ភេសជ្ជៈ៥យ៉ាងដោយប្រើ រមៀត អាចជួយបន្ថយការឈឺចាប់ និងការរលាកបានមិនចាញ់ថ្នាំពេទ្យផ្សេងៗទេ

អត្ថបទមុនៗអ្នកប្រាកដជាបានដឹងហើយថា រមៀតគឺជាឱសថពីធម្មជាតិដែលអាចជំនួយសុខភាព និងអាចព្យាបាលបញ្ហាសុខភាពបានផងដែរ ដោយការយកវាជារបបអាហារសម្រាប់ទទួលទានជាប្រចាំ។

ប៉ុន្តែក្រៅពីការយកមកជាអាហារសម្រាប់ទទួលទាន រមៀតក៏អាចយកមកធ្វើជាភេសជ្ជៈដែលមានរសជាតិឆ្ងាញ់ពិសាបានដូចគ្នា សម្រាប់អ្នកដែលមិនសូវជាចេះទទួលទានដោយការយកធ្វើជាអាហារទទួលទាន។ ចំណែកអត្ថប្រយោជន៍វិញមិនចាញ់គ្នាប៉ុន្មានទេ ថែមទាំងអាចបំបាត់ការឈឺចាប់នៅក្នុងរាងកាយ និងការរលាកផ្សេងៗបានផងដែរដូចជា៖

- មានសារធាតុប្រឆាំងនឹងអុកស៊ីតកម្ម ដែលអាចប្រឆាំងនឹងការរលាកក្នុងរាងកាយដូចជា រលាកសន្លាក់ ឆ្អឹង Crohn និងជំងឺរលាកក្រពះពោះវៀនជាដើមដែលជាមូលហេតុអាចបណ្តាលឱ្យកើតជំងឺដំបៅក្រពះ។

- ជួយបង្កើនកោសិកាខួរក្បាលថ្មី និងការពារការអន់ថយនៃសុខភាពខួរក្បាល

- ជំនួយដល់សុខភាពបេះដូង និងជាថ្នាំពីធម្មជាតិដែលអាចបំបាត់អាការឈឺចុកចាប់ផ្សេងៗក្នុងរាងកាយ

- អាចការពារ និងប្រឆាំងនៃការរីករាលដាលនៃជំងឺមហារីក

- ការពារ និងធ្វើឱ្យប្រសើរឡើងជាងមុនសម្រាប់អ្នកដែលកើតជំងឺចាស់វង្វេងវង្វាន់ (Alzheimer)

- ជួយធ្វើឱ្យស្បែកស្អាត សាច់ចាំ ថែមទាំងប្រឆាំងនឹងភាពចាស់ផងដែរ ព្រមទាំងគុណប្រយោជន៍ជាច្រើនទៀត។

ដូច្នេះ ដើម្បីទទួលបានគុណប្រយោជន៍ដ៏ច្រើនលើសលប់របស់រមៀត ក្រៅពីទទួលទានវាជាចំណីអាហារ អ្នកក៏អាច ជ្រើសយកការច្នៃជាភេសជ្ជៈមួយណាក៏បាន ក្នុងចំណោមវិធីទាំង៥ ដូចខាងក្រោមនេះ៖

១. ទឹកដោះគោរមៀត

គ្រឿងផ្សំ

- ទឹកដោះគោ ២ពែង (ប្រើខ្ទិះដូងក៏បាន)

- ម្សៅរមៀត ១កូនស្លាបព្រា

- ម្សៅខ្ញី ១កូនស្លាបព្រា

- ម្រេចខ្មៅ ១ចិប

- ទឹកឃ្មុំ ។

ការអនុវត្ត៖ យកទឹកដោះគោទៅដាំរហូតដល់ពុះ ចាំដាក់គ្រឿងផ្សំដូចជា ម្សៅរមៀត ម្សៅខ្ញី និងម្រេចខ្មៅកូរចូលបញ្ចូលគ្នាឱ្យពុះ ២ ទៅ៣នាទីទៀតចាំបិទភ្លើង។ ទុកឱ្យត្រជាក់ ១០នាទី ចាំថែមទឺកឃ្មុំបន្តិចដើម្បីបង្កើនរសជាតិ ហើយទទួលទានជាការស្រេច។

២. ភេសជ្ជៈរមៀតក្រឡុក

គ្រឿងផ្សំ

- ស្វាយទុំចិតជាដុំៗទុកឱ្យកក ១ពែង

- ផ្លែចេក កន្លះផ្លែ

- ម្សៅរមៀត ១កូនស្លាបព្រា

- ប្រេងដូង ១ស្លាបព្រាបាយ

- គ្រាប់ជីរ ១កូនស្លាបព្រា

- ម្សៅសម្បកឈើអែម/ឈើយីហ៊ុប កន្លះកូនស្លាបព្រា(Cinnamon អាចរកបានងាយនៅបណ្តាហាងលក់ឱសថបុរាណ) ) ។ 

ការអនុវត្ត៖ ងាយៗ គ្រាន់តែយកគ្រឿងផ្សំទាំងអស់ក្រឡុក និងកិនបញ្ចូលគ្នាឱ្យហ្មត់ រួចទទួលទានវាជាអាហារពេលព្រឹកជាការស្រេច។

