ថ្វីត្បិតតែមានឈ្មោះថា “ដំណើបខ្មៅ” តែតាមពិតដំណើបខ្មៅមានពណ៌ស្វាយចាស់ទេ ហើយសារធាតុពណ៌នេះហើយដែលធ្វើឱ្យវាមានគុណប្រយោជន៍លើសលប់។ តើដំណើបខ្មៅផ្តល់ប្រយោជន៍អ្វីខ្លះដល់សុខភាពយើង?
យោងតាមសមាគមគីមីអាមេរិចបានឱ្យដឹងថា ដំណើបខ្មៅមានអាហារូបត្ថម្ភច្រើនជាងអង្ករសម្រូបទៅទៀត។ ដំណើបខ្មៅផ្ទុកទៅដោយ៖
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. ជាតិសរសៃ៖ ខុសពីអង្ករសម្រិតដំណើបខ្មៅមិនត្រូវបានកែច្នៃទេដែលមានន័យថាវានៅមានកន្ទក់។ កន្ទក់មានជាតិសរសៃមិនរលាយដែលជួយជំរុញចលនាអាហារឆ្លងកាត់ប្រព័ន្ធរំលាយអាហារលឿន និងបង្កើនលាមកព្រោះវាមិនត្រូវបានរំលាយដោយរាងកាយទេ។ ជាលទ្ធផលវាជួយក្នុងការបន្ទោបង់។ ជាតិសរសៃមិនរលាយធ្វើឱ្យយើងមានអារម្មណ៍ឆ្អែតលឿន និងកាត់បន្ថយការញុំាច្រើន។ ជាតិសរសៃអាចជួយរាងកាយស្រូបយក គ្លុយកូស (ជាតិស្ករ) ពីក្នុងអាហារយូរ (ដោយសារជាតិសរសៃត្រូវការរំលាយយូរ) ដូច្នេះវាអាចរក្សាកម្រិតជាតិស្ករនៅក្នុងឈាមឱ្យនៅថេរដោយកាត់បន្ថយហានិភ័យកើតជំងឺទឹកនោមផ្អែម។
២. សារធាតុប្រឆាំងអុកស៊ីតកម្ម៖ បរិមាណសារធាតុប្រឆាំងអុកស៊ីតកម្ម Anthocyanin (សារធាតុពណ៌ស្វាយក្រមៅ) នៅក្នុងដំណើបខ្មៅគឺខ្ពស់ជាងគ្រាប់ធញ្ញជាតិដទៃទៀតរួមទាំងអង្ករសម្រូប។ Anthocyanin អាចជួយកាត់បន្ថយកូឡេស្តេរ៉ូលអាក្រក់ (LDL)។ វាអាចការពារជំងឺដូចជា ជំងឺសរសៃឈាមបេះដូង ទឹកនោមផ្អែម និងមហារីក។ វាក៏អាចជួយជំរុញមុខងារខួរក្បាល និងកាត់បន្ថយការរលាកដែរ។
៣. គ្មានជាតិ Gluten៖ ដំណើបខ្មៅជាសម្រើសដ៏ល្អសម្រាប់អ្នកដែលអាលែកហ្ស៊ីនឹងជាតិស្អិត Gluten ដែលមាននៅក្នុងគ្រាប់ធញ្ញជាតិដូចជាស្រូវសាលីជាដើម។
៤. សារជាតិ phytonutrients៖ សារជាតិ phytonutrients ដែលមាននៅក្នុងដំណើបខ្មៅជួយបន្សាបជាតិពុលពីរាងកាយយើងដែលបង្កឡើងដោយរ៉ាឌីកាល់សេរី។ វាក៏ជួយថ្លើម (សរីរាង្គបន្សាបជាតិពុលដ៏សំខាន់បំផុតរបស់រាងកាយ) កំចាត់សារធាតុមិនល្អដែរ។
៥. ប្រូតេអ៊ីន៖ ប្រូតេអ៊ីនមានតួនាទីក្នុងការបង្កើតសាច់ដុំ និងកាត់បន្ថយទម្ងន់។ ដំណើបខ្មៅមានផ្ទុកប្រូតេអ៊ីនច្រើនជាងគ្រាប់ធញ្ញជាតិដទៃៗទៀត។ ក្នុងដំណើបខ្មៅ ១០០ ក្រាមមានផ្ទុកប្រូតេអ៊ីន ៨,៥ ក្រាម ខណៈអង្ករសម្រូប និងអង្ករក្រហម ១០០ ក្រាមមានប្រូតេអ៊ីនតែ ៧-៨ ក្រាមទេ។ ឯ អង្ករសម្រិត ១០០ ក្រាម មានប្រូតេអ៊ីនត្រឹមតែ ៦,៨ ក្រាមប៉ុណ្ណោះ។
សរុបទៅដំណើងខ្មៅជួយសុខភាពយើងច្រើនយ៉ាង។ វាការពារការទល់លាម ជួយរក្សាទម្ងន់រាងកាយ បន្ថយហានិភ័យនៃការកើតជំងឺទឹកនោមផ្អែម ជំងឺបេះដូង និងមហារីកមួយចំនួន។ វាក៏ជួយរាងកាយបន្សាបជាតិពុល និងរក្សាម៉ាសសាច់ដុំដែរ។ ដោយសារយើងនិយមយកដំណើបខ្មៅធ្វើជាបង្អែម យើងត្រូវប្រយ័ត្នបរិមាណស្ករនៅក្នុងបង្អែមទាំងនោះផង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក យល់ដឹង និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
