ខ្លាំងមែន! ទីបំផុតចេញលទ្ធផលហើយ បទចម្រៀងរបស់ តន់ ចន្ទសីម៉ា មានអ្នកចូលទស្សនារហូតដល់ 525លានដង ក្នុងឆ្នាំ2020នេះ!

ភ្នំពេញ៖ នៅសល់តែ១ថ្ងៃទៀតទេ ឆ្នាំ២០២០ នេះ នឹងត្រូវរំកិលខ្លួនចេញ ជំនួសមកវិញនូវវត្តមាននៃឆ្នាំ ២០២១ ម្តងហើយ។ ងាកមកនិយាយពី views បទចម្រៀងរបស់តារាចម្រៀងស្រីវ័យក្មេងកញ្ញា តន់ ចន្ទសីម៉ា វាពិតជាមិនគួរឲ្យជឿ ដែលតារាចម្រៀងវ័យក្មេងរូបនេះ ប្រើពេលមិនដល់មួយឆ្នាំផង វ៉ាដាច់គេទាំងអស់ ដោយមានចំនួនអ្នកចូលទស្សនាសរុបរហូតដល់ទៅ 525 លានដង។ នេះបើតាមបង្ហាញឲ្យដឹងមុននេះបន្តិចនៅលើផេកផ្លូវការរបស់ផលិតកម្ម Galaxy Navatra។

ផ្អែកតាមរបាយការណ៍ពីផេកផ្លូវការរបស់ផលិតកម្ម Galaxy Navatra អាចនិយាយបានថាកញ្ញា តន់ ចន្ទសីម៉ា គឺជាកំពូលតារាចម្រៀងស្រីវ័យក្មេងម្នាក់ ដែលមានអ្នកទស្សនាច្រើនជាងគេនៅកម្ពុជា នៅឆ្នាំ២០២០ នេះ គឺមានរហូតដល់ទៅជាង 525 លានដងឯណោះ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាក់ស្តែងក្នុងចំណោមបទចម្រៀងល្បីៗរបស់នាងគេឃើញមានបទ «ឡានសារ៉ែន» បានឈរនៅលេខរៀងទី1 ដោយ មានអ្នក views រហូតដល់ទៅ 31.9 លានដង ត្រឹមតែ១០ខែ, លេខរៀងទី2 គឺបានទៅលើបទ «ដណ្ដឹងអូនទៅ» មានអ្នក views រហូតដល់ទៅ 29.8 លានដង ត្រឹមតែ៩ខែ, លេខរៀងទី3 បានទៅលើបទ «ចង់សុំ Wifi» ដោយមានអ្នក views រហូតដល់ទៅ 25 លានដង ត្រឹមតែរយៈពេល ៥ ខែប៉ុណ្ណោះ។

តាមការវាយតម្លៃរបស់លោក យឹម តាស្រង់ ដែលជាអ្នកគ្រប់គ្រងទូទៅរបស់ផលិតកម្ម Galaxy Navatra នៅឆ្នាំ២០២១ កញ្ញា តន់ ចន្ទសីម៉ា នឹងឈរលំដាប់កំពូលបន្តទៀត ហើយ views បទចម្រៀងរបស់នាងនឹងកើនឡើងដល់ទៅ ១០០០ លានដង ដែលចំនួននេះគឺពិបាកនឹងមានតារាចម្រៀងរូបណាអាចដណ្ដើមតំណែងនាងបានណាស់។ នេះបើផ្អែកតាមសន្ទុះនៃការគាំទ្របទពិសោធន៍នៃភាពរីកចម្រើនរបស់នាង។

បែបណាក្ដីអ្នកគាំទ្រក៏ដូចជាអ្នកសិល្បៈទាំងអស់កំពុងតែចាំមើលថា តើអាចមានតារាចម្រៀងណា ដែលអាចដណ្ដើមតំណែងកញ្ញា តន់ ចន្ទសីម៉ា បានក្នុងទសវត្សរ៍ថ្មីនេះ៕

• តន់ ច័ន្ទសីម៉ា