ចលាចលនៅប៉ារីសទៀតហើយ! អំពើហិង្សានៅតែបន្តផ្ទុះឡើង ក្នុងការតវ៉ាប្រឆាំងនឹងភាពឃោរឃៅរបស់ប៉ូលិស (មានវីដេអូ)

បារាំង៖  អំពើហិង្សាបានផ្ទុះឡើងនៅទីក្រុងប៉ារីសរយៈពេល២សប្តាហ៍ជាប់ៗគ្នា នៅក្នុងមហាបាតុកម្មប្រឆាំងនឹងច្បាប់សន្តិសុខថ្មី និងភាពសាហាវឃោរឃៅរបស់ប៉ូលីស ដែលក្រុមបាតុករបានប៉ះទង្គិចគ្នាជាមួយប៉ូលិស ដុតរថយន្តតាមដងផ្លូវ និងកម្ទេចបង្អួចហាងទំនិញនានាផងដែរ។

ការធ្វើបាតុកម្មទូទាំងប្រទេសនេះ កំពុងក្លាយជាវិបត្តិដ៏ធំមួយ សម្រាប់រដ្ឋាភិបាលរបស់លោកប្រធានាធិបតី Emmanuel Macron ដោយភាពតានតឹងមានកាន់តែខ្លាំងឡើងៗ ដើមហេតុដោយសារតែការវាយដំរបស់ប៉ូលិស ទៅលើអ្នកផលិតតន្រ្តីជនជាតិស្បែកខ្មៅម្នាក់ កាលពីខែមុន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អ្នកយកព័ត៌មានរបស់ទីភ្នាក់ងារព័ត៌មាន AFP បាននិយាយថា បង្អួចនៃផ្សារទំនើបមួយ ទីភ្នាក់ងារអចលនទ្រព្យ និងធនាគារមួយបានត្រូវបំផ្លាញ ខណៈរថយន្តជាច្រើនត្រូវបានដុតឱ្យឆាបឆេះ នៅតាមបណ្តោយផ្លូវ Avenue Gambetta នៅពេលក្រុមបាតុករដើរតវ៉ាឆ្ពោះទៅ Place de la Republique។

វត្ថុជាច្រើនត្រូវបានបាតុករគប់ទៅប៉ូលិស ហើយប៉ូលិសក៏បានឆ្លើយតបដោយគប់ឧស្ម័នបង្ហូរទឹកភ្នែកទៅវិញ ដោយឈុតឆាកហិង្សានេះបន្តកើតឡើងពីការតវ៉ាកាលពីចុងសប្តាហ៍មុន ប្រឆាំងនឹងច្បាប់សន្តិសុខថ្មីដែលមិនឱ្យមានការផ្សព្វផ្សាយរូបភាព ឬវីដេអូរបស់ប៉ូលិសដែលបង្កអំពីហឹង្សាណាមួយឡើយ។

នេះជាការតវ៉ាមួយក្នុងចំណោមការតវ៉ាប្រហែល១០០ នៅទូទាំងប្រទេសបារាំង កាលពីថ្ងៃសៅរ៍ដែលប្រឆាំងនឹងច្បាប់សន្តិសុខថ្មី៕

• វីដេអូ