ខេត្តព្រៃវែង ៖ សង្វៀនបញ្ជល់មាន់មួយកន្លែង ជ្រកក្រោមស្លាកកាស៊ីណូមួយ ដែល «តោទ្រា» បិទទ្វាររាប់ឆ្នាំ បានចាប់បើកលេង កាលពីថ្ងៃទី៤ តុលា ដោយមានល្បែងស៊ីសងគ្រប់ប្រភេទអមជាមួយ ប៉ុន្តែអ្វីដែលគួរឱ្យចាប់អារម្មណ៍នោះ គឺក្រោយពីចាប់បើកលេងបានប៉ុន្មានម៉ោង នៅថ្ងៃទីមួយនោះ ស្រាប់តែមានការប៉ះទង្គិចគ្នាមួយកើតឡើង រវាងភាគីខាងម្ចាស់សង្វៀនជាមួយនឹងកម្លាំងសមត្ថកិច្ចមូលដ្ឋាន ដែលចុះទៅសួរនាំពីច្បាប់ទម្លាប់នោះ ។
សង្វៀនបញ្ជល់មាន់ ដែលគេទើបតែបើកលេងនេះ មានទីតាំងស្ថិតនៅខាងក្រោយកាស៊ីណូមួយកន្លែងដែលគេបិទទ្វាចោលយូរមកហើយ នៅចំណុចភូមិប្រស់ស្វា ឃុំបន្ទាយចក្រី ស្រុកព្រះស្ដេច ចម្ងាយប្រមាណជាង១គីឡូម៉ែត្រពីមាត់ច្រកទ្វាព្រំដែនអន្តរជាតិបន្ទាយចក្រី ។ តាមការឱ្យដឹងពីអ្នកមើលការខុសត្រូវក្នុងសង្វៀននោះ បានបញ្ជាក់ឱ្យដឹងថាម្ចាស់សង្វៀនបញ្ជល់មាន់មួយនេះមានឈ្មោះ ម៉ាប់ ។
លោក សុខ ច័ន្ទឫទ្ធី នាយផ្នែកអន្តោប្រវេសន៍នៃអធិការដ្ឋាននគរបាលស្រុកព្រះស្ដេច ដែលដឹកនាំកម្លាំងនគរបាលស្រុកចុះទៅពិនិត្យសង្វៀនបញ្ជល់មាន់ខាងលើនោះបានឲ្យកោះសន្តិភាពដឹងថា លោកទទួលបានបទបញ្ជាពីលោកអធិការស្រុក ឱ្យចុះទៅសួរនាំម្ចាស់សង្វៀននោះ តើគេបើកលេងនេះមានច្បាប់ទម្លាប់ត្រឹមត្រូវឬទេ គឺមិនបានចុះទៅកូសកៀររកលាភសក្ការៈអ្វីទេ ប៉ុន្តែនៅពេលដែលលោកជួបជាមួយម្ចាស់សង្វៀនសួរនាំរកច្បាប់ទម្លាប់នោះ គេបែរជាមិនព្រមយកច្បាប់មកបង្ហាញទេ ។ ផ្ទុយទៅវិញ គិតតែឡូឡាហើយបញ្ជាឱ្យកូនចៅគេ ដែលកាងនៅទីនោះ ដេញលោកនិងកូនចៅចេញ ថែមទាំងគំរាមរកវាយ និងរកបាញ់លោកចោលទៀត ដែលទង្វើនេះ លោកមិនអាចទទួលយកបាននោះទេ ព្រោះវាមិនត្រឹមតែប្រមាថដល់រូបលោកនោះទេ គឺថែមទាំងប្រមាថដល់កងកម្លាំងមានសមត្ថកិច្ចថែមទៀតផង ។
នៅពេលមានការប្រទាំងប្រទឹសគ្នានោះដែរ បុរសម្នាក់ឈ្មោះ ផល ដែលជាអ្នកមើលការខុសត្រូវនិងជួយសម្របសម្រួលនៅក្នុងសង្វៀនជល់មាន់នោះ បានប្រាប់ទៅសមត្ថកិច្ចនិងក្រុមអ្នកសារព័ត៌មានថា សង្វៀនបញ្ជល់មាន់នេះគេមានច្បាប់អស់ហើយ បើចង់ដឹងទៅសួរអភិបាលខេត្ត និងលោកស្នងការខេត្តព្រៃវែងទៅដឹងហើយ ។
