ថ្ងៃនៃសេចក្ដីស្រឡាញ់ - ត្រូវមានភាពឈ្លាសវៃ និងក្រើនរំលឹកខ្លួនឯង
បច្ចុប្បន្ននេះ ថ្ងៃនៃសេចក្ដីស្រឡាញ់(Valentine’s Day) ត្រូវបានប្រារព្ធធ្វើឡើង ដោយយុវវ័យជាច្រើន ដោយចាត់ទុកថា ជាថ្ងៃមួយដ៏រីករាយ សម្រាប់ការដើរលេងកម្សាន្តនៅខាងក្រៅជាមួយមិត្តភក្ដិ និងអ្នកជាទីស្រឡាញ់របស់ខ្លួន។
ប៉ុន្តែ តើពាក្យថា សេចក្ដីស្រឡាញ់មានអត្ថន័យយ៉ាងណា? យុវវ័យមួយចំនួនយល់ច្រឡំថា សេចក្ដីស្រឡាញ់ គឺជាការរួមភេទលើកដំបូង ជាមួយមិត្តប្រុស ឬមិត្តស្រីរបស់ពួកគេ នៅថ្ងៃនៃសេចក្ដីស្រឡាញ់ ដើម្បីបញ្ជាក់ថា ពួកគេពិតជាស្រឡាញ់គ្នាមែន។ ប៉ុន្តែតើនេះជាសេចក្ដីស្រលាញ់ពិតប្រាកដមែនទេ?
ខាងក្រោមនេះ គឺជារឿងរាវរបស់នារីម្នាក់ដែលមានវិប្បដិសារីនៅថ្ងៃនៃសេចក្តីស្រឡាញ់។
ស្រីល័ក្ស (មិនមែនជាឈ្មោះពិតរបស់នាង) គឺជាយុវនារីម្នាក់ ដែលបានទូរស័ព្ទមកកាន់ ប្រព័ន្ធទូរស័ព្ទផ្តល់ប្រឹក្សារ អំពីជម្រើសនៅពេលមានផ្ទៃពោះ និងពន្យារកំណើត របស់ អង្គការម៉ារីស្តូបអន្តរជាតិកម្ពុជា (Marie Stopes International Cambodia’s Hotline) ហើយនាងចង់ចែករំលែករឿងរ៉ាវ ក្នុងថ្ងៃនៃសេចក្ដីស្រឡាញ់របស់ នាងជាមួយលោកអ្នកដើម្បីជៀសវាង កុំឲ្យមានជោគវាសនាដូចជារូបនាង។
“នាងខ្ញុំឈ្មោះស្រីល័ក្ស។ ខ្ញុំចង់ប្រាប់ពីបទពិសោធន៍អតីតកាលរបស់នាងខ្ញុំទាក់ទិននឹងថ្ងៃនៃសេចក្ដីស្រឡាញ់ ដល់អ្នកទាំងអស់គ្នា។ នាងខ្ញុំបានផ្លាស់ពីខេត្តកំពង់ស្ពឺមករស់នៅក្រុងភ្នំពេញកាលពីឆ្នាំ២០០៩។ ឪពុកម្ដាយរបស់ នាងខ្ញុំបានខិតខំធ្វើការយ៉ាងលំបាកលំបិនដើម្បីសន្សំប្រាក់សម្រាប់នាងខ្ញុំមកភ្នំពេញ ដើម្បីសិក្សាផ្នែកហិរញ្ញវត្ថុ នៅមហាវិទ្យាល័យមួយ។ អ្នករាល់គ្នាចាត់ទុកជាខ្ញុំជានារី ដែលមានសម្រស់ស្រស់ស្អាតមួយរូបដែលមានកែវភ្នែកធំៗពណ៌ត្នោត និងសក់វែងរលើបរលោង។ ពួកគេប្រាប់នាងខ្ញុំថា នាងខ្ញុំមើលទៅដូច សុគន្ធ នីហ្សា។ នាងខ្ញុំមាន ប្រជាប្រិយភាពក្នុងចំណោមនិស្សិតៗ ហើយនាងខ្ញុំមានមិត្តភក្ដិជាច្រើន។ នាងខ្ញុំក៏មានមិត្តប្រុសម្នាក់ ដែលជានិស្សិតនៅសកលវិទ្យាល័យជាមួយគ្នាផងដែរ។ នៅពេលមួយនោះ គាត់បានស្នើសុំនាងខ្ញុំ ដើម្បីរួមភេទ ជាមួយគាត់ ប៉ុន្តែគាត់ជាមនុស្សសុភាពរាបសារ ហើយរាល់ពេលដែលនាងខ្ញុំបដិសេធ គាត់មិនដែលបង្ខំនាងខ្ញុំទេ។
