ការភ្លេចភ្លាំងក្រោយសម្រាលជាអ្វី? ដោះស្រាយបែបណា?

តើម៉ាក់ៗណាខ្លះ ដែលដើរចូលបន្ទប់មួយ ហើយមិនដឹងថាខ្លួនចូលទៅបន្ទប់នោះធ្វើអ្វី? ឬកំពុងតែស្វែងរកវ៉ែនតា ដែលកំពុងតែពាក់នៅលើក្បាលរបស់ខ្លួនដែរឬទេ? ប្រសិនបើរឿងរ៉ាវស្រដៀងនេះកើតឡើងម្ដងម្កាល ម៉ាក់ៗមិនចាំបាច់បារម្ភនោះទេ ប៉ុន្តែប្រសិនបើវាកើតឡើងញឹកញាប់ ហើយយើងទើបតែសម្រាលកូនរួចផងនោះ យើងអាចនឹងមានឱកាសកើតមានអាការៈភ្លេចភ្លាំងក្រោយសម្រាល។

ជាទូទៅ អាការៈនេះ កើតឡើងបន្ទាប់ពីមានផ្ទៃពោះ ហើយជួនកាល វាអាចបន្តរហូតដល់រយៈពេល៥ខែ បន្ទាប់ពីសម្រាលកូនរួច។ យោងតាមការសិក្សាមួយ បានបង្ហាញថា នៅពេលដែលយើងក្លាយខ្លួនជាអ្នកម៉ាក់ វាអាចមានឥទ្ធិពលជារៀងរហូតលើមុខងារនៃការយល់ដឹង។ វាក៏អាចធ្វើឲ្យមានការលូតលាស់ខួរក្បាល ហើយថែមទាំងអាចនាំឲ្យមានការផ្លាស់ប្ដូរនៅផ្នែកដែលទទួលខុសត្រូវចំពោះការយល់ដឹងសង្គម និងការអាណិតអាសូរផងដែរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

កត្តាអ្វីដែលបណ្ដាលឲ្យកើតមានការភ្លេចភ្លាំងក្រោយសម្រាល

ជាក់ស្ដែង មានកត្តាជាច្រើនដែលនាំឲ្យកើតមានអាការៈភ្លេចភ្លាំងក្រោយសម្រាលនេះ ហើយកត្តាចម្បងនោះ គឺជាតម្រូវការក្នុងការថែទាំទារកដែលទើបនឹងកើត ដែលជាញឹកញាប់ ម៉ាក់ៗតែងតែលះបង់ការគេងរបស់ខ្លួន។ មូលហេតុនេះហើយ ដែលបណ្ដាលឲ្យខួរក្បាលចុះខ្សោយ ក៏ដូចជាធ្វើឲ្យយើងភ្លេចភ្លាំងច្រើន។ ក្រៅពីនេះ ម៉ាក់ៗដែលមានផ្ទៃពោះឆ្លងកាត់ការផ្លាស់ប្ដូរប្រព័ន្ធប្រសាទក្នុងខួរក្បាល អំឡុងពេល និងក្រោយពេលមានផ្ទៃពោះ ដែលជះឥទ្ធិពលដល់ការចងចាំរបស់ម៉ាក់ៗយ៉ាងខ្លាំង។ ជាធម្មតា បញ្ហានេះនឹងបាត់ទៅវិញដោយខ្លួនឯងទៅតាមពេលវេលា។

យើងគួរដោះស្រាយអាការៈភ្លេចភ្លាំងក្រោយសម្រាលនេះយ៉ាងម៉េច?

ទោះបីជាយើងដឹងថា ការភ្លេចភ្លាំងតិចតួចគឺជាផ្នែកមួយនៃការក្លាយជាអ្នកម៉ាក់ក៏ពិតមែន ប៉ុន្តែ ពេលខ្លះ វាបានក្លាយជារឿងដ៏គួរឲ្យធុញទ្រាន់នៅពេលដែលយើងភ្លេចរឿងសំខាន់ៗ។ អាការៈនេះ មិនមានភាពធ្ងន់ធ្ងរ ឬមានអ្វីដែលគួរឲ្យបារម្ភឡើយ។ យ៉ាងណាមិញ យើងមិនអាចគេចផុតពីផលប៉ះពាល់នៃការមានផ្ទៃពោះនេះបានទេ ប៉ុន្តែម៉ាក់ៗអាចព្យាយាមដោះស្រាយវាបានតាមវិធីសាស្ត្រទាំងនេះ។

