លើសពី App ដឹកជញ្ជូន៖ foodpanda បង្កើតសិក្ខាសាលាអំពីឌីជីថលដើម្បីជំរុញភាពរីកចម្រើននៃអាជីវកម្មសម្រាប់អាជីវករកម្ពុជា

រាជធានីភ្នំពេញ៖ ដើម្បីបង្ហាញពីការប្ដេជ្ញាក្នុងការជួយជ្រោមជ្រែងដៃគូអាជីវកម្មក្នុងស្រុកឱ្យរីកចម្រើន ក្រុមហ៊ុន foodpanda បានរៀបចំ «សិក្ខាសាលាសម្រាប់ម្ចាស់អាជីវកម្មនៅលើ foodpanda ក្រោមប្រធានបទ ភាពរីកចម្រើននៅយុគឌីជីថល» កាលពីថ្ងៃទី២៥ ខែសីហា ឆ្នាំ២០២៦ នៅអគារ GIA Tower។ សិក្ខាសាលានេះមានការចូលរួមពីម្ចាស់អាវីជកម្មគោលដៅទាំងផ្នែកភោជនីយដ្ឋាននិងហាងទំនិញ ចំនួន១៦០នាក់ ដើម្បីទទួលបានចំណេះដឹងឌីជីថលសំខាន់ៗ។ សិក្ខាសាលានេះរំលេចឡើងនូវបរិបទឌីជីថលបច្ចុប្បន្នរបស់អ្នកប្រើប្រាស់នៅកម្ពុជា និងចំណេះដឹងដែលអាចយកទៅអនុវត្តបាន រួមទាំងការជួយឱ្យអាជីវករយល់ដឹងពីដំណើរការមូលដ្ឋានក្នុងការប្រតិបត្តិការប្រចាំថ្ងៃរបស់ពួកគេ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អ្នកនាង Cherry May ប្រធានគ្រប់គ្រងទូទៅនៅក្រុមហ៊ុន Humology បានបើកសិក្ខាសាលានេះជាមួយនឹងការចែករំលែកស៊ីជម្រៅអំពីបរិបទអ្នកប្រើប្រាស់នៅកម្ពុជា រហូតដល់ការលម្អិតនៃប្រភេទមាតិកាដែលសមស្របសម្រាប់ Digital Channel នីមួយៗ។ អ្នកនាងក៏បានចែករំលែកអំពីការសាកល្បងផ្ទាល់ (Live Demo) ដោយប្រើប្រាស់មុខងារ AI ក្នុងការបង្កើតគំនិតមាតិកា និងយុទ្ធនាការអាជីវកម្ម។ បន្ថែមពីលើនេះ សិក្ខាកាមដែលជាម្ចាស់អាជីវកម្មក៏បានអនុវត្តផ្ទាល់ក្នុងការសាកល្បងមុខងារនីមួយៗ ដើម្បីបង្កើតលទ្ធផលសមស្របតាមតម្រូវការអាជីវកម្មរបស់ខ្លួន។

គួររម្លឹកផងដែរថា TikTok បានក្លាយជាបណ្ដាញសង្គមចម្បងមួយនៅកម្ពុជា ដែលជួយឱ្យការផ្សព្វផ្សាយទីផ្សារបានទៅដល់ដៃអ្នកប្រើប្រាស់ជាច្រើន ហេតុនេះហើយទើប foodpanda បានអញ្ជើញតំណាងក្រុមហ៊ុន Aleph ដែលជាក្រុមហ៊ុនដៃគូផ្តាច់មុខរបស់ TikTok នៅកម្ពុជា ចូលរួមជាវាគ្មិនកិត្តិយសនិងណែនាំម្ចាស់អាជីវកម្មអំពី Algorithms សមត្ថភាពក្នុងការផ្សព្វផ្សាយពាណិជ្ជកម្ម និងច្បាប់នៃការគ្រប់គ្រងមាតិការបស់ TikTok។

លោក សុន ផានិត អ្នកជំនាញផ្នែកគ្រប់គ្រងគណនី នៅ foodpanda ក៏បានចែករំលែកបទពិសោធផ្ទាល់ខ្លួនក្នុងនាមជាអ្នកបង្កើតមាតិកាមួយរូបនៅលើ TikTok  ដោយបានផ្តល់នូវគន្លឹះផ្សេងៗអំពីប្រភេទមាតិកាណាដែលមានប្រសិទ្ធភាពជាង និងអាចបង្កើនចំណូលបាន។

ចំណុចលេចធ្លោមួយក្នុងសិក្ខាសាលានេះគឺការអនុវត្តផ្ទាល់ តាមរយៈការបង្កើតមាតិកានៅលើ TikTok។ ចាប់ផ្ដើមពីការយកទ្រឹស្តីទៅអនុវត្តជាក់ស្តែង ម្ចាស់អាជីវកម្មបានសហការគ្នាជាក្រុមដើម្បីផលិតវីដេអូខ្លីៗ ដោយប្រើពេលតែ ៣០នាទីប៉ុណ្ណោះក្នុងការប្រមូលផ្ដុំអ្វីដែលបានរៀនពីសិក្ខាសាលា មកដាក់បញ្ចូលក្នុងវីដេអូខ្លីរបស់ខ្លួន។ សកម្មភាពនេះបានបញ្ចប់ទៅដោយការបោះឆ្នោតពីសំណាក់សិក្ខាកាមទាំងអស់ ក្នុងការស្វែងរកមាតិកាដែលទាក់ទាញជាងគេ ដែលញ៉ាំងបរិយាកាសកាន់តែរីករាយនិងមានការចូលរួមពីគ្រប់គ្នា។

លោក សាល សំណាង ម្ចាស់ហាង Go Go Chicken បានឱ្យដឹងថា សិក្ខាសាលានេះមានសារៈសំខាន់ណាស់ក្នុងការជួយឱ្យលោកបានស្គាល់កាន់តែច្បាស់អំពីឌីជីថលនិងអាចពង្រីកអាជីវកម្មរបស់លោកបាន។ លោកបានលើកឡើងថា «ក្នុងនាមជាម្ចាស់អាជីវកម្មក្នុងស្រុក ពួកយើងអត់ដែលមានឱកាសក្នុងការស្វែងយល់ពីបណ្ដាញសង្គមឱ្យច្បាស់អ៊ីចឹងទេ!»។ លោកក៏បានបន្តទៀតថា «ការចូលរួមសិក្ខាសាលាហ្នឹង យើងទទួលបានចំណេះដឹង ហើយយល់កាន់តែច្បាស់ពីបណ្ដាញសង្គម ដូចជា TikTok ជាដើមហ្នឹង ថាអាចជួយអីខ្លះដល់អាជីវកម្មរបស់យើង! ជារួម យើងអរគុណដល់ foodpanda ដែលខំប្រឹងជំរុញនិងគាំទ្រពួកយើង ហើយបង្កើតកម្មវិធីនេះឡើងដើម្បីផ្ដល់ឱកាសឱ្យពួកយើងរីកចម្រើនជាមួយគ្នា»។

ដៃគូម៉ាកអន្តរជាតិរបស់យើងដូចជា Big Apple ក៏ទទួលបានចំណេះដឹងយ៉ាងច្រើនពីសិក្ខាសាលានេះដែរ។ កញ្ញា យូយូ ម៉ុន អ្នកតំណាងពី Big Apple បានលើកឡើងថា «សិក្ខាសាលានេះផ្តល់នូវចំណេះដឹងសំខាន់ៗ ដោយបានផ្តល់ទាំងទិដ្ឋភាពទូទៅនៃការផ្សព្វផ្សាយពាណិជ្ជកម្មនៅកម្ពុជា និងការយល់ដឹងស៊ីជម្រៅអំពី TikTok»។ កញ្ញាបានបន្ថែមទៀតថា «វគ្គចែករំលែកពី TikTok ក៏ពិសេសដែរ ព្រោះថាពួកយើងមិនត្រឹមតែទទួលបានបទពិសោធដោយផ្ទាល់ក្នុងការបង្កើតមាតិកានោះទេ តែយើងក៏ទទួលបានឱកាសនិងបង្កើតទំនាក់ទំនងថ្មីៗជាមួយនឹងម្ចាស់អាជីវកម្មផ្សេងទៀតដែរ”។

