ខេត្តពោធិ៍សាត់ ៖ បុរសម្នាក់បានសម្រេចចិត្តចង.ក សម្លាប់ខ្លួនចោលប្រពន្ធ និងកូនឲ្យនៅកំព្រា ព្រមទាំងបានសរសេរបណ្ដាំ ទុកលើក្ដារខៀនទៀតផង បង្កឲ្យមានការភ្ញាក់ផ្អើលកាលពីវេលាម៉ោង១២ និង១៥នាទីថ្ងៃត្រង់ ថ្ងៃទី០២ ខែមករា ឆ្នាំ២០១៧ នៅផ្ទះរបស់ជនរងគ្រោះ ដែលស្ថិតនៅភូមិលាច ឃុំលាច ស្រុកភ្នំក្រវាញ ខេត្តពោធិ៍សាត់ ។
លោកអនុសេនីយ៍ឯក ពក វណ្ណា នាយប៉ុស្ដិ៍នគរបាលរដ្ឋបាលលាច បានឲ្យដឹងថា ជនរងគ្រោះឈ្មោះ ខុន ថាល់ ភេទប្រុស អាយុ៤៨ឆ្នាំ ជាមន្ត្រីយោធានៅស្រុកវាលវែង មានប្រពន្ធ និងកូន៣នាក់ ប្រុស២នាក់ ស្រី១នាក់ រស់នៅភូមិឃុំកើតហេតុខាងលើ ។
ជនរងគ្រោះផ្ទុកមេរោគអេដស៍ ជាយូរឆ្នាំមកហើយ ដោយសារតែមានការធ្វេសប្រហែសដើរលេងសប្បាយភ្លេចខ្លួនជាមួយមិត្តភក្កិកន្លងមក ហើយដោយសារជំងឺមានសភាពចុះទ្រុឌទ្រោម ពីមួយថ្ងៃទៅមួយថ្ងៃមិនអាច ប្រកបមុខរបរអ្វីបាននោះទេ ធ្វើឲ្យជីវភាពគ្រួសារជួបការលំបាក ហើយកន្លងមកជនរងគ្រោះ ក៏ធ្លាប់សុំអង្គភាពចូលនិវត្តន៍មុនផងដែរ តែមិនបានសម្រេច ដែលធ្វើឲ្យការរស់នៅរបស់គាត់ កាន់តែមានភាពស្មុគស្មាញថែមទៀត ។
លោកអនុសេនីយ៍ឯក ពក វណ្ណា ឲ្យដឹងទៀតថា នៅថ្ងៃកើតហេតុ កូនៗទៅរៀន ឯប្រពន្ធក៏មិននៅផ្ទះដែរ ធ្វើឲ្យជនរងគ្រោះ មានឱកាសធ្វើអត្តឃាត ដោយចងកសម្លាប់ខ្លួនបានសម្រេច ដោយគ្មានអ្នកណា ដឹងជួយទាន់ឡើយ ហើយពេលប្រពន្ធកូនមកវិញ ក៏មិនបានឡើងទៅមើលដែរ ព្រោះជាប់ដាំស្លនៅខាងក្រោម លុះពេលរួចរាល់ ឡើងទៅហៅហូបបាយ ស្រាប់តែឃើញព្យួកជាប់នឹងរ៉តផ្ទះ ក៏ស្រែកហៅអ្នកជិតខាងឲ្យមកជួយស្រាយចំណង ប៉ុន្តែពេលដាក់ចុះមកវិញ ជនរងគ្រោះបានស្លាប់បាត់ទៅហើយ ទើបមានការភ្ញាក់ផ្អើលតែម្ដង ។
លោកនាយប៉ុស្ដិ៍នគរបាលរដ្ឋបាលលាច បញ្ជាក់ថា មុនពេលធ្វើអត្តឃាត ជនរងគ្រោះបានសរសេរបណ្ដាំទុកនៅលើក្ដារខៀនដែលមានខ្លឹមសារថា (កូនខំរៀន ខំរក កុំលួច ភ្នែកប៉ាពិបាកមើល រកស៊ីមិនកើត ចិញ្ចឹមកូនមិនបានទៀតទេ សូមកូនចេះជួយគ្នា និងមានសំណាងល្អ) ។
ជនរងគ្រោះបានដាក់ ឈ្មោះរបស់គាត់ ខុន ថាល់ និងដាក់កាលបរិច្ឆេទ ថ្ងៃច័ន្ទទី០២ ០១ ២០១៧ វេលាម៉ោង០៩ព្រឹកទៀតផង ។ ដូច្នេះបានន័យថា ជនរងគ្រោះបានធ្វើសកម្មភាពចង.ក សម្លាប់ខ្លួនតាំងពីម៉ោង០៩ព្រឹកមកម្ល៉េះ ខណៈប្រពន្ធកូនមិននៅផ្ទះ ប៉ុន្តែទើបតែដឹងភ្ញាក់ផ្អើល នៅវេលាម៉ោង១២ និង១៥នាទីថ្ងៃត្រង់នេះ ។
ក្រោយពីសមត្ថកិច្ចពិនិត្យ និងធ្វើកោសល្យវិច្ច័យ សពរួចបញ្ជាក់ថា ជនរងគ្រោះពិតជាស្លាប់ដោយធ្វើអត្តឃាតចង.សម្លាប់ខ្លួនប្រាកដមែន រួចក៏ប្រគល់សពជូនសាច់ញាតិយកទៅធ្វើបុណ្យតាមប្រពៃណី ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា ស្រដៀងគ្នានេះដែរ មុនចង.កសរសេរបណ្តាំ ថា «កូនសុំទោសឪពុក, ឪពុកក្មេក ដែលកូន យកម៉ូតូទៅបញ្ចាំ» ។
បុរសម្នាក់ត្រូវក្រុមគ្រួសារ ប្រទះឃើញចង.ក សម្លាប់ខ្លួននៅ ក្នុងផ្ទះទំនេរមួយកន្លែង បង្កឱ្យភ្ញាក់ផ្អើលកាល ពីវេលាម៉ោង ០៧ និង៣០នាទីព្រឹក ថ្ងៃទី២៣ មីនា ២០១៥ កន្លងទៅ ស្ថិតនៅក្នុងដីឡូត៍ ទំនេរមួយកន្លែង ក្នុងភូមិព្រៃសណ្ដែក សង្កាត់ចោមចៅ ខណ្ឌពោធិ៍ សែនជ័យ រាជធានីភ្នំពេញ ។
ប្រភពបានឱ្យដឹងថា ជនរងគ្រោះឈ្មោះសំ មករា អាយុ២៩ឆ្នាំ មានប្រពន្ធឈ្មោះអឺ សារិ អាយុ២៧ឆ្នាំ មានកូនម្នាក់ និងមានទីលