បុរសម្នាក់ដែលដាក់ឈ្មោះតាម អាដុល ហ៊ីត្លែរ បានឈ្នះឆ្នោតនៅក្នុងស្រុក

ណាមីប៊ី៖ អ្នកនយោបាយណាមីប៊ីម្នាក់ដែលដាក់ឈ្មោះតាម អាដុល ហ៊ីត្លែរ បាននិយាយថា គាត់មិនមានផែនការដើម្បីគ្រប់គ្រងពិភពលោកនោះទេ បន្ទាប់ពីទទួលបានជ័យជម្នះដ៏ធំមួយ នៅក្នុងការបោះឆ្នោតក្នុងតំបន់។ លោក អាដុល ហ៊ីត្លែរ យូណូណា បានជាប់ឆ្នោតជាសមាជិកក្រុមប្រឹក្សាសម្រាប់មណ្ឌលបោះឆ្នោត Ompundja។

នៅក្នុងបទសម្ភាសន៍ជាមួយកាសែតអាល្លឺម៉ង់ Bild រូបលោកបាននិយាយថា គាត់មិនមានអ្វីត្រូវធ្វើជាមួយមនោគមវិជ្ជារបស់ក្រុមណាស៊ីនោះទេ។ ឈ្មោះ អាដុល មិនមែនជារឿងចម្លែកទេនៅក្នុងប្រទេសនេះ ដែលធ្លាប់ស្ថិតនៅក្រោមអាណានិគមអាល្លឺម៉ង់។ លោក យូណូណា បានសារភាពថា ឪពុករបស់គាត់បានដាក់ឈ្មោះឲ្យគាត់តាមមេដឹកនាំក្រុមណាស៊ី ប៉ុន្តែប្រហែលឪពុករបស់លោកមិនបានដឹងថា អាដុល ហ៊ីត្លែរ ជានរណានោះទេ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

កាលពីលោកនៅក្មេង លោកយល់ថាឈ្មោះនេះគឺធម្មតា នេះបើតាមសម្ដីរបស់លោក យូណូណា ដែលឈ្នះអាសនៈរបស់គាត់ជាមួយសំឡេងឆ្នោត៨៥ភាគរយ។ គាត់បាននិយាយបន្ថែមថា នៅពេលគាត់ដឹងក្ដីឡើង ទើបគាត់ដឹងថា អាដុល ហ៊ីត្លែរ មានបំណងក្ដោបក្ដាប់ពិភពលោកទាំងមូល ហើយគាត់ក៏មិនចង់ធ្វើរឿងបែបនេះដែរ។ លោក អាដុល ហ៊ីត្លែរ យូណូណា បានបញ្ជាក់ថា គាត់មិនមានគម្រោង ដើម្បីប្ដូរឈ្មោះនេះចេញទេ៕