មិនពិបាកទេ លាងសម្អាតជាតិពុលចេញពីក្នុងខ្លួន សម្រកទម្ងន់ និងជួយដល់សុខភាពទាំងមូល ដោយគ្រាន់តែតមអាហារអស់ទាំងនេះតែប៉ុណ្ណោះ!

អាហារដែលអ្នកទទួលទានជាប្រចាំថ្ងៃ ពិតជាមានឥទ្ធិពល ចំពោះសុខភាពរូបរាងកាយទាំងមូលរបស់អ្នកខ្លាំងណាស់ ដែលជាហេតុចាំបាច់ត្រូវតែគិតគូឱ្យបានល្អ មុននឹងទទួលទានអាហារអ្វីមួយ ចូលទៅក្នុងពោះ ព្រោះថាសម័យបច្ចុប្បន្នមានភាពជឿនលឿនខ្ពស់ណាស់ ចំណែកអាហារក៏កាន់តែអភិវឌ្ឍន៍មាន អាហារប្លែកៗ និងឆ្ងាញ់ៗ កាន់តែច្រើនឡើង ដែលយើងមិនអាចដឹងច្បាស់ថា តើវាមានប្រយោជន៍ ឬផលប៉ះពាល់យ៉ាងណាខ្លះ ចំពោះសុខភាពនោះទេ។

ជាការពិតណាស់ គេក៏បានរកឃើញដែរថា មានអាហារមួយចំនួន ដែលគេពេញនិយមសព្វថ្ងៃ បានធ្វើឱ្យប៉ះពាល់ដល់សុខភាព និងទម្ងន់របស់អ្នកបាន។

ដូច្នេះហើយ ប្រសិនជាអ្នកចង់ឱ្យ សុខភាពរូបរាងកាយរបស់អ្នកប្រសើរ អាចបណ្តេញជាតិពុលចេញពីរាងកាយ និងមានរូបរាងស្រឡូនស្អាតនោះ អ្នកត្រូវតែចៀសវាងអាហារអស់ទាំងនេះ ឬកាត់បន្ថយម្តងបន្តិចៗទើបជាការល្អ ៖

១. អាហារចម្រាញ់

អាហារដែលចម្រាញ់ចេញពីរបស់ដើម ធ្វើឱ្យបាត់បង់អស់សារធាតុចិញ្ចឹម និងវីតាមីនសំខាន់ៗ ហើយសល់តែជាតិស្ករ និងជាតិម្សៅដែលអាចធ្វើឱ្យឡើងកាឡូរី កើតជំងឺទឹកនោមផ្អែម និងពោរពេញដោយជាតិខ្លាញ់ កូឡេស្តឺរ៉លមិនល្អ ដែលប៉ះពាល់ដល់សុខភាពទាំងមូលបាន។

ដូច្នេះអ្នកត្រូវតែចៀសវាង អាហារចម្រាញ់ទាំងអស់នោះ ដូចជា៖ ពពួកអាហារចៀន បំពង ការ៉េម ស្ករគ្រាប់ នំផ្អែម និងនំប៉័ងជាដើម។

២. អាហារពោរពេញដោយជាតិខ្លាញ់

អាហារដែលផ្ទុកនូវសារធាតុ Hydrogenated Fats គឺជាអាហារដែលពោរពេញដោយជាតិខ្លាញ់ និងចម្អិនក្នុងសីតុណ្ហភាពខ្ពស់ ដែលអាចប៉ះពាល់ដល់សុខភាព កើនឡើងជាតិខ្លាញ់កូឡេស្តឺរ៉លមិនល្អ ដុះក្បាលពោះ និងមានបញ្ហាទាក់ទងនឹងបេះដូងផងដែរ។

ដូច្នេះអ្នកគួរតែកាត់បន្ថយ ឬបញ្ឈប់ការទទួលទានតែម្តង នូវអាហារដែលផ្ទុកនូវជាតិខ្លាញ់អាក្រក់ដូចជា៖ នំស្រួយ (Biscuits) នំឃុគឃី នំកញ្ចប់ អាហារចៀន ឬបំពង និងនំខេកជាដើម។