នៅថ្ងៃនៃសេចក្ដីស្រឡាញ់ឆ្នាំ២០១១ នាងខ្ញុំ រួមជាមួយមិត្តភក្ដិ និងមិត្តប្រុសរបស់ខ្ញុំ បានណាត់ជួបគ្នានៅផ្សារ ទំនើបសុរិយា ហើយបន្ទាប់មកពួកយើងជិះម៉ូតូដើរលេង និងឈប់នៅសួនច្បារដើម្បីអង្គុយជជែកគ្នាលេង។ បន្ទាប់មកពួកយើងនាំគ្នាទៅញ៉ាំស៊ុគីស៊ុបសម្រាប់អាហារពេលល្ងាច។ មិត្តប្រុសរបស់នាងខ្ញុំបានឈប់តាមផ្លូវ ដើម្បីទិញផ្កាកុលាបមួយទងឲ្យនាងខ្ញុំ។ ពួកយើងសប្បាយរីករាយយ៉ាងខ្លាំង លាយជាមួយនិងសំណើច និយាយកំប្លែង។ បន្ទាប់ពីញ៉ាំអាហារពេលល្ងាចរួច មិត្តភក្ដិរបស់នាងខ្ញុំបានត្រលប់ទៅផ្ទះ នៅសល់តែនាង ខ្ញុំនិងមិត្តប្រុសនាងខ្ញុំតែពីរនាក់ប៉ុណ្ណោះ។ មិត្តប្រុសរបស់នាងខ្ញុំបានប្រាប់នាងខ្ញុំថាគាត់ស្រឡាញ់នាងខ្ញុំ និងបានប្រគល់អំណោយមួយដល់នាងខ្ញុំ។ វាគឺជាខ្សែកពេជ្រមួយខ្សែ។ វាគឺជារបស់ដ៏ស្អាតបំផុតដែលនាងខ្ញុំមិនដែលធ្លាប់បានទទួលពីមុនមក។ មិនដែលមាននរណាធ្លាប់ឲ្យអំណោយដ៏ស្អាតបែបនេះដល់នាងខ្ញុំឡើយ។ ខ្ញុំបានអរគុណគាត់ម្រាប់អំណោយនេះ។ នោះគឺជាពេលដែលគាត់បានប្រាប់នាងខ្ញុំថា គាត់ចង់ឲ្យ ពួកយើងបញ្ជាក់នូវសេចក្ដីស្រឡាញ់របស់ពួកយើងចំពោះគ្នាដោយចំណាយពេលមួយយប់នៅឯផ្ទះសំណាក់។ នាងខ្ញុំមានអារម្មណ៍ភ័យខ្លាច ហើយមិនចង់ទៅនោះទេ។ ខ្ញុំបានប្រាប់គាត់ថា នាងខ្ញុំចង់រង់ចាំពេលពិសេសនេះ រហូតដល់ថ្ងៃដែលយើង រៀបការប៉ុន្តែគាត់បានប្រាប់វិញថា ពួកយើងស្រឡាញ់គ្នា ហើយថ្ងៃនេះ ជាថ្ងៃនៃ សេចក្ដីស្រឡាញ់។ នាងខ្ញុំបានព្យាយាមប្រកែក ប៉ុន្តែគាត់ក៏ខឹងនិងមិនសប្បាយចិត្ត ហើយគម្រាមចែក ផ្លូវគ្នាជាមួយនាងខ្ញុំ។ នាងខ្ញុំមិនចង់ចែកផ្លូវគ្នាទេ ខ្ញុំស្រឡាញ់គាត់។ ដូច្នេះនាងខ្ញុំក៏បានយល់ព្រមទៅផ្ទះសំណាក់ជាមួយគាត់ ហើយចំណាយពេលមួយយប់នៅនោះជាមួយគ្នា។
នាងខ្ញុំមិនចូលចិត្តរឿង ដែលគាត់បង្ខំខ្ញុំឲ្យទៅផ្ទះសំណាក់ជាមួយគាត់ ប៉ុន្តែនេះគឺជាសេចក្ដីស្នេហា តើមែនទេ? គាត់មិនដែលបង្ខំនាងខ្ញុំឲ្យធ្វើដូច្នេះម្ដងទៀតទេ ហើយនាងខ្ញុំក៏លែងគិតពីរឿងនេះតទៅទៀតដែរ។ អ្វីៗក៏បានបន្តដូចធម្មតាបន្ទាប់ពីយប់នោះមក។ នាងខ្ញុំបានបន្តការសិក្សារបស់នាងខ្ញុំ ហើយពួកយើង ជួនកាលបានជួបគ្នាញ៉ាំអាហារពេលល្ងាច ឬពេលខ្លះទៅមើលកុនឯរោងភាពយន្តលុច្ស។
