បើឃើញកូនៗញៀ»នទូរស័ព្ទខ្លាំងពេក ឪពុកម្ដាយគួរប្រើវិធីសាស្ត្រទាំងនេះដើម្បីទប់ស្កាត់ជាបន្ទាន់

យល់ដឹង៖ នាសត្សវត្សរ៍ទី២១នេះ យើងអាចនិយាយបានថាវាជាយុគសម័យឌីជីថល ព្រោះមានការរីកចម្រើនលើផ្នែកបច្ចេកវិទ្យាខ្លាំងសម្បើមណាស់។ កាលពីមុន ទូរស័ព្ទមានតែមនុស្សធំទេជាអ្នកប្រើប្រាស់ដើម្បីទំនាក់ទំនងការងារ ប៉ុន្តែឥឡូវនេះ យើងឃើញថាមានក្មេងៗតូចៗជាច្រើន ដែលមានទូរស័ព្ទប្រើប្រាស់ផ្ទាល់ខ្លួន ឬឪពុកម្ដាយបើកសិទ្ធិសេរីឲ្យកូនៗតូចរបស់ខ្លួនប្រើប្រាស់ផងដែរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

យ៉ាងណាមិញ ការចំណាយពេលលេងទូរស័ព្ទច្រើនហួសហេតុពេកធ្វើឲ្យក្មេងៗទៅជាញៀន អត់ទូរស័ព្ទមិនបាន ដល់ថ្នាក់ក្មេងខ្លះសុខចិត្តអត់បាយអត់ទឹកឲ្យតែបានទូរស័ព្ទលេង ដែលចំណុចត្រង់នេះពិតជាគ្រោះថ្នាក់ណាស់ ព្រោះក្មេងៗតូចៗស្ថិតក្នុងវ័យកំពុងលូតលាស់គឺត្រូវការឲ្យមានការចិញ្ចឹមបីបាច់យ៉ាងត្រឹមត្រូវ។​

ដូច្នេះ បើឪពុកម្ដាយយល់ថាកូនៗរបស់ខ្លួនញៀនលេងទូរស័ព្ទហួសហេតុពេក នេះគឺជាវិធីសាស្ត្រមួយចំ​នួនដើម្បីបញ្ឈប់ពួកគេ៖

១. ត្រូវចេះយកកូនចេញទៅលេងនៅខាងក្រៅ

កុមារខ្លះដែលឪពុកម្ដាយរវល់ការងារខ្លាំង មិនសូវមានពេលលេងជាមួយ តែងតែចំណាយពេលស្នាក់នៅក្នុងផ្ទះជារឿយៗ និងមិនសូវបានចេញទៅលេងនៅខាងក្រៅដែលយូរៗទៅ ពួកគេក៏ចាប់ផ្ដើមស្វែងរកការកម្សាន្តតាមទូរស័ព្ទវិញ។ ដូច្នេះដើម្បីទប់ស្កាត់កុំឲ្យពួកគេញៀននឹងទូរស័ព្ទនោះ អ្នកជាឪពុកម្ដាយត្រូវនាំកូនទៅដើរលេងខាងក្រៅឲ្យបានច្រើន មិនថាតាមសួនច្បារ សួនកុមារ ឬកន្លែងធម្មជាតិ កន្លែងលំហែជាច្រើនទៀតផងដែរ ដើម្បីបើកឱកាសឲ្យពួកគេបានស្វែងយល់ពីមជ្ឍដ្ឋានជុំវិញខ្លួន។

​២. ត្រូវកំណត់ថេរវេលានៃការប្រើប្រាស់

បើសិនជាអ្នកទម្លាប់ឲ្យកូនៗរបស់អ្នកកាន់ទូរស័ព្ទហើយនោះ គឺត្រូវព្យាយាមកំណត់ពេលវេលានៃការប្រើប្រាស់ប្រចាំថ្ងៃរបស់ពួកគេវិញ ដូចជាចង់ឲ្យពួកគេប្រើប្រាស់ពេលណា? មុនចូលគេង? ពេលធ្វើលំហាត់រួច? ឬក្រោយបាយរួច? ហើយតើការប្រើប្រាស់ម្ដងៗមានរយៈពេលប៉ុន្មាន? ១៥នាទី? ៣០នាទី? ឬ១ម៉ោង? បន្ទាប់ពីគ្រប់ថេរវេលានោះហើយគឺ អ្នកត្រូវដកទូរស័ព្ទពីដៃពួកគេទុកតែម្ដង។

៣. ដាក់លេខសម្ងាត់ក្នុងទូរស័ព្ទ

នេះក៏ជាវិធីងាយៗដើម្បីការពារកូនអ្នកកុំឲ្យលេងទូរស័ព្ទច្រើនពេក។ អ្នកគ្រាន់តែដាក់លេខកូដសម្ងាត់ក្នុងទូរស័ព្ទអ្នក នៅពេលណាដែលអ្នក​មិននៅផ្ទះ ឬរវល់នឹងកិច្ចការអ្វីមួយ។

​៤. ធ្វើជាគម្រូល្អដល់កូនៗ

កុមារស្ថិតក្នុងវ័យចង់ដឹងចង់ឮ និងតែងតែធ្វើត្រាប់តាមមនុស្សជុំវិញខ្លួន។ ដើម្បីធ្វើជាគម្រូល្អដល់កូន អ្នកមិនគួរចំណាយពេលឆែកទូរស័ព្ទយូរពេកទេ ឬឆែកវាតែពេលនៅខាងក្រោយខ្នងកូនៗដើម្បីកុំឲ្យពួកគេយកគម្រូតាម។​

៥. រៀនស្និទ្ធស្នាលជាមួយកូនឲ្យបានច្រើន

ទោះជាឪពុកម្ដាយមានពេលរវល់ខ្លាំងយ៉ាងណាក៏ដោយ ក៏គួររំលែកពេលវេលាមកបង្កើតភាពស្និទ្ធស្នាលជាមួយកូនៗ។ អ្នកគួរនាំកូនលេងឲ្យបានច្រើន ឬធ្វើកិច្ចការក្នុងផ្ទះដូចជាស្រោចដំណាំឬចំអិនអាហារជាដើម នោះកូនៗរបស់អ្នកនឹងមិនឯកា។ អ្នកក៏ត្រូវលើកទឹកចិត្តឲ្យកូនចេះមានចំណង់ចំណូលចិត្តក្រៅពីការលេងទូរស័ព្ទ មិនថាការផាត់ពណ៌ ជិះកង់ លេងបាល់ជាដើម៕  

ប្រភព៖: parentcircle

• ជីវិត
• មេរៀនជីវិត
• ទូរសព្ទ