អភិបាលខេត្តព្រះវិហារ បានចូលរួមរំលែកទុក្ខចំពោះមរណភាពឪពុកម្តាយ កញ្ញា សុវត្ថិឌី ធារិកា

ភ្នំពេញ៖ យោងតាមផេកមានឈ្មោះ កូន អ្នកព្រះវិហារ នៅរសៀលថ្ងៃទី ១៨ ខែឧសភាឆ្នាំ ២០២២ នេះ​ បានរាយការណ៍មកថា ឯកឧត្ដម ប្រាក់ សុវណ្ណ អភិបាលខេត្តព្រះវិហារ បានដឹកនាំសហការី ចូលរួមរំលែកទុក្ខចំពោះមរណភាពឪពុកម្តាយ កញ្ញា សុវត្ថិឌី ធារិកា ក្នុងឧបទ្ទវហេតុគ្រោះថ្នាក់ចរាចរណ៍នៅស្រុកឆែប។

តាមរយៈប្រភពដដែលបានបន្តទៀតថា អភិបាលខេត្តព្រះវិហារ និងលោកជំទាវ ស ចេង អមដំណើរដោយលោក​ សំ​ លាងទ្រី​ ប្រធានមន្ទីរសាធារណការនិងដឹកជញ្ជូនខេត្តព្រះវិហារ​ និងថ្នាក់ដឹកនាំខេត្តជាច្រេីនរូបទៀត​ បានអញ្ជេីញចូលរួមរំលែកទុក្ខដ៏សែនក្រៀមក្រំបំផុត ចំពោះគ្រួសារ កញ្ញា សុវត្ថិឌី ធារិកា ដែលលោកឳពុក អ្នកម្ដាយរបស់កញ្ញា បានទទួលមរណភាព​ ដោយឧប្បទ្ទវហេតុគ្រោះថ្នាក់ចរាចរណ៍នៅខេត្តព្រះវិហារ កាលពីរសៀលថ្ងៃទី១៧ ខែឧសភា ឆ្នាំ២០២២។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

នៅក្នុងឱកាសដ៍សែនក្រៀមក្រំនេះផងដែរ ឯកឧត្ដម អភិបាលខេត្ត និងលោកជំទាវ បានសម្ដែងនូវការសោកស្ដាយជាពន់ពេកចំពោះការបាត់បង់ឳពុក​ ម្ដាយ​ ជាទីស្រឡាញ់​ ដែលតែងអប់រំទូន្មានប្រៀនប្រដៅកូនចៅ ឱ្យដើរតាមគន្លងធម៌ ក្លាយជាកុលបុត្រ​ កុលធីតា​ល្អ​ សម្រាប់សង្គមជាតិទៀតផង។

បន្ថែមពីនេះ ជាពិសេស កញ្ញា សុវត្ថិឌី ធារិកា កន្លងមកតែងបានលះបង់អស់កម្លាំងកាយ កម្លាំងចិត្ត ចូលរួមចំណែកក្នុងការផ្សព្វផ្សាយលើកស្ទួយវិស័យវប្បធម៌ ទេសចរណ៍ តាមរយៈបទចម្រៀងជាច្រើនដែលរៀបរាប់​ បរិយាយអំពីតំបន់សក្តានុពល វប្បធម៌ ទេសចរណ៍ សំខាន់ៗ ដែលមានក្នុងខេត្តព្រះវិហារ។

ជាមួយគ្នានេះដែរ ឯកឧត្ដម អភិបាលខេត្ តនិងលោកជំទាវ ព្រមទាំងសហការី ដែលបានចូលរួម ក៏បានចូលរួមបច្ច័យបុណ្យសព ចំនួន ១០ លានរៀលផងដែរ៕

ប្រភព៖ កូន អ្នកព្រះវិហារ

សូមទស្សនារូបភាពខាងក្រោម៖

• សុវត្ថិឌី ធារិកា
• តារាខ្មែរ