បាតុភូតធម្មជាតិ ចម្លែកៗ មិនគួរឲ្យជឿទាំង ១០ នៅលើភពផែនដីយើងនេះ!

មនុស្សម្នាក់ៗតែងជឿថា អ្នកវិទ្យាសាស្រ្ត អាចធ្វើការការស្រាវជ្រាវ នូវចំណេះដឹង ទាក់ទងទៅនឹងបណ្តាបាតុភូតនៃផែនដី យ៉ាងទូលំទូលាយ បានគ្រប់សព្វ នឹងមានភាពត្រឹមត្រូវច្បាស់លាស់ថែមទៀតផង ពីព្រោះអ្នកណាៗ ក៏ជឿថាគ្មានអ្វីជាអាថ៌កំបាំងនោះទេ។

ហេតុនេះហើយ ថ្ងៃនេះយើងនឹងលើកយក បណ្តាបាតុភូតមួយចំនួន កើតឡើងលើភពផែនដីនេះ ដែលបានមកពីធម្មជាតិ មានលក្ខណៈកម្រ និងសឹងតែមិនគួរឲ្យជឿសោះឡើយ។ នេះអាចបញ្ជាក់ថា ផែនដីយើងនេះក៏ចម្លែក មិនធម្មតាដែរ។

ចង់ដឹងយ៉ាងណានោះ តោះទៅតាមដានទាំងអស់គ្នា!

# ដុំភ្លើង St. Elmo’s Fire

ជួនកាល នៅតាមកំពូលស្រួចៗនៃអាគារខ្ពស់ៗ ឬតាមទីកន្លែងដែលមានទីទួលខ្ពស់ មានបាតុភូត ដុំភ្លើងខ្មោចផុស (ghostly fires) ជាពិសេស នៅអំឡុងពេលមានព្យុះ។ ដុំភ្លើងនេះមានឈ្មោះថា St. Elmo's fire ដែលត្រូវបានគេហៅតាមលោក St. Erasmus of Formia ដែលជានាវិកបុព្វបុរសម្នាក់។ បាតុភូតនេះ ក៏ឃើញកើតមានតាមបណ្តានាវាលើសមុទ្រ នៅពេលមានព្យុះភ្លៀងផងដែរ ដែលគេជឿថា វាជាប្រផ្នូលល្អដល់អ្នកដំណើរ។ 

# ភ្នំភ្លើង និងគំនរព្រិល នៅតំបន់អង់តាក់ទិក

ភ្នំ Erebus ជាភ្នំភ្លើងខ្ពស់បំផុតទីពីរ ប្រចាំតំបន់អង់តាក់ទិក (បន្ទាប់ពីភ្នំ Sidley) និងជាភ្នំភ្លើងសកម្ម ភាគខាងត្បូង នៅលើភពផែនដីយើងនេះ តាំងពី ១.៣ លានឆ្នាំមុនមកម្ល៉េះ។ ភ្នំ Erebus នេះមានកំពស់ដល់ទៅ ៣,៧៩៤ ម៉ែត្រ មានទីតាំងស្ថិតនៅកោះ Ross ។ នៅទីនោះសំបូរទៅដោយ គំនរព្រិលខ្ពស់ៗ ដែលបានមកពីចំហាយកក កើតចេញពីស្នាមប្រេះ ជាច្រើន។ 

# Light Pillar

Light pillar (ឬអាចប្រែមកបានថាជា សសរនៃពន្លឺ) គឺជាបាតុភូតអុបទិកបរិយាកាស ដែលកើតមាន ពន្លឺបញ្ឈរជាច្រើនលេចឡើង ចេញពីប្រភពពន្លឺគោលមួយ។ បាតុភូតនៃពន្លឺនេះ ត្រូវបានបកស្រាយថា កើតឡើងដោយសារ មានចំណាំងផ្លាតពន្លឺ ពីដុំទឹកកកគ្រីស្ទាល់តូចៗ ដែលមាននៅក្នុងបរិយាកាស ឬមាននៅតាមពពក។ រីឯពន្លឺ បានមកពីព្រះអាទិត្យ និងព្រះច័ន្ទ ឬអាចបានពីពន្លឺភ្លើងអគ្គិសនីតាមដងផ្លូវផងដែរ។ 

# ព្រិលដូចស្ប៉ាហ្គេតទី នៅឯបឹង ក្នុងប្រទេសហ្វាំងឡង់

បឹង Suolijärvi ក្នុងទីក្រុង Hämeenlinna នៃប្រទេសហ្វាំងឡង់ ត្រូវបានបុរសម្នាក់ រាយការណ៍ថា ក្នុងបឹងហាក់ដូចជាមានសភាពសរសៃៗ មើលទៅដូចជាព្រិល ដោយគាត់បានថតរូបភាព ៤ សន្លឹកបង្ហាញ។ គាត់បានបន្តថា នៅពេលដែលគាត់យកដៃ ចាប់បារវាឡើងមក វាអាចធ្វើជាដុំព្រិលបាន។ សភាពព្រិល នៅក្នុងទឹក ដែលមានសភាពដូចជាស្ប៉ាហ្គេតទីនេះ អាចបង្កដោយចលនាខ្យល់ និងទឹក មុនពេលព្រិលធ្លាក់នោះរលាយ។ 

# Dacing Forest (ព្រៃរាំ)

ព្រៃរាំ ដែលគេតែងហៅថា Dancing Forest គឺជាព្រៃដើមស្រល់ ដែលមានដើមពត់ពែន ខុសពីដើមឈើធម្មតា។ ដើមឈើទាំងនោះ មានសភាពកោងបត់បែនជាច្រើនបែប ដូចជារង្វង់ចិញ្ចៀន រាងបេះដូង និងរាងដូចគូទខ្យងក៏មាន។ ព្រៃនេះ មានទីតាំងនៅតំបន់ Curonian Spit ក្នុង Kaliningrad Oblast ប្រទេសរុស្ស៊ី។ អ្នកវិទ្យាសាស្រ្តមិនអាចបកស្រាយ បាតុភូតនេះបាននៅឡើយទេ ប៉ុន្តែវាអាចបណ្តាលមកពី ហេតុផលមួយចំនួនដូចជា ប៉ារ៉ាសិត ឬខ្យល់ព្យុះ។ 

# ទឹកជោរពណ៌ក្រហម

Red tide ឬជំនោរទឹកពណ៌ក្រហម គឺជាឈ្មោះបាតុភូតមួយ ដែលស្លែពណ៌ក្រហមជាច្រើន មកប្រមូលផ្តុំគ្នា នៅនឹងផ្ទៃទឹក ឬគេនិយាយថាវាជាបាតុភូតម៉្យាងគឺ “Water blooming”។ ទឹកជោរឡើងពណ៌ក្រហមនេះ បង្កជាគ្រោះថ្នាក់ដល់ អ្នករស់នៅតំបន់សមុទ្រណាស់ ពីព្រោះតែ អុកស៊ីសែន ដែលមានក្នុងទឹកនោះនឹងថយចុះ រីឯអ៊ីដ្រូសែនស៊ុលផួ និងអាម៉ូញាក់ មានការកើនឡើង។ 

# ដុំភ្លើងពស់នាគរាជ

ដុំភ្លើងពស់នាគរាជ (ឬត្រូវបានគេហៅថា Naga fireballs ឬ Mekong lights) គឺជាបាតុភូតមួយ ដែលអ្នករស់នៅក្នុងប្រទេសថៃ តែងតែឃើញជាញឹកញាប់ នៅតាមដងទន្លេមេគង្គ។ ដុំភ្លើងភ្លឺៗ ដែលផុសឡើងទាំងនោះ អាចផុសឡើងពីទឹកបានរហូតដល់ទៅ ១៥ ម៉ែត្រ រួចក៏បាត់ស្រមោលក្នុងផ្ទៃអាកាសឈឹង។ បាតុភូតនេះច្រើនកើតមាន ក្នុងខែតុលា ដែលមានពិធីបុណ្យសម្រាប់ឧទ្ទិសដល់បាតុភូតនេះទៀតផង។ អ្នកវិទ្យាសាស្រ្ត បានពន្យល់ថា វាជាការកើនកម្តៅនៃឧស្ម័នហ្គាសចេញពីទន្លេនេះ ប៉ុន្តែអ្នកស្រុកជឿថា វាជាដុំភ្លើងដែលពស់នាគរាជ បញ្ចេញមកទៅវិញ។ 

# ភូមិចាបធ្លាក់

នៅឯប្រទេសឥណ្ឌា មានភូមិមួយឈ្មោះ Jatinga ដែលស្ថិតនៅតាមជ្រលងភ្នំ ក្នុងស្រុក Dima រដ្ឋ Assam ដែលជាភូមិដែលមានភាពល្បីល្បាញ ខាងផ្នែកបាតុភូតដ៏ចម្លែកមួយ របស់សត្វបក្សីនៅទីនោះ ដែលធ្វើអត្តឃាត។ ជាច្រើនសតវត្សមកហើយ សត្វបក្សីទាំងនោះ តែងតែហើរបន្ទាបខ្លួន យ៉ាងទាប ហើយក៏មានខ្លះធ្លាក់ទៅលើដីព្រោងព្រាត។ គេបានសន្និដ្ឋានថា ប្រហែលជាមានភាពប្រក្រតី នៃកត្តាភូមិសាស្រ្ត បានជាបក្សីទាំងនោះ មានឥរិយាបថហើរចម្លែកយ៉ាងនេះ។ 

# Brinicle

Brinicle ឬត្រូវបានគេហៅថាជា “ម្រាមដៃទឹកកកពិឃាត” គឺជាបាតុភូត នៅក្រោមសមុទ្រទឹកកកអាកទិក នៅពេលដែលសីតុណ្ហភាព និងជាតិប្រៃ មានភាពខុសគ្នា (ប្រតិកម្មគ្នា)។ វាហាក់ដូចជា រង្វង់ដៃ ដែលលាតចុះមកបាតដី របស់សមុទ្រ នឹងធ្វើឲ្យកក សត្វសមុទ្រ ដែលប៉ះវា រហូតដល់ស្លាប់។ បាតុភូតនេះ ត្រូវបានឃើញជាលើកដំបូងនៅឆ្នាំ ១៩៧៤ ដែលថតបានដោយចៃដន្យពី BBC ។ 

# ដុំទឹកកក រាងរង្វង់ នៅតាមទន្លេ

ជាក់ស្តែង ដុំទឹកកក ដែលមានរាងរង្វង់ទាំងនេះ ត្រូវបានកកើតឡើង ដោយសារតែលំហូរចលនាគួច ដែលមាននៅក្នុងទន្លេ។ នៅពេលដែលដុំរង្វង់ទឹកកកណាមួយ ចាប់ផ្តើមវិល នោះដុំទឹកកកផ្សេងទៀត ក៏ចាប់ផ្តើមវិលចេញពីគ្នា រហូតបង្កើតបានជារង្វង់មួយដ៏ធំ និងស្អាតឥតខ្ចោះ។ បាតុភូតទាំងនេះ មាននៅតំបន់ Scandinavia អង់គ្លេស អាល្លឺម៉ង់ រុស្ស៊ី និងភាគច្រើននៅឯតំបន់ អាមេរិកខាងជើង៕ 

ប្រភព៖ Bright Side | Wikipedia

• ទីកន្លែង
• ធម្មជាតិ