ព្រាប សុវត្ថិ និង តន់ ចន្ទសីម៉ា ក្រឡុកបទចូលឆ្នាំថ្មីមួយបទទៀតហើយ ចាំតែរាំឱ្យសប្បាយទៅ! (មានវីដេអូ)

ភ្នំពេញ៖ ខណៈដែលរដូវកាលចូលឆ្នាំខ្មែរនៅសល់ត្រឹមតែជាង ២ខែទៀតប៉ុណ្ណោះនឹងឈានមកដល់ហើយ ផលិតកម្ម Galaxy Navatra ហាក់កំពុងតែសម្រុកផលិតបទចូលឆ្នាំខ្មែរយ៉ាងចាស់ដៃតែម្ដង ដោយបទចម្រៀងទាំងនោះភាគច្រើនជាបទច្រៀងរួមគ្នារបស់កំពូលតារាចម្រៀង ព្រាប សុវត្ថិ និងតារាស្រីវ័យក្មេងរូបស្រស់កញ្ញា តន់ ចន្ទសីម៉ា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ដោយបទចម្រៀងទាំងនោះមានដូចជា ទី១បទ «កាត់ឆុង» ,ទី២ បទ «ប្រហុក»,ទី៣ បទ «រកស៊ីជាមួយយក្ស» ទី៤ បទ «អរគុណកាមេរ៉ា» ទី៥ បទ «មាន់កម្សត់» ហើយនៅព្រឹកនេះផងដែរ ផលិតកម្ម Galaxy Navatra ក៏បានបញ្ចេញបទចម្រៀងថ្មីសន្លាងមួយបទទៀតហើយ ដែលមានចំណងជើងថា «ឡានទំនើប»។

ជាក់ស្តែងបទចម្រៀងទាំង ៦បទ ដែលកំពូលតារាចម្រៀងទាំងពីរច្រៀងរួមគ្នានេះត្រូវបានគេសង្កេតឃើញថា ភាគច្រើនជាបទរាំលេងកម្សាន្តបែបសប្បាយៗ មានគ្រប់ចង្វាក់ដែលងាយស្រួលសម្រាប់បងប្អូនរាំលេងពេលជួបជុំគ្នាយ៉ាងសប្បាយរីករាយ ។

លោក យឹម តាស្រង់ អ្នកចាត់ការទូទៅផលិតកម្ម Galaxy Navatra បានទទួលស្គាល់ថា ខាងផលិតកម្មពិតជាកំពុងតែសម្រុកធ្វើបទចូលឆ្នាំថ្មីជាច្រើនបទឲ្យគ្រប់តារាចម្រៀងទាំងអស់នៅក្នុងផលិតកម្ម ដែលតាមផែនការគឺបញ្ចេញជារៀងរាល់ថ្ងៃតែម្ដងដើម្បីការកម្សាន្តដល់អ្នកគាំទ្រ។

អ្នកដឹកនាំផលិតកម្មរូបនេះថ្លែងថា បន្ទាប់ពីបានកំពូលតារាចម្រៀងទាំងពីរខាងលើបានច្រៀងរួមគ្នាជាច្រើនបទ សម្រាប់ចូលឆ្នាំឃើញថា កំពូលតារាចម្រៀងលោក ព្រាប សុវត្ថិ និង តន់ ចន្ទសីម៉ា គឺពិតជាដៃគូយ៉ាងស័ក្កិសមបំផុត។

ចង់ដឹងថា បទ «ឡានទំនើប» របស់កំពូលតារាចម្រៀង ព្រាប សុវត្ថិ និង តន់ ចន្ទសីម៉ា ពីរោះរណ្ដំ ព្រមទាំងចង់រាំលេងតាមយ៉ាងណានោះ មកតាមដានស្ដាប់ទាំងអស់គ្នាដូចខាងក្រោមនេះ៖

• ព្រាប សុវត្ថិ
• តន់ ច័ន្ទសីម៉ា
• ចម្រៀង
• វីដេអូ