ក្រុមអ្នកគាំទ្រ Trump ប៉ះទង្គិចគ្នាជាមួយក្រុមអ្នកប្រឆាំង បង្កជាហិង្សានៅទីក្រុងវ៉ាស៊ីនតោន

អាមេរិក៖ អំពើហិង្សាបានផ្ទុះឡើងនៅតាមដងផ្លូវនៃទីក្រុងវ៉ាស៊ីនតោនឌីស៊ី ដោយក្រុមស្តាំនិយមបានប៉ះទង្គិចគ្នាជាមួយក្រុមបាតុករប្រឆាំង បន្ទាប់ពីមានការហែក្បួនដោយក្រុមអ្នកដែលប្រឆាំងនឹងជ័យជំនះ ក្នុងការឈ្នះឆ្នោតរបស់លោក Joe Biden។

ក្រុមបាតុករដែលគាំទ្រលោក Trump គឺក្រុម Proud Boys និងក្រុមប្រឆាំង Antifa បានធ្វើបាតុកម្មនៅតាមផ្លូវនៃទីក្រុង ហើយទោះបីជាប៉ូលិសបានបាញ់សារធាតុធ្វើឱ្យក្រហាយភ្នែក (pepper spray) ទៅលើសមាជិកនៃភាគីទាំងសងខាងក៏ដោយ ក៏ក្រុមទាំងពីរក៏នៅតែប្រមូលផ្ដុំគ្នាម្តងទៀត​ ហើយអំពើហិង្សានៅតែបន្តកើតមានជាបន្តបន្ទាប់។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យោងតាមកាសែត Washington Post ដែលបានដកស្រង់សម្តីអ្នកនាំពាក្យ អ្នកពន្លត់អគ្គីភ័យក្រុង DC លោក Doug Buchanan បានអោយដឹងថា មនុស្សចំនួន៤នាក់ត្រូវបានបញ្ជូនទៅកាន់មន្ទីរពេទ្យដោយពួកគេត្រូវបានគេចាក់ឱ្យរបួសធ្ងន់ធ្ងរ ដែលអាចមានគ្រោះថ្នាក់ដល់ជីវិត។ ប៉ូលិសបាននិយាយថា មនុស្សចំនួន២៣នាក់ទៀតត្រូវបានចាប់ខ្លួន។

សមាជិកប្រមាណ២០០នាក់នៃក្រុម Proud Boys ដែលជាក្រុមហឹង្សាស្តាំនិយម បានចូលរួមការដើរក្បួនកាលពីព្រឹកថ្ងៃសៅរ៍នៅក្បែរសណ្ឋាគារ Trump ក្នុងរដ្ឋធានី។ ក្រុម Proud Boys បានពាក់ឯកសណ្ឋានប្រយុទ្ធ អាវការពារគ្រាប់ ពាក់មួកសុវត្ថិភាព និងធ្វើសញ្ញាដៃដែលបង្ហាញពីជនជាតិស្បែកស។

ពួកគេបានស្រែកជេរប្រមាថទៅលើក្រុមបាតុករប្រឆាំង Antifa និងបានដុតទង់ Black Lives Matters ប៉ុន្តែប៉ូលិសបានបំបែកក្រុមទាំងពីរបានដោយជោគជ័យ រហូតដល់ពេលល្ងាច។

ការធ្វើបាតុកម្មក៏បានកើតឡើងដែរ នៅក្នុងរដ្ឋ Georgia, Pennsylvania, Michigan, Wisconsin, Nevada និង Arizona ដែលយុទ្ធនាការរបស់លោក Trump បានព្យាយាមលុបចោលការរាប់សន្លឹកឆ្នោត។

ប្រព័ន្ធផ្សព្វផ្សាយក្នុងស្រុកនៅឯទីក្រុង Olympia បានរាយការណ៍ថា មនុស្សម្នាក់ត្រូវបានបាញ់សម្លាប់ និងបីនាក់ត្រូវបានចាប់ខ្លួនបន្ទាប់ពីមានការប៉ះទង្គិចគ្នារវាងក្រុមបាតុករគាំទ្រនិងប្រឆាំងនឹងលោក Trump ។

នៅព្រឹកថ្ងៃសៅរ៍នេះ ក្រុមអ្នកគាំទ្ររបស់លោក Trump ដែលកាន់ទង់ជាតិ និងផ្លាកសញ្ញា បានបោះជំហានឆ្ពោះទៅរកសភា និងតុលាការកំពូលតាមរយៈទីប្រជុំជនទីក្រុងវ៉ាស៊ីនតោន ដែលត្រូវបានបិទចរាចរណ៍ដោយឡានប៉ូលិស និងឡានដឹកទំនិញ។

មានអ្នកហែក្បួនតិចតួចណាស់ដែលពាក់ម៉ាស់ បើទោះបីជាមានការស្លាប់ និងករណី Covid-19 កើនឡើងក៏ដោយ។ មនុស្សរាប់ពាន់នាក់បានប្រមូលផ្តុំគ្នានៅទីក្រុងវ៉ាស៊ីនតោន គឺតិចជាងអំឡុងពេលនៃការតវ៉ាស្រដៀងគ្នាកាលពីខែមុន៕