មិនធម្មតា! តាមឆ្លុះអេកូស្តេចឆ្លាម ដែលជាត្រីធំបំផុតក្នុងលោក ដោយជោគជ័យជាលើកដំបូង (មានវីដេអូ)

អេក្វាឌ័រ៖ ត្បិតមានឈ្មោះជាឆ្លាម និងជាពូជត្រីធំបំផុតក្នុងសមុទ្រ ក៏តាមពិតត្រីឆ្លាមយក្ស (whale shark) មានចរិតស្លូតបូត ស៊ីតែប្លង់តុង ពងត្រី និងកូនត្រីតូចៗប៉ុណ្ណោះ។  ហេតុនេះហើយបានជាអ្នកវិទ្យាសាស្ត្រនៅកោះហ្គាឡាប៉ាហ្គោស (Galapagos) នៃប្រទេសអេក្វាឌ័រ អាចឆ្លុះអេកូ (ពិនិត្យផ្ទៃពោះ) និងបូមយកគំរូឈាមពីយក្សក្នុងជលសារនេះបានដោយជោគជ័យជាលើកដំបូងបំផុត កាលពីពេលថ្មីៗនេះ។

ក្រុមអ្នកស្រាវជ្រាវដែលដឹកនាំដោយក្រុមអ្នកអភិរក្សឆ្លាមយក្ស បានទៅពិនិត្យពូជត្រីប្រភេទនេះនៅក្បែរកោះដាវីន (Darwin) ដែលស្ថិតនៅចុងខាងជើងនៃកម្រងកោះហ្គាឡាប៉ាហ្គោស ដោយកោះភ្នំភ្លើងនៅតំបន់ដាច់ស្រយាលនេះ ជាកន្លែងមួយក្នុងចំណោមកន្លែងដ៏តិចតួចបំផុត ដែលគេឧស្សាហ៍ឃើញត្រីឆ្លាមយក្សញីពេញវ័យ ដែលមានប្រវែងរហូតដល់ ១៤ ម៉ែត្រ ជារៀងរាល់ឆ្នាំ ហើយជាធម្មតាពួកវាអាចលូតលាស់ធំជាងឡានក្រុងពីរជាន់ (៦ ទៅ ១៦ ម៉ែត្រ) និងទម្ងន់លើស ២០ តោន។

គួរបញ្ជាក់ថា លទ្ធផលនៃការឆ្លុះអេកូនេះអនុញ្ញាតឱ្យក្រុមអ្នកវិទ្យាសាស្ត្របានឃើញ និងស្គាល់គ្រឿងក្នុងសម្រាប់បន្តពូជ ក៏ដូចជាអូវែ ថែមទាំងការលូតលាស់នៃពងអូវុល ហើយពួកគេអាចនឹងជួយទម្លាយអាថ៌កំបាំងនៃការបង្កាត់ពូជ ត្រីឆ្លាមធំបំផុតក្នុងលោកនេះទៀតផង៕

សូមទស្សនាវីដេអូខាងក្រោម៖

តើប្រិយមិត្តយល់យ៉ាងណាដែរ?

• វីដេអូ