និទ្ទេសនៃការប្រឡងសញ្ញាបត្រមធ្យមសិក្សាទុតិយភូមិ ជាអ្នកកំណត់ជោគវាសនារបស់យើងមែនទេ?

យល់ដឹង៖ ខំរៀនរយៈពេល១២ឆ្នាំ ពិតណាស់ថាសិស្សថ្នាក់ទី១២ ទាំងអស់បានដាក់គោលដៅ ឬប៉ងចង់បាននិទ្ទេសល្អក្នុងការប្រឡងបាក់ឌុប ឬសញ្ញាបត្រមធ្យមសិក្សាទុតិយភូមិ។ អ្នកខ្លះប៉ងចង់បាននិទ្ទេស A និទ្ទេស B C D ឬឱ្យតែបានជាប់ក៏សប្បាយចិត្តណាស់ទៅហើយ។ គោលដៅម្នាក់ៗ មិនដូចគ្នាទេ អ្នកណាថាមិនចង់បាននិទ្ទេសល្អ គ្រាន់តែថាមនុស្សម្នាក់ៗមានសមត្ថភាពខុសគ្នា ចំណូលចិត្តផ្សេងគ្នា ចឹងហើយពិតណាស់ថា ការរំពឹងទុកលើលទ្ធផលក៏អាចខុសគ្នាដែរ។

ចំពោះសិស្សដែលបានដាក់គោលដៅតាំងពីដើមឆ្នាំមកថា ត្រូវយកនិទ្ទេស A ប្រាកដណាស់ថាពួកគាត់បានចំណាយពេលវេលាជាច្រើនក្នុងការសិក្សារៀនសូត្រ រៀនបន្ថែម និងស្វែងរកវិធីស្វ័យសិក្សាជាដើម។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ការតាំងចិត្ត និងការខិតខំប្រឹងប្រែង ស្វះស្វែង យកចិត្តទុកដាក់រៀន សង្ឃឹមថានឹងអាចសម្រេចបានគោលដៅរបស់ខ្លួន។ អបអរសាទរប្រសិនសម្រេចបានលទ្ធផលដែលបានគ្រោងទុកនោះ ។ តែប្រសិនបើមិនបានសម្រេចលទ្ធផលដូចដែរបានប៉ងទុកទេ ក៏កុំបាក់ទឹកចិត្ត ត្រូវចាំថាយើងបានខិតខំអស់ពីសមត្ថភាពហើយ ទោះលទ្ធផលបែបណា ត្រូវមានមោទកភាពចំពោះខ្លួនឯង ដែលសម្រេចបានលទ្ធផលនោះ។

វាពិតណាស់ថា និទ្ទេសល្អនោះ ជាភាពជោគជ័យមួយដ៏ធំក្នុងជីវិតសិក្សា ភាពជោគជ័យដែលសង្គមស្ញើចសរសើរ ដែលអាចលើកកិត្តិយសយើង និងក្រុមគ្រួសារ ហើយអាចជួយសម្រួលបន្ទុកមួយចំនួនតាមរយៈអាហារូបករណ៍ដែលផ្តល់ឱ្យថែមទៀត។

តែការមិនទទួលបាននិទ្ទេសល្អ មិនបានកំណត់ថាយើងបរាជ័យនោះទេ។ ការបញ្ចប់សញ្ញាបត្រមធ្យមសិក្សាទុតិយភូមិមិនមែនជាចុងបញ្ចប់ក្នុងដំណើរនៃការអប់រំនោះឡើយ។ យើងនៅមានឱកាសច្រើនណាស់ក្នុងការខិតខំប្រឹងប្រែងបន្តទៀត ដូចជាការទទួលបានលទ្ធផលល្អក្នុងសកលវិទ្យាល័យ ការប្រឡងប្រជែងចំណេះដឹងឬសមត្ថភាពនានា ការប្រឡងយកអាហារូបករណ៍ក្នុងស្រុក ឬ ទៅបរទេស ស្វែងរកបទពិសោធន៍ថ្មីៗ មកបំពេញចន្លោះខ្វះខាតនៃជីវិតមួយនេះ ហើយអភិវឌ្ឍខ្លួនឯងឱ្យបានប្រសើរជាង។

គួរមានមោទកភាពចំពោះខ្លួនឯងដែលអាចខិតខំអស់ពីសមត្ថភាព ដែលចំណាយពេលវេលាឱ្យមានតម្លៃបំផុត ទោះមិនទទួលបានលទ្ធផលល្អក៏ដោយ ក៏យើងបានក្រេបយកចំណេះដឹងទាំងអស់នោះទុកជាប្រយោជន៍ក្នុងដំណើរនៃការសិក្សាបន្ត និងជាប្រយោជន៍ក្នុងការរស់នៅក្នុងសង្គម។

ចំពោះសិស្សដែលមិនបានប្រឡងជាប់សញ្ញាបត្រមធ្យមសិក្សាទុតិយភូមិ មិនត្រូវអស់សង្ឃឹមនោះទេ កាន់តែមិនត្រូវបោះបង់ចោលជាដាច់ខាត។ ជាប់ឬធ្លាក់មិនមែនមានន័យថាយើងអស់ផ្លូវដើរនោះទេ ដរាបណាយើងនៅមានឱកាស ក្តីសង្ឃឹមនៅតែមាន។

បរាជ័យក្នុងការប្រឡងមិនមានន័យថា បរាជ័យក្នុងជីវិតនោះទេ សំខាន់មិនត្រូវបាក់ទឹកចិត្ត ហើយត្រូវខិតខំបន្ថែមទៀត។

ទោះបីធ្លាក់បាក់ឌុបក៏ពិតមែន ប៉ុន្តែយើងនៅតែអាចស្វែងរកឱកាសផ្សេងៗទៀតបាន ដូចជា ការចាប់យកឯកទេសឬជំនាញណាមួយ ក្នុងរយៈពេលខ្លី ការរៀនបរិញ្ញាបត្ររង ហើយអាចស្នើសុំឈ្មោះស្វ័យរិនដើម្បីប្រឡងនៅឆ្នាំក្រោយ ឬក៏អាចរៀនមួយឆ្នាំទៀតក៏បាន។ ដូច្នេះហើយ ត្រូវបន្តក្តីសង្ឃឹម ហើយខិតខំប្រឹងប្រែងក្នុងគោលដៅជីវិតបន្តទៅទៀត។ 

អត្ថបទដោយ៖ Sofia