ស្រឡាញ់នរណាម្នាក់ត្រូវយកគេឱ្យបានមែនទេ?

ស្នេហា៖ ពេលស្រឡាញ់នរណាម្នាក់ច្បាស់ណាស់ថាយើងចង់បានម្នាក់នោះមកធ្វើជាគូអនាគត ប្រាកដណាស់ថាយើងចង់ឱ្យគេក៏មានចិត្តមកលើយើងដែរ។ ប៉ុន្តែមិនមែនគ្រប់គ្នាសុទ្ធតែអាចមានឱកាសស្រឡាញ់មនុស្សម្នាក់ ហើយសំណាងបានគេមកស្រឡាញ់យើងវិញនោះទេ។

ជីវិតពោរពេញទៅដោយការខកចិត្ត វាសនាមិនមែនយើងអាចកំណត់បានគ្រប់រឿងទេ វាច្បាស់ណាស់ថាមានរឿងខ្លះនឹងមិនបានដូចចិត្តដែលយើងប៉ង។ ស្នេហាក៏ដូច្នេះដែរ មិនប្រាកដថាមនុស្សដែលយើងមានចិត្តលើ សុទ្ធតែអាចនឹងមានចិត្តលើយើងវិញរហូតទេ ហើយកាន់តែមិនអាចបង្ខំគេឱ្យមកស្រឡាញ់យើងវិញនោះដែរ។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

មនុស្សម្នាក់ៗមានចំណូលចិត្តផ្សេងគ្នា រសនិយមខុសគ្នា ហើយការជ្រើសរើសគូស្រករក៏ប្រាកដជាមើលទៅលើបុគ្គលិកលក្ខណៈ ឬគុណសម្បត្តិខុសៗទៅទៀត។ មិនប្រាកដថា ឱ្យតែយើងជាមនុស្សល្អ ឱ្យតែយើងផ្តល់ក្តីស្រឡាញ់ឱ្យគេ វាសុទ្ធតែអាចទាក់ទាញចិត្តរបស់គេបាននោះឡើយ។

ក្តីស្រឡាញ់កើតឡើងដោយអារម្មណ៍មនោសច្ចេតនាដែលមិនអាចបង្ខំបាន ហើយក្តីស្រឡាញ់គួរតែកើតឡើងអមជាមួយនឹងការគោរព ក្តីអាណិត និងការឱ្យតម្លៃ។ ក្តីស្រឡាញ់ មិនគួរជាអារម្មណ៍ដែលធ្វើឱ្យដៃគូម្ខាងណា ឬនរណាម្នាក់មានអារម្មណ៍ថាមានសម្ពាធ ឬអារម្មណ៍ខ្លាចរអានោះទេ។

កាលដែលស្រឡាញ់នរណាម្នាក់ យើងប្រាកដជាចង់ឱ្យគេមានក្តីសុខ ចុះបើក្តីសុខរបស់គេមិនមែនជាការបាននៅជាមួយយើងនោះ តើយើងនៅចង់បង្ខំចិត្តទាមទារក្តីស្រឡាញ់ពីគេនោះទៀតទេ?យើងមិនខុសទេបើគ្រាន់តែស្រឡាញ់គេ តែយើងនឹងខុស ប្រសិនបើយើងធ្វើឱ្យក្តីស្រឡាញ់របស់យើងក្លាយជាសម្ពាធក្នុងជីវិតរបស់គេ។

ទោះបីជាយ៉ាងណាក៏ដោយ ត្រូវចាំថា កាលដែលត្រូវគេបដិសេធ ឬការដែលទំនាក់ទំនងស្នេហាមួយបរាជ័យមិនមែនមានន័យថា យើងជាមនុស្សគ្មានតម្លៃ ឬជាមនុស្សដែលមិនល្អគ្រប់គ្រាន់សម្រាប់គេនោះដែរ។ រៀនទទួលស្គាល់ការពិត ថាស្នេហាគឺពិតជារឿងមិនអាចបង្ខំបានពិតមែន ព្រោះវាត្រូវការឱ្យមនុស្សពីរនាក់មានអារម្មណ៍ដូចគ្នា ដូច្នេះហើយការខិតខំប្រឹងប្រែងតែម្ខាង មិនអាចធ្វើឱ្យទំនាក់ទំនងស្នេហាមួយដើរទៅមុខបានឡើយ។

កុំបន្ទោសខ្លួនឯងដែលមិនអាចធ្វើឱ្យគេស្រឡាញ់យើង កុំបន្ទោសអ្នកដទៃដែលគេមើលមិនឃើញក្តីស្រឡាញ់របស់យើង តែគួរអភ័យទោសឱ្យខ្លួនឯង គួរស្រឡាញ់ខ្លួនឯងឱ្យបានច្រើន និងស្វែងរកអ្វីដែលល្អបំផុតឱ្យជីវិតមួយនេះ។ក្តីស្រឡាញ់ពិតប្រាកដ គួរតែជាអារម្មណ៍ដែល ចង់ឱ្យមនុស្សដែលខ្លួនស្រឡាញ់មានក្តីសុខ គួរតែជាអារម្មណ៍ដែលចង់ឃើញគេបានជោគជ័យ និងមានសុភមង្គល ទោះបីជាអ្នកដែលធ្វើឱ្យគេមានសុភមង្គលនោះមិនមែនជាយើងក៏ដោយ។

អត្ថបទដោយ៖ Sofia