ចំណែកលោក ជ័យ សេងហ៊ាង អធិការនគរបាលស្រុកព្រះស្តេចបានឱ្យដឹងថា នៅថ្ងៃដែលគេបើកលេងនោះ លោកស្នងការខេត្តបានបញ្ជាមករូបលោក ឱ្យចុះទៅសួរនាំម្ចាស់សង្វៀននោះរកច្បាប់ទម្លាប់ ទើបរូបលោកបញ្ជាឱ្យកម្លាំងនគរបាលស្រុកចុះទៅសាកសួរ តែមិននឹកស្មានថា កើតមានរឿងអាក្រក់បែបនេះទេ ។ លោកអធិការបានបន្តថា ក្រោយកើតមានការប៉ះទង្គិចគ្នា ម្ចាស់សង្វៀននោះបានប្រាប់លោកតាមទូរស័ព្ទថា គេមានច្បាប់កាស៊ីណូចាស់ ដែលផុតសុពលភាព តែគេបានស្នើសុំទៅក្រសួងសេដ្ឋកិច្ចនិងហិរញ្ញវត្ថុពន្យាររយៈពេល៣ខែ គិតចាប់ពីខែតុលាដល់ចុងខែធ្នូ ដូច្នេះទើបគេហ៊ានបើកលេង ។ ប៉ុន្តែនៅពេលដែលលោកអធិការប្រាប់ឱ្យយកលិខិតអនុញ្ញាតពន្យារពេល៣ខែនោះមកឱ្យលោកមើល បែរជាខាងម្ចាស់សង្វៀននោះមិនព្រមយកមកឱ្យមើលសោះ រហូតមកដល់ពេលនេះ ច្បាប់នោះទំនងមាននៅលើបបូរមាត់តែប៉ុណ្ណោះ ឬច្បាប់នៅលើជើងកាង ។
ដោយឡែក លោកឧត្តមសេនីយ៍ ស្រេង ជា ស្នងការនគរបាលខេត្តព្រៃវែងបានឱ្យដឹងតាមទូរស័ព្ទនៅក្រោយកើតហេតុនោះថា លោកបានបញ្ជាឱ្យកម្លាំងរបស់លោកចុះទៅបិទហើយ គឺមិនអនុញ្ញាតឱ្យសង្វៀនជល់មាន់នោះ បើកលេងនោះទេ ប៉ុន្តែប្រសាសន៍របស់លោកហាក់ពុំមានប្រសិទ្ធភាពទេ ព្រោះពុំឃើញមានសមត្ថកិច្ចណាម្នាក់ចុះទៅបិទមិនឱ្យគេលេងបាននោះឡើយ គឺគេនៅតែបន្តលេងយ៉ាងរំភើយដដែល ប្រៀបដូចគ្មានអ្នកណាហ៊ានជាមួយអញទេ ។
លុះដល់ស្អែកឡើងថ្ងៃទី៥ តុលានៅពេលដែលកោះសន្តិភាពសួរនាំពីរឿងនេះ បែរជាលោកស្នងការនិយាយថា លោកខ្ជិលលូកដៃណាស់នាំមានរឿង ទុកឱ្យខាងក្រសួងគេចាត់ការទៅ...ហេ! ហេ!ចំណែកលោក ជា សុមេធី អភិបាលខេត្តព្រៃវែង មិនអាចទំនាក់ទំនងសុំការបំភ្លឺបានទេ ដោយសារតែទូរស័ព្ទរបស់លោក ខលចូលហើយគ្មានអ្នកទទួល ។
ប្រភពព័ត៌មានពីអាជ្ញាធរមូលដ្ឋានបានឱ្យដឹងថា សង្វៀនបញ្ជល់មាន់នេះគេបានចាប់បើកលេងកាលពីថ្ងៃទី៤ តុលា ដោយមានក្រុមអ្នកញៀននិងល្បែងរាប់រយនាក់ ជិះសុទ្ធតែរថយន្តស៊េរីទំនើបៗតម្លៃថ្លៃៗ ហើយសុទ្ធតែជាជនជាតិខ្មែរ បាននាំគ្នាចូលទៅលេងនៅក្នុងសង្វៀនបញ្ជល់មាន់មួយនេះ យ៉ាងកក្រើកដី ។
គេនៅតែបន្តបើកលេងបានយ៉ាងរលូនរហូតមកដល់ពេលនេះ ដោយពុំមានការរំខានពីសមត្ថកិច្ច ឬមន្ត្រីជំនាញណាឡើយ ។ នៅខណៈដែលច្បាប់របស់ប្រទេសកម្ពុជាបានចែងយ៉ាងច្បាស់ថា គ្រប់បនល្បែង កាស៊ីណូ និងសង្វៀនបញ្ជល់មាន់ទាំងអស់ដែលស្ថិតនៅជាប់ ឬក្បែបន្ទាត់ព្រំដែន គឺមិនអនុញ្ញាតឱ្យជនជាតិខ្មែរចូលលេងជាដាច់ខាតនោះ គឺច្បាប់នោះមានតែនៅលើក្រដាស ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