ទោះបីជាមានការផ្លាស់ប្តូរធំៗមួយចំនួននៅក្នុងទីផ្សារក៏ដោយ ក៏ foodpanda នៅតែប្តេជ្ញាចិត្តយ៉ាងមុតមាំក្នុងការជំរុញទីផ្សារកម្ពុជាដដែល។ អ្នកនាង Angelique Tan ប្រធានគ្រប់គ្រងទូទៅនៃ foodpanda កម្ពុជា បានមានប្រសាសន៍ថា «យើងបានផ្ដល់នូវអត្រាទីផ្សារសមរម្យមួយដល់ម្ចាស់អាជីវកម្មក្នុងស្រុក ហើយក៏យើងមិនឈប់ត្រឹមប៉ុណ្ណឹងដែរ»។ អ្នកនាងបានបន្តទៀតថា «តាមរយៈការវិនិយោគដោយផ្ទាល់លើគំនិតផ្ដួចផ្ដើមសម្រាប់ដៃគូអាជីវកម្ម ឧទាហរណ៍ដូចជាសិក្ខាសាលា ភាពរីកចម្រើននៅយុគឌីជីថល នេះជាដើម សបញ្ជាក់ថា foodpanda នៅតែបន្តពង្រឹងប្រព័ន្ធអាជីវកម្មបស់ខ្លួន ដើម្បីធានាថាភោជនីយដ្ឋាននិងហាងទំនិញក្នុងស្រុក មានជំនាញនិងចេះប្រើប្រាស់បច្ចេកវិទ្យា ដើម្បីសម្រេចបាននូវជោគជ័យរយៈពេលវែងនិងប្រកបដោយចីរភាព»។

អំពី foodpanda៖ App ដឹកជញ្ជូនឈានមុខគេមួយនៅកម្ពុជាដែលប្តេជ្ញានាំយកអាហារ គ្រឿងទេស និងទំនិញចម្រុះមុខជាច្រើនប្រភេទទៀតជូនដល់អ្នកប្រើប្រាស់ ផ្ដល់ភាពងាយស្រួល និងដឹកជញ្ជូនលឿនទាន់ចិត្ត។ ដោយផ្អែកលើបច្ចេកវិទ្យា និងប្រតិបត្តិការដ៏ល្អឥតខ្ចោះ foodpanda កំពុងដើរតួនាទីក្នុងនាមជាអ្នកដឹកនាំទៅរកភាពរីកចម្រើននៃពាណិជ្ជកម្មរហ័ស (Q-commerce) ក្នុងតំបន់ ជាមួយនឹងបណ្តាញដៃគូអាជីវកម្មលក់រាយរបស់ខ្លួន ដើម្បីឆ្លើយតបរាល់តម្រូវការនិងផ្តល់ជម្រើសបន្ថែមទៀត លើសពីការដឹកជញ្ជូនអាហាររាប់លានមុខ។ foodpanda មានប្រតិបត្តិការអាជីវកម្មជាង ៤០០ទីក្រុង  ក្នុងប្រទេសចំនួន១០ នៅអាស៊ី រួមមាន សិង្ហបុរី ហុងកុង ម៉ាឡេស៊ី ប៉ាគីស្ថាន តៃវ៉ាន់ ហ្វីលីពីន បង់ក្លាដេស ឡាវ កម្ពុជា និងមីយ៉ាន់ម៉ា។ foodpanda គឺជាក្រុមហ៊ុនបុត្រសម្ព័ន្ធរបស់ Delivery Hero ដែលជាក្រុមហ៊ុនលំដាប់អន្តរជាតិក្នុងវិស័យដឹកជញ្ជូនអាហារ។

សម្រាប់ព័ត៌មានបន្ថែម សូមចូលទៅកាន់ https://www.foodpanda.com.kh/

បើលោកអ្នកមានចំណាប់អារម្មណ៍ក្នុងការក្លាយដៃគូអាជីវកម្មរបស់ foodpanda សូមចូលទៅកាន់ https://partner.foodpanda.com.kh