៣. តែរមៀត

គ្រឿងផ្សំ

- ទឹកស្អាត ១ ទៅ២ពែង

- មើមខ្ញីចិតសម្បកឈូសជាចំណិតតូចៗ ១កូនស្លាបព្រា

- ម្សៅរមៀត ១ ទៅ ២កូនស្លាបព្រា

- ម្សៅម្រេច ១ចិប

- ម្សៅ Nutmeg ១ចិប (អាចរកបាននៅផ្សារទំនើប)

- ម្សៅ Clove ១ចិប (អាចរកបាននៅផ្សារទំនើប)

- ម្សៅសម្បកឈើអែម/ឈើយីហ៊ុប ១កូនស្លាបព្រា(Cinnamon អាចរកបានងាយនៅបណ្តាហាងលក់ឱសថបុរាណ) )

- ខ្ទិះដូង (ដាក់ក៏បានមិនដាក់ក៏បាន)

- ទឹកឃ្មុំសុទ្ធ (ដាក់ក៏បានមិនដាក់ក៏បាន)​។

ការអនុវត្ត៖ ជាដំបូងយកទឹកទៅដាំរហូតដល់ពុះ ចាំដាក់គ្រឿងផ្សំទាំងអស់ចូលកូរឱ្យសព្វប្រមាណជា ២ ទៅ៣នាទី និងត្រងយកតែទឹកទុកទទួលទាន។ ជាចុងក្រោយអ្នកអាចទទួលទានទឹកតែនេះយកតែម្តង ឬក៏បន្ថែមខ្ទិះដូងបន្តិច និងទឹកឃ្មុំបន្តិចដើម្បីបង្កើនរសជាតិក៏បាន។

ចំណាំ៖ សម្រាប់គ្រឿងផ្សំដែលពិបាករក ដូចជា ម្សៅ Nutmeg និងម្សៅ Clove មិនបាច់ដាក់ក៏បានដែរ។

៤. ទឹករមៀត និងម្រេច

គ្រឿងផ្សំ

- ម្សៅរមៀត ១ស្លាបព្រា

- ម្សៅម្រេចខ្មៅ កន្លះកូនស្លាបព្រា

- ប្រេងអូលីវ ១កូនស្លាបព្រា

- ទឹកស្អាត ១កែវ។

ការអនុវត្ត៖ លាយគ្រឿងផ្សំទាំងអស់កូរចូលទៅក្នុងទឹកស្អាតមួយកែវ រួចទទួលទានវាភ្លាមៗតែម្តងជាការស្រេច។

៥. ទឹករមៀតឡាតេ

គ្រឿងផ្សំ

- ខ្ទិះដូង ១ពែង

- ប្រេងដូង ១ស្លាបព្រាបាយ

- រមៀតស្រស់ចិតសម្បកហើយឈូស ១ស្លាបព្រាបាយ

- ខ្ញីស្រស់ចិតសម្បកហើយឈូស ១ស្លាបព្រាបាយ

- ម្សៅសម្បកឈើអែម/ឈើយីហ៊ុប ១កូនស្លាបព្រា(Cinnamon អាចរកបានងាយនៅបណ្តាហាងលក់ឱសថបុរាណ) )

- ម្រេចខ្មៅ ១ចិប

- ទឹកឃ្មុំសុទ្ធ​។

ការអនុវត្ត៖

- ជាដំបូងយកខ្ទិះដូងទៅដាំរហូតដល់ពុះ រួចយកគ្រឿងផ្សំទាំងអស់ដាក់ចូលបន្ថែមលើកលែងតែទឹកឃ្មុំ។

- ដាក់ភ្លើងតិចៗរំងាស់ប្រមាណជា ៤ ទៅ ៥នាទី ចាំបិទភ្លើងហើយទុកឱ្យត្រជាក់ ៥នាទី។

- យកទឹករមៀតឡាតេនេះមកច្រោះយកកាកចេញ ហើយបន្ថែមទឹកឃ្មុំបន្តិច សឹមទទួលទានជាការស្រេច។

ចំណាំ៖

- អ្នកអាចរកទិញម្សៅរមៀតនៅផ្សារ ឬផ្សារទំនើបក៏បាន។ ប៉ុន្តែយកល្អអ្នកអាចធ្វើវាដោយខ្លួនឯង ដោយគ្រាន់តែយករមៀតស្រស់ៗមកចិតស្តើងៗ ហាលឱ្យស្ងួតក្រៀមរាងស្រួយ បន្ទាប់មកយកមកបុក ឬកិនឱ្យចេញជាម្សៅទុកប្រើការជាការស្រេច។

- ម្យ៉ាងវិញទៀត ទោះជារមៀតល្អយ៉ាងណាក៏ដោយ តែក៏ត្រូវបានហាមប្រាមប្រើសម្រាប់អ្នកដែលមានជំងឺ និងបញ្ហាសុខភាពមួយចំនួនផងដែរ។ អ្នកអាចចូលអានអត្ថបទមានប្រយោជន៍បន្ត៖  ចៀសឱ្យឆ្ងាយពីរមៀត ប្រសិនជាអ្នកកើតជំងឺទាំងនេះ ជាពិសេសស្ត្រីមានផ្ទៃពោះ!