បទចម្រៀងលើកទឹកចិត្ត តារាខ្មែរប៉ុន្មានបទនេះ បង្កប់អត្ថន័យអប់រំ ស្ដាប់ហើយ ក្លាយជាមនុស្សរឹងមាំ (មានចម្រៀង)

តារាកម្សាន្ត៖ អាចនិយាយបានថា បទចម្រៀងមិនថាជាចង្វាក់ប្រភេទបែបណាក៏ដោយ វាក៏ជាផ្នែកមួយដែរ ដែលអាចជួយកំដរអារម្មណ៍មនុស្សគ្រប់គ្នាឲ្យមានអារម្មណ៍ល្អនៅពេលដែលបានចាក់ស្ដាប់។ ហើយក្នុងនោះទៀតសោត បទចម្រៀងនីមួយៗ អ្នកនិពន្ធក៏ដូចជាអ្នកចម្រៀងក៏បានសម្រិតសម្រាំងស្នាដៃរបស់ខ្លួនយ៉ាងយកចិត្តទុកដាក់ ដើម្បីឲ្យបទចម្រៀងនោះចេញមកមានអ្នកពេញចិត្តច្រើន។

ហើយបើក្រឡេកមកមើល វិស័យចម្រៀងសម័យក្នុងប្រទេសយើងនាពេលបច្ចុប្បន្ននេះ យើងឃើញថា ពីមួយថ្ងៃទៅមួយថ្ងៃ កាន់តែជឿនលឿនទៅៗ និងមានអ្នកនិពន្ធសម្បូរទេពកោសល្យជាច្រើនបានផលិតបទចម្រៀងល្អ ក្នុងន័យស្នេហាខ្លះ និងក្នុងន័យអប់រំលើកទឹកចិត្តក៏មាន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាពិសេស បទចម្រៀងពីរោះៗរបស់តារាល្បីៗមួយចំនួនដូចខាងក្រោមនេះ សុទ្ធសឹងតែជាបទទទួលបានការគាំទ្រច្រើន ព្រោះអ្នកនិពន្ធបានបង្កប់នូវអត្ថន័យល្អៗ មានការអប់រំជាច្រើន។ ពិសេសជឿជាក់ថានឹងអាចជាកម្លាំងចិត្ត និងជួយលើកទឹកចិត្ដដល់អ្នកដែលកំពុងមានវបត្តិផ្លូវចិត្ត ពេលបានស្ដាប់ហើយ អាចនឹងរឹងមាំតស៊ូជាមួយបញ្ហាដែលកើតមានបានផងដែរ៕

១.បទ «អ្នកមិនអន់ទេ»

ច្រៀងដោយតារាចម្រៀងកញ្ញា ឈីន រតនៈ និពន្ធដោយ ទ្រី សក្កដា។ បទនេះចង់ឲ្យមនុស្សមួយចំនួនកុំទន់ជ្រាយក្នុងរឿងស្នេហា និងរឿងជីវិត។ ទោះបីជាគេបោះបង់យើងចោលពិតមែន តែខ្លួនយើងផ្ទាល់មិនត្រូវបោះបង់ខ្លួនឯងនោះទេ។ ត្រូវធ្វើខ្លួនឲ្យរឹងមាំ ទើបអ្នកដែលបោះបង់យើង មើលមកឃើញថាយើងក៏អាចរស់នៅដោយគ្មានគេបាន។

២.បទ «បន្តិចទៀតលែងអីហើយ»

បទនេះច្រៀងដោយកញ្ញា អ៊ីវ៉ា និពន្ធដោយ ដេវិនស៊ី។ ហើយបទនេះក៏មានពាក្យពេចន៍ជម្រុញចិត្តជាច្រើនសម្រាប់ឲ្យគ្រប់គ្នាចេះរឹងមាំ ចេះដោះស្រាយបញ្ហាដែលជួបប្រទះ ទោះលំបាកប៉ុណ្ណាក៏ត្រូវតស៊ូឲ្យដល់ទីបញ្ចប់។

៣.បទ​ «ខ្ញុំជឿ»

ច្រៀងដោយ តន់ ច័ន្ទសីម៉ា និពន្ធដោយ វី លាងជី។ បទដងស្រង់ចេញពីរឿង «ខ្ញុំជឿ» ដែលរៀបរាប់ពីការផ្ដល់កម្លាំងចិត្តដល់ខ្លួនឯង ទោះជានៅក្នុងស្ថានភាពណាក៏ដោយ ទោះគ្មានអ្នកផ្ដល់កម្លាំងចិត្តដល់យើងក៏ដោយ តែយើងត្រូវជឿជាក់លើខ្លួនឯង។

៤.បទ «រយលានសង្ឃឹម»

ច្រៀងដោយតារាចម្រៀងហង្សមាសចម្រុះ។ ដែលបទនេះក៏បង្កប់អត្ថន័យអប់រំច្រើនស្ទើរតែពេញមួយបទតែម្ដង។

៥.បទ «ម្នាក់ឯងមិនស្លាប់ទេ»

បទនេះច្រៀងដោយ មាស សុខសោភា និងនិពន្ធដោយ Noly។ ហើយក៏ទទួលបានការគាំទ្រ ត្រូវចិត្តមិត្តយុវវ័យបច្ចុប្បន្នច្រើន ព្រោះវាបង្កើតជាអត្ថន័យលើកទឹកចិត្តក្នុងរឿងស្នេហា។ ទោះជាគ្មានអ្នកណាស្រលាញ់យើងក៏យើងអាចរស់បាន។ រស់នៅម្នាក់ឯងទោះឯកា ក៏ប្រសើរជាងរស់នៅមានគ្នា តែគេមិនបានស្មោះត្រង់នឹងយើង។

៦.បទ «ក្រោកឈរ» និងបទ «រស់ជាខ្លួនឯង»

ជាសំនៀងរបស់កំពូលតារាចម្រៀង សុគន្ធកញ្ញា។ ដែលបទទាំងពីរនេះ និពន្ធដោយលោក សុខ ចាន់ផល និងបានបង្កប់នូវអត្ថន័យអប់រំខ្លាំង និងទទួលបានការកោតសរសើរពីមហាជនខ្លាំងដូចគ្នា។ បទនេះចង់ឲ្យមនុស្សគ្រប់គ្នា រៀនស្គាល់ពីសមត្ថភាពខ្លួនឯង កុំឃើញគេធ្វើអ្វីក៏ទៅធ្វើតាមគេទាំងដែលមិនមែនជាក្ដីស្រមៃរបស់ខ្លួន។

អត្ថបទនេះ ខ្មែរឡូតសូមធ្វើការរក្សាសិទ្ធិ

• មាស សុខសោភា
• ឱក សុគន្ធកញ្ញា
• ឈីន រតនៈ
• អ៊ីវ៉ា
• តន់ ច័ន្ទសីម៉ា
• ចម្រៀង
• វីដេអូ
• តារាខ្មែរ