មួយឬពីរខែបន្ទាប់ពីថ្ងៃនៃសេចក្ដីស្រឡាញ់មក នាងខ្ញុំចាប់ផ្ដើមបាត់រដូវ។ មានពេលខ្លះនាងខ្ញុំមានអារម្មណ៍ អស់កម្លាំង និងមិនស្រួលខ្លួន។ នាងខ្ញុំក៏ចាប់ផ្ដើមបារម្មណ៍។ មិត្តភក្ដិរបស់ខ្ញុំឲ្យយោបល់ថា គួរតែទៅឱសថស្ថាន ទិញឧបករណ៍ពិនិត្យទឹកនោមមើល ការមានផ្ទៃពោះ។ នៅពេលនោះហើយដែលខ្ញុំបានដឹងថាខ្ញុំមានផ្ទៃពោះ។ ខ្ញុំមិនបានដឹងអ្វីសោះទាក់ទិននឹងការមានផ្ទៃពោះ ឬការពន្យារកំណើត។ នាងខ្ញុំធ្លាប់បានឮពីស្រោមអនាម័យ Number ១ ប៉ុន្តែនៅពេលដែលខ្ញុំបានប្រាប់មិត្តប្រុសរបស់ខ្ញុំឲ្យប្រើវា កាលនៅឯផ្ទះសំណាក់នាថ្ងៃនៃសេចក្ដីស្រឡាញ់នោះ គាត់បានប្រាប់ខ្ញុំថា ប្រសិនបើពួកយើងពិតជាស្រឡាញ់គ្នាមែន ពួកយើងមិនចាំបាច់ប្រើស្រោមអនាម័យទេ ហើយប្រាប់នាងខ្ញុំឲ្យឈប់បារម្ភ និងគួរតែជឿគាត់ទៅ។ នាងខ្ញុំមានអារម្មណ៍ខ្មាស់អៀនខ្លាំងណាស់ដែល នាងខ្ញុំមិនទាន់រៀបការ តែបែរជាមានផ្ទៃពោះ។ នៅពេលដែលនាងខ្ញុំប្រាប់គាត់ ថានាងខ្ញុំមានផ្ទៃពោះ គាត់បែរជាខឹង។ គាត់និយាយថាគាត់លែងស្រឡាញ់នាងខ្ញុំទៀតហើយ គាត់មិនចង់បានកូនទេ ហើយថាគាត់ មិនអាចផ្គត់ផ្គង់នាងខ្ញុំបានទេ។ នៅពេលនោះ នាងខ្ញុំមានអារម្មណ៍ថាកណ្តោចកណ្តែងណាស់។ នាងខ្ញុំមិនដឹងថា ត្រូវធ្វើយ៉ាងណានោះទេ ខ្ញុំបានទៅឱសថស្ថានទិញថ្នាំដើម្បីរំលូតកូន។ ខ្ញុំទទួលព័ត៌មានមិនច្បាស់អំពី របៀបប្រើប្រាស់ថ្នាំ និងផលរំខាន។ បន្ទាប់ពីខ្ញុំបានលេបថ្នាំរួច វាបានធ្វើទុក្ខខ្ញុំយ៉ាងខ្លាំង មានធ្លាក់ឈាមខ្លាំង ជាច្រើនថ្ងៃ ព្រមទាំងក្ដៅខ្លួន និងឆ្លងមេរោគ។ នាងខ្ញុំបានដឹងពីប្រព័ន្ធទូរស័ព្ទផ្តល់ប្រឹក្សារអំពី ជម្រើសនៅពេលមានផ្ទៃពោះ និងពន្យារកំណើត របស់អង្គការម៉ារីស្តូប តាមរយៈមិត្តភក្ដិម្នាក់ ហើយក៏បានទូរស័ព្ទទៅកាន់ប្រព័ន្ធនោះដើម្បីឲ្យដឹងថានាងខ្ញុំគួរត្រូវធ្វើអ្វី។ អ្នកផ្តល់ប្រឹក្សាដែលប្រកប ដោយភាពរួសរាយរាក់ទាក់ បានប្រឹក្សាខ្ញុំតាមទូរស័ព្ទប្រាប់ពីទីកន្លែងដែលត្រូវទៅដើម្បីទទួលសេវា សុខភាពប្រកប ដោយសុវត្ថិភាព។ នៅពេលដែលនាងខ្ញុំបានទៅដល់មន្ទីរពេទ្យ ការឆ្លងមេរោគមានសភាពធ្ងន់ធ្ងរ រហូតដល់ធ្វើឲ្យនាងខ្ញុំ ចំណាយពេលមួយសប្ដាហ៍ស្នាក់នៅមន្ទីរពេទ្យ។ ចាប់តាំងពីពេលនោះមក នាងខ្ញុំមាន អារម្មណ៍ ខ្សោយយ៉ាងខ្លាំង និងពិបាកនឹងប្រមូលផ្ដុំអារម្មណ៍។ ដោយសារតែនាងខ្ញុំត្រូវចំណាយ ប្រាក់កាស ច្រើនសម្រាប់ការថែទាំសុខភាព នាងខ្ញុំមិនអាចបង់ថ្លៃសាលាបានទៀតទេ ដូច្នេះខ្ញុំក៏ត្រូវបោះបង់ចោលការសិក្សា។ ឥឡូវនេះនាងខ្ញុំមិនអាចបំពេញនូវសុបិន្តធ្វើការជាមន្ត្រីហិរញ្ញវត្ថុនៅធនាគារបានទេ។ បច្ចុប្បន្ននាងខ្ញុំត្រូវប្រឹងប្រែង ធ្វើការលក់គ្រឿងទេសក្នុងតូបតូចមួយនៅទល់មុខផ្ទះរបស់ឪពុកម្ដាយរបស់ខ្ញុំដើម្បីជួយទ្រទ្រង់ពួក គាត់ដែលពួកគាត់មានវ័យកាន់តែចាស់ទៅហើយ” នេះគឺជាការរៀបរាប់របស់ ស្រីល័ក្ស។
ស្រីល័ក្សមានដំបូន្មានបន្តិចបន្តួចជាចុងក្រោយទៅកាន់អ្នកអានថា៖ “នាងខ្ញុំចង់ចែករំលែករឿងរបស់ខ្ញុំជា មួយស្ត្រីកម្ពុជាផ្សេងទៀត ទុកជាមេរៀន ដើម្បីកុំឲ្យជីវិតរបស់អ្នកមានភាពលំបាកលំបិនដូចជារូបនាងខ្ញុំ និងដើម្បីឲ្យអ្នកសម្រេចបាននូវសុបិន្តរបស់ខ្លួន។ នាងខ្ញុំចង់ប្រាប់ដល់យុវតីទាំងអស់ថា ក្នុងជីវិតរបស់យើង អ្វីៗទាំងអស់មិនមែនសុទ្ធតែកើតឡើងតាមផែនការទេ ហើយអ្នកត្រូវតែត្រៀមខ្លួន ប្រសិនបើអ្វីៗនឹងមិនដំណើរការតាមផែនការនោះ។ ស្រ្តីកម្ពុជា គួរមានភាពរឹងមាំនិងមិនត្រូវឲ្យដៃគូរបស់ពួកគេបង្ខំឲ្យរួមភេទឡើយ។ បើសិនជាដៃគូរបស់អ្នកពិតជាស្រឡាញ់អ្នកមែន គេនឹងរង់ចាំពីព្រោះសេចក្ដីស្រឡាញ់ ពិតប្រាកដគឺអាចឲ្យ គាត់រង់ចាំបាន។ ប៉ុន្តែបើសិនអ្នកនិងដៃគូរបស់អ្នកគិតថាវាពិតជាពេលវេលាសមស្របសម្រាប់ការរួមភេទ អ្នកត្រូវច្បាស់ក្នុងចិត្តថាអ្នកបានត្រៀមខ្លួនការពារខ្លួនអ្នកកុំឲ្យមានផ្ទៃពោះដែលមិនចង់បាន និងជំងឺកាមរោគនានា។ ដើម្បីធ្វើខ្លួនជានារីឆ្លាត អ្នកត្រូវផ្ដល់អំណាចដល់ខ្លួនឯងដោយប្រាប់ខ្លួនឯងអំពីជម្រើសសុខភាពបន្តពូជ និងផ្លូវភេទរបស់អ្នក។ តាមរយៈវិធីនេះ អ្នកអាចការពារខ្លួនអ្នក និងរៀបចំផែនការសម្រាប់ អនាគតដ៏ភ្លឺស្វាង និងត្រចះត្រចង់។
នៅថ្ងៃទី១៤ ខែកុម្ភៈ ឆ្នាំ២០១២ ចាប់ពីម៉ោង៣រសៀល ដល់ម៉ោង៧យប់ ក្រុមស្ម័គ្រចិត្តយុវជនរបស់អង្គការម៉ារីស្តូប អន្តរជាតិកម្ពុជា និងចុះចែកខិតប័ណ្ឌអប់រំអំពី ការការពារ ពីការឆ្លងជំងឺ និងមេរោគអេដស៏ ជំងឺកាមរោគ និងការមានផ្ទៃពោះដោយចៃដន្យ និងលេខទូរស័ព្ទសំរាប់ផ្តល់ការប្រឹក្សាដោយឥតគិតថ្លៃអំពីបពា្ហទាំងអស់នេះ ដែលមានលេខ 090700 012 068 700 012 និង 097 767 09 05 នៅទីតាំងសំខាន់ៗដូចជា បរិវាណកោះពេជ្រ សាលាបាក់ទូក ផ្សារទំនើបសុវណ្ណា និងសូរិយា។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក ប្លែកៗ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
