការហាត់ Aerobic ទៅជាហាត់លើកសាច់ដុំវិញ។ លោកយាយ Ernestine នៅតែបន្តហាត់លើកសាច់ដុំតាំងពីពេលនោះមក រហូតដល់ពេលបច្ចុប្បន្ន បើទោះបីជាបងស្រីរបស់លោកយាយបានស្លាប់នៅក្នុងឆ្នាំ ១៩៩២ ដោយសារតែដាច់សសៃឈាមខួរក្បាលក៏ដោយក្តី។

បច្ចុប្បន្ន លោកយាយអាយុ៨១ឆ្នាំរូបនេះ តែងតែធ្វើការរត់ហាត់ប្រាណជាប្រចាំ និង ញ៉ាំអាហារដែលមានជាតិកាឡូរី ដូចជា បន្លែ សាច់មាន់ និងភេសជ្ជៈដែលធ្វើពីស៊ុតស ជាដើម។

ពិតណាស់! វាមិនមែនជារឿងងាយទេ ដែលពួកយើងទាំងអស់គ្នាអាចធ្វើដូចជាលោកយាយបាន ប៉ុន្តែលោកយាយបានចាប់ផ្តើមនៅពេលដែលគាត់មានអាយុ៥៦ឆ្នាំទៅហើយ ដូច្នេះវាមិនទាន់យឺតពេលទេ ដែលពួកយើងគួរតែចាប់ផ្តើមធ្វើតាមគាត់ ដើម្បីទទួលបានសុខភាពល្អ និងរាងកាយរឹងមាំ៕

ប្រភព៖ បរទេស