៣. អាហារដែលបន្ថែមពណ៌ ឬរសជាតិ

ពពួកអាហារដែលមានបន្ថែមពណ៌ឱ្យស្រស់ ឬបន្ថែមរសជាតិ និងស្ករសប្បនិម្មិត ពោរពេញដោយជាតិគីមីប៉ះពាល់ ដល់សុខភាពខ្លាំងណាស់ ដូចជា បង្កើនហានិភ័យនៃជំងឺគ្រោះថ្នាក់ដូចជា៖ រាំរាំងដល់ការដំណើរការអាំងស៊ុយលីន ធ្វើឱ្យឡើងជាតិស្ករក្នុងឈាម បង្កជាជំងឺទឹកនោមផ្អែមប្រភេទី២ ឡើងទម្ងន់ហួសប្រមាណ និងជំងឺទាក់ទងនឹងសរសៃឈាមបេះដូងជាដើម។

៤. អាហារ និងភេសជ្ជៈកែច្នៃ

អាហារ និងភេសជ្ជៈកែច្នៃដែលវេចខ្ចប់នៅក្នុងដប កំប៉ុង ឬថង់ដែលដាក់លក់នៅលើទីផ្សារ ផ្ទុកនូវជាតិសូដ្យូម បន្ថែមក្លិន ពណ៌ និងមានជាតិគិមីខ្ពស់ណាស់ ដែលអាចបង្កជាសារធាតុពុលគ្រោះថ្នាក់ចំពោះសុខភាពបាន រួមមានដូចជា៖ ភេសជ្ជៈសូដា ទឹកផ្លែឈើ ឬទឹកក្រូចកំប៉ុង ប័រ ឈីស សាច់ក្រក់ និងអាហារជាច្រើនមុខទៀត។

៥. អាហារកំប៉ុង

បើទោះជាអាហារដែលច្រកកំប៉ុង មានភាពងាយស្រួល ទុកបានយូរ និងអាចចម្អិនស្រាប់ៗយ៉ាងណាក៏ដោយ តែវាមិនខុសពីអាហារកែច្នៃនោះទេ។ អាហារកំប៉ុងមានផ្ទុកសារធាតុគីមីមួយចំនួនដូចជា Bisphenol A (BPA) ដែលអាចរក្សាទុកបានយូរ បន្ថែមរសជាតិ ពណ៌ និងក្លិន ព្រមទាំងសូដ្យូម និងជាតិស្ករខ្ពស់ ដែលអាចផ្តល់ផលប៉ះពាល់ និងគ្រោះថ្នាក់ចំពោះសុខភាពខ្លាំងណាស់។

៦. អាហារដែលមានអក្សរ ឬសញ្ញាបញ្ឆោត

អ្នកប្រាកដជាធ្លាប់បានឃើញ អាហារជាច្រើនដែលបានប្រកាស ឬដាក់អក្សរមួយចំនួនដែលអាចទាក់ទាញអារម្មណ៍អ្នកទិញបាន ដោយពាក្យថា គ្មានជាតិស្ករ គ្មានជាតិខ្លាញ់ ឬរបស់ធម្មជាតិ គ្មានជាតិគីមីជាដើម។

ជាការពិតណាស់ គ្មានអាហារវេចខ្វប់មួយណា ដែលថាមិនដាក់សារធាតុគីមី ឬធម្មជាតិស្រស់ៗនោះទេ ព្រោះវាសុទ្ធតែឆ្លងកាត់រោងចក្រ និងកែច្នៃដាក់បន្ថែមសារធាតុទាំងអស់។

ដូច្នេះអ្នកមិនគួរទទួលទានអាហារទាំងនោះឡើយ ការទទួលទានអាហារ ចំណីស្រស់ៗពីធម្មជាតិទើបជាការប្រសើរ។

៧. ប្រេង ឬខ្លាញ់បន្លែ

ប្រេង ឬខ្លាញ់ដែលអ្នកប្រើប្រាស់ សម្រាប់មុខម្ហូបជាប្រចាំថ្ងៃ ចម្រាញ់ចេញពីគ្រាប់រុក្ខជាតិ និងបន្លែជាដើមនោះ អ្នកតែងតែគិតថា វាល្អចំពោះសុខភាព ប៉ុន្តែផ្ទុយទៅវិញ វាមិនមែនជាការពិតនោះឡើយ។

ពពួកប្រេងទាំងនោះមានផ្ទុកនូវ សារធាតុខ្លាញ់ឆ្អែត Omega-6 ច្រើនហួសកម្រិតពេល ដែលធ្វើឱ្យប៉ះពាល់ដល់សុខភាពទៅវិញ។ ដូច្នេះហើយបានជាអ្នកត្រូវតែចៀសវាង ឬកាត់បន្ថយអាហារដែលចៀន និងបំពងជាដើម ទើបល្អបំផុតចំពោះសុខភាព។

៨. អាហារ និងភេសជ្ជៈឆ្ងាញ់ៗ

អាហារ និងភេសជ្ជៈដែលដាក់លក់លើទីផ្សារ មានរសជាតិឆ្ងាញ់ បានក្លាយទៅជាអាហារដែលពេញនិយមរបស់មនុស្សសឹងតែគ្រប់គ្នា។ នោះក៏ដោយសារតែ គេបានដាក់សារធាតុគីមីជាច្រើន ដូចដែលបានរៀបរាប់ខាងលើ ហើយវាក៏បង្កជាគ្រោះថ្នាក់ដល់សុខភាពខ្លាំងណាស់ដែរ។

ដោយអាហារអស់ទាំងនោះរួមមាន៖ ទឹកដោះគោជូរកំប៉ុង ទឹកផ្លែឈើច្រកដប ឬកំប៉ុង ភេសជ្ជៈដែលមានជាតិសូដា ភេសជ្ជៈប៉ូវកម្លាំង និងរាល់ភេសជ្ជៈដែលវេចខ្ចប់ទាំងអស់។

ដូច្នេះអ្នកគួរតែបញ្ឈប់ ឬកាត់បន្ថយការទទួលទានអាហារអស់ទាំងនោះ ដើម្បីសុខភាព។

៩. អាហារដែលមានជាតិម្សៅ

រាល់អាហារដែលមានជាតិម្សៅច្រើនដូចជា៖ គ្រាប់ធញ្ញជាតិ ម្សៅអូត (Oatmeal) នំផាស់តា (Pasta) នំប៉័ង ដំឡូងបារាំង និងអាហារដែលមានជាតិម្សៅជាច្រើនផ្សេងទៀតទាំងអស់ មានផ្ទុកទៅដោយជាតិគ្លុយកូស ដែលបំបែកទៅជាជាតិស្ករយ៉ាងច្រើនលើសលប់បង្កជាបញ្ហាសុខភាព។

បន្ថែមពីនេះ វាក៏មានផ្ទុកនូវជាតិ កាបូអ៊ីដ្រាត (Carbohydrates) ដែលអាចធ្វើឱ្យអ្នកធាត់ និងឡើងទម្ងន់ខ្លាំងផងដែរ។ 

ជាការពិតណាស់អាហារទាំងអស់ខាងលើ សុទ្ធតែអាចធ្វើឱ្យប៉ះពាល់ដល់សុខភាពរបស់អ្នកទាំងអស់ នៅពេលដែលអ្នកទទួលទានវាជាប្រចាំ ដោយមិនគិតពីគ្រោះថ្នាក់។

ដូច្នេះដើម្បីចង់ឱ្យមានសុខភាពល្អ មិនចាំបាច់តមអាហារ ឬរកវិធីសាស្រ្តច្រើនពេកនោះទេ គ្រាន់តែចៀសវាងអាហារអស់ទាំងនេះខាងលើ ហើយទទួលទានអាហារដែលមានប្រយោជន៍ដូចជា៖ បន្លែផ្លែឈើធម្មជាតិ និងអាហារស្រស់ៗចម្អិនភ្លាមៗជាការស្រេច ៕