១. កត់ត្រាកិច្ចការចាំបាច់ដែលត្រូវធ្វើ

វិធីសាស្ត្រដែលល្អបំផុតដើម្បីដោះស្រាយបញ្ហាភ្លេចភ្លាំង គឺការកត់ត្រាកិច្ចការសំខាន់ៗដែលត្រូវធ្វើ នៅពេលដែលយើងចាំបាច់ត្រូវចងចាំរឿងរ៉ាវជាច្រើន។ ចូររក្សាទុកក្រដាសកត់ត្រានៅជិតខ្លួន ដូច្នេះហើយ យើងអាចកត់ត្រាភ្លាមៗចំពោះរឿងរ៉ាវដែលសំខាន់ៗ។ ជាមួយគ្នានេះដែរ យើងក៏អាចដាក់សំឡេងរោទិ៍ ឬកត់ត្រានៅក្នុងReminder ដែលមាននៅក្នុងទូរសព្ទបានដូចគ្នា។

២. គេងឲ្យបានគ្រប់គ្រាន់

ជាទូទៅ ការគេងមិនគ្រប់គ្រាន់ គឺកើតឡើងនៅអំឡុងពេលពីរបីខែដំបូង បន្ទាប់ពីសម្រាលកូនរួច ដោយម៉ោងគេងរបស់ម៉ាក់ៗ ត្រូវផ្អែកទៅលើពេលវេលាគេងរបស់កូនដែលទើបនឹងកើត។ យូរៗទៅ ម៉ាក់ៗច្បាស់ជាមានអារម្មណ៍ហត់នឿយ និងគួរឲ្យធុញទ្រាន់មិនខាន។ ពិតណាស់ ការគេងគ្រប់គ្រាន់ គឺមានសារសំខាន់ណាស់សម្រាប់ដំណើរការធម្មតានៃខួរក្បាល និងរាងកាយរបស់យើង។ ដូច្នេះហើយ ចូររៀបចំពេលវេលាគេងរបស់ម៉ាក់ៗ ឲ្យត្រូវគ្នាជាមួយនឹងអាអូនដែលទើបនឹងកើត ទើបជាការប្រសើរ។

៣. ថែរក្សាខុសភាពផ្លូវកាយ និងផ្លូវចិត្ត

នៅពេលដែលម៉ាក់ៗមានពេលវេលា ម៉ាក់ៗគួរចូលរួមជាមួយនឹងសកម្មភាពជំនួយដល់រាងកាយ និងការចងចាំ ដោយការលេងហ្គេមផ្គុំពាក្យ ហ្គេមជំនួយប្រាជ្ញា ឬក៏ធ្វើលំហាត់ប្រាណមួយចំនួនទៀត។ ការថែទាំសុខភាពរាងកាយ និងផ្លូវចិត្តអាចជួយកាត់បន្ថយអាការៈភ្លេចភ្លាំងបានមួយកម្រិតផងដែរ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

អត្ថបទផ្ដល់សិទ្ធិដោយ Hello Krupet

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

SPONSORED CONTENT

ការ​ភ្លេចភ្លាំង​ក្រោយ​សម្រាល​ជា​អ្វី? ដោះស្រាយ​បែប​ណា​?

​កត្តា​អ្វី​ដែល​បណ្ដាល​ឲ្យ​កើត​មាន​ការ​ភ្លេចភ្លាំង​ក្រោយ​សម្រាល

យើង​គួរ​ដោះស្រាយ​អាការៈ​ភ្លេចភ្លាំង​ក្រោយ​សម្រាល​នេះ​យ៉ាង​ម៉េច​?

​១. កត់ត្រា​កិច្ចការ​ចាំបាច់​ដែល​ត្រូវ​ធ្វើ​

២. គេង​ឲ្យ​បាន​គ្រប់គ្រាន់​

៣. ថែរក្សាខុសភាពផ្លូវកាយ និង​ផ្លូវ​ចិត្ត​​​​

In Case You Missed It