ពេលនេះដឹងហើយថា ហូបផ្លែគូលែន បានអត្ថប្រយោជន៍ធំ ទាំង ៤

អ្នកដឹងទេថា ផ្លែគូលែន ត្រូវបានគេដាំរាប់ពាន់ឆ្នាំមកហើយ ដែលដើមកំណើតដំបូងមកពីប្រទេសចិន។ ហើយមកដល់ពេលបច្ចុប្បន្ន វាក៏តែមានការធ្វើពាណិជ្ជកម្មនាំចេញនាំចូលទូទាំងពិភពលោក។  ផ្លែគូលែនមិនត្រឹមតែឆ្ងាញ់ ផ្អែម និងជាអាហារសំរន់ដ៏ល្អនោះទេ វាថែមទាំងសំបូរទៅដោយសារធាតុចិញ្ចឹមយ៉ាងច្រើន ដែលរាងកាយយើងត្រូវការប្រចាំថ្ងៃ។

ដូច្នេះខាងក្រោមជាអត្ថប្រយោជន៍សុខភាពទាំង ៤យ៉ាងទទួលបានពីផ្លែគូលែន៖ 

១. ល្អសម្រាប់ប្រព័ន្ធរំលាយអាហារ

ផ្លែគូលែនមានផ្ទុកទៅដោយសារធាតុសរសៃយ៉ាងច្រើន ដែលជាតម្រូវការចាំបាច់សម្រាប់ប្រព័ន្ធរំលាយអាហារ ជាពិសេសពោះវៀននេះឯង។  សារធាតុសរសៃ ជួយសម្រួលទៅដល់ចលនាក្នុងការដឹកនាំសារធាតុចិញ្ចឹមសម្រាប់ផ្តល់ទៅឲ្យកោសិកាតាមរយៈចរន្តឈាមដែលស្រូបយកតាមជញ្ជាំងនៃសរីរាង្គពោះវៀន។

សារធាតុនេះបានជួយសម្អាតនូវកាកសំណល់ និងសារធាតុពុលទាំងឡាយ ដែលតោងនៅតាមកោសិកានៃពោះវៀន ឲ្យចេញទៅតាមការបន្ទោរបង់។  ជាពិសេស សារធាតុសរសៃ ទទួលបានពីផ្លែគូលែន ជឱសថធម្មជាតិបំបាត់អាការទល់លាមកទៀតផង។

២. រក្សាសម្ពាធឈាម

ផ្លែគូលែន ក៏សំបូរទៅដោយ ប៉ូតាស្យូមដែលជាសារធាតុរ៉ែដ៏សំខាន់ ក្នុងការរក្សាសម្ពាធឈាមឲ្យនៅធម្មតា។ សារធាតុរ៉ែមួយប្រភេទនេះ បានធ្វើឲ្យសរសៃរីកធំ និង បានអនុញ្ញាតឲ្យលំហូរនៃចរន្តឈាមកើនឡើងច្រើនជាងមុន។ ជាពិសេសវាជួយបន្ថយសម្ពាធឈាម។

សរុបមក កត្តាទាំងនេះសុទ្ធតែអំណោយផលដល់សុខភាពនៃប្រព័ន្ធរបត់ឈាម ដែលមានបេះដូង និង សរសៃឈាម។

៣. ជំរុញប្រព័ន្ធភាពស៊ាំរាងកាយ

អ្នកដឹងទេថាខ្លួនប្រាណយើងប្រៀបបានដូចជាសមរភូមិមុខអីចឹង ដែលប្រព័ន្ធភាពស៊ាំរាងកាយយើងបានធ្វើការជារៀងរាល់ថ្ងៃ ចាប់តាំងពីយើងកើតមក ដើម្បីទប់ទល់ប្រឆាំងនឹងមេរោគរាប់ពាន់ប្រភេទដែលយើងប្រឈមពីបរិស្ថានខាងក្រៅ។ ដល់ពេលយើងធំពេញវ័យ អង់ទីគ័រយើងមានភាពរឹងមាំ និងអាចប្រឆាំងនឹងមេរោគបានយ៉ាងមានប្រសិទ្ធភាព ហើយយើងក៏ពុំងាយឈឺដែរ។

ប៉ុន្តែពេលខ្លះប្រព័ន្ធភាពស៊ាំរាងកាយតែមួយមុខ ក៏ពុំអាចវាយឈ្នះនឹងមេរោគដ៏ច្រើន ដែលចាំឈ្លៀតឱកាសបង្កជំងឺនៅពេលយើងបាក់កម្លាំងដែរ។

ដូច្នេះហើយវាជាការចាំបាច់ណាស់ដែលយើងត្រូវមានសារធាតុបំប៉នតាមរយៈចំណីអាហារយើងបរិភោគដូចជា Vitamin C ដែលទទួលបានពីផ្លែគូលែននេះឯង មិនត្រឹមតែជាសារធាតុប្រឆាំងនឹងជាតិពុល រ៉ាឌីកាល់សេរី ប៉ុន្តែថែមទាំងជា សារធាតុចូលរួមចំណែកជំរុញដល់ប្រព័ន្ធភាពស៊ាំរាងកាយ ប្រឆាំងនឹងមេរោគទៀតផង។ 

៤. ប្រឆាំងនឹងជំងឺមហារីក

ផ្លែគូលែនសំបូរទៅដោយ Vitamin ពិសេសៗជាច្រើន និងសារធាតុប្រឆាំងជាតិពុល ដែលដើរតួនាទីយ៉ាងសកម្មក្នុងការប្រឆាំងជាមួយពពួកសារធាតុពុល និងជាពិសេសរ៉ាឌីកាល់សេរី ដែលកោសិកាយើងផ្ទាល់ផលិត។  រ៉ាឌីកាល់ប្រភេទនេះ អាចមានផលប៉ះពាល់យ៉ាងគ្រោះថ្នាក់ដល់ DNA របស់កោសិកា។  កត្តានេះធ្វើឲ្យកោសិកាលូតលាស់ខុសប្រក្រតី និងអាចបង្កជាកោសិកាមហារីកបានទៀតផង។

បើទោះបីជាយ៉ាងណាក៏ដោយ សារធាតុពីរប្រភេទទទួលបានពីផ្លែគូលែន ដែលបានរៀបរាប់ខាងលើនេះមានមេកានិចពិសេស ក្នុងការបញ្ឈប់និងបង្ការការលូតលាស់នៃកោសិកាមហារីក ដែលកត្តាយ៉ាងសំខាន់ក្នុងការកាត់បន្ថយនូវហានិភ័យនៃជំងឺមហារីក៕