ម្ចាស់បទ PPAP នឹងមកអុកឡុកពិធីពិសាភោជនីយអាហារ របស់លោកប្រធានាធិបតី ដូណាល់ត្រាំ (មានវីដេអូ)

បរទេស៖ ប្រធានាធិបតី នៃសហរដ្ឋអាមេរិក លោក ដូណាល់ ត្រាំ នឹងធ្វើដំណើរទស្សនកិច្ចរយៈពេល ១២ថ្ងៃ មកទ្វីបអាស៊ី ចាប់ពីថ្ងៃទី៣ ដល់ទី១៤ ខែវិច្ឆិកា ខាងមុខនេះ ដើម្បីពិភាក្សាអំពីបញ្ហាបន្ទាន់សំខាន់ៗ ជាមួយមេដឹកនាំដទៃផ្សេងទៀតក្នុងតំបន់។

ក្នុងដំណើរទស្សនកិច្ចរបស់លោក នឹងមានជំនួបពិភាក្សា ជាមួយនឹងនាយករដ្ឋមន្រ្តីជប៉ុន លោក Shinzo Abe ចំពេលមានភាពតាងតឺងនៃកម្មវិធីអាវុធនុយក្លេអ៊ែររបស់កូរ៉េខាងជើង។

ក្រៅពីកិច្ចពិភាក្សាការទូត នឹងមានពិធីពិសាភោជនីយអាហាររួមគ្នាមួយ ដែលក្នុងនោះ ម្ចាស់បទ PPAP (Pen Pineapple Apple Pen) ដ៏ល្បីនឹងត្រូវគេអញ្ជើញ មកបង្កើនបរិយាកាសរីករាយ ក៏ដូចជារឹតបន្តឹងចំណងមិត្តរវាងជប៉ុន និងសហរដ្ឋអាមេរិក ដែលប្រទេសទាំងពិរនេះក្លាយជាសម្ព័ន្ធមិត្តនឹងគ្នា តាំងពីសម័យក្រោយសង្គ្រាមលោកលើកទីពីរមកម្ល៉េះ។  

គួរឲ្យដឹងផងដែរថា បុរសដែលត្រូវគេអញ្ជើញ ត្រូវគេស្គាល់ច្បាស់ថា Pikutaro ដែលមានឈ្មោះពិត Daimaou Kosaka បានទទួលការចាប់អារម្មណ៍ជាខ្លាំង ជាមួយវីដេអូចម្រៀង PPAP ដ៏ល្បីរបស់លោក ដែលមានការចូលមកទស្សនារហូតដល់ទៅ ១១០ លានដង ក្នុងវេបសាយយូធូប។

អ្វីគួរឲ្យចាប់អារម្មណ៍នោះ ចៅស្រីម្នាក់របស់លោក ដូណាល់ ត្រាំ គឺនាងតូច Arabella ជាអ្នកគាំទ្រមួយរូបរបស់លោក Pikutaro ហើយនាងក៏ធ្លាប់ធ្វើត្រាប់តាមវីដេអូចម្រៀងនេះ រហូតទទួលបានការចាប់អារម្មណ៍ ពីសំណាក់អ្នកនិយមប្រើប្រាស់បណ្តាញ​អុីនធឺណេតទៀតផង៕

គួររម្លឹកថា លោកដូណាល់ ត្រាំ បានចូលកាន់កាប់តំណែងជាប្រធានាធិបតីទី ៤៥ របស់សហរដ្ឋអាមេរិក តាំងពីថ្ងៃទី ២០ ខែមករា ឆ្នាំ ២០១៧ មកម្ល៉េះ៕

សូមទស្សនាវីដេអូចម្រៀង PPAP ខាងក្រោម៖