ក្រោយធ្លាយតម្លៃខ្លួនជាផ្លូវការ! ពេលនេះ តន់ ចន្ទសីម៉ា នឹងលេចមុខក្នុងការប្រគុំតន្រ្តីរបស់ក្រុមហ៊ុនធំមួយជាលើកដំបូង!

ភ្នំពេញ៖ បើនិយាយអំពីតំលៃខ្លួនក្នុងការចេញច្រៀង ប្រិយមិត្តប្រហែលជាបានជ្រាបច្បាស់ហើយថា បច្ចុប្បន្ននេះតារាចម្រៀងស្រីវ័យក្មេងកញ្ញា តន់ ចន្ទសីម៉ា ហាក់មានតម្លៃខ្លួនថ្លៃជាងគេ ដោយតម្លៃនេះគឺជាតម្លៃខ្លួនដែលផលិតកម្ម Galaxy Navatra បានដាក់ឱ្យនាងកាលពីពេលកន្លងមកនេះ។ 

ហើយបន្ទាប់ពីធ្លាយតម្លៃខ្លួនក្នុងការចេញច្រៀងជាសាធារណៈរបស់កញ្ញា តន់ ចន្ទសីម៉ា រួចមក ពេលនេះក្រុមហ៊ុន Smart ដែលជាក្រុមហ៊ុនផ្គត់ផ្គង់សេវាទូរគមនាគមន៍ដ៏ធំមួយនៅក្នុងប្រទេសកម្ពុជា បានក្លាយជាក្រុមហ៊ុនធំទី១ ដំបូងគេ ដែលហ៊ានចំណាយទឹកប្រាក់ដ៏ច្រើនសន្ធឹកសន្ធាប់ ជួលតារាចម្រៀងស្រូបរីនេះទៅច្រៀង ប៉ុន្តែបើធៀបនឹងតារាបរទេសវិញ ក្រុមហ៊ុន Smart ក៏បានធ្លាប់ចំណាយទឹកប្រាក់ជួលជាច្រើនសែនដុល្លារមកច្រៀងក្នុងប្រទេសយើងរួចមកហើយដែរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

សម្រាប់ទីផ្សារតារាចម្រៀងក្នុងស្រុកជាមួយតម្លៃខ្លួនខាងលើនោះ Smart ហាក់ដូចជាមិនព្រឺរោមនឹងតម្លៃនេះទេ សំខាន់ឈ្មោះល្បីល្បាញនាពេលបច្ចុប្បន្ន គឺស័ក្កិសមបំផុតដែលនាងត្រូវទទួលបាន។ កញ្ញា តន់ ចន្ទសីម៉ា ត្រូវបានក្រុមហ៊ុន Smart ជួលឱ្យច្រៀងនៅយប់ថ្ងៃទី 31 ធ្នូ 2020 ជាមួយកម្មវិធីចុងឆ្នាំដ៏អស្ចារ្យ «2021 Virtual Sky – High New Year Countdown» ដែលនឹងនាំមកនូវការកម្សាន្តសប្បាយៗជាមួយសិល្បករជាង ២០ រូបផ្សេងទៀត។ ហើយក្នុងនោះដែរ កញ្ញា តន់ ចន្ទសីម៉ា ត្រូវបានគេដឹងថា ទទួលបានតម្លៃខ្លួនក្នុងតម្លៃមួយដែលថ្លៃជាងគេ។

តារាចម្រៀងវ័យក្មេង តន់ ចន្ទសីម៉ា ដែលជាគ្រាប់ពេជ្ររបស់ផលិតកម្ម Galaxy Navatra បានកំពុងតែឈរនៅលំដាប់កំពូល ដោយបទចម្រៀងរបស់នាងមានអ្នកទស្សនារហូតជិត ៥០០ លានដង ដែលចំនួននេះមិនទាន់អាច មានតារាចម្រៀងរូបណាអាចយកឈ្នះនាងបាននៅឡើយទេ។ ថ្វីត្បិតតែនាងនៅក្មេងខ្ចីក៏ពិតមែន ប៉ុន្តែការបកស្រាយបទចម្រៀងរបស់តារាស្រីល្បីឈ្មោះរូបនេះវិញ គឺនាងអាចច្រៀងបានគ្រប់ទម្រង់ និងច្រើនភាសាផងដែរ ហើយជាក់ស្តែងទៀតសោត បទចម្រៀងរបស់នាងក៏ចេញច្រើនជាងគេ ដែលមានស្ទើរតែរាល់ថ្ងៃ ហើយល្បីស្ទើរគ្រប់បទ ដោយមិនទាន់អាចមានតារារូបណាអាចធ្វើដូចនាងទេ៕

• តន់ ច័ន្ទសីម៉ា
• ចម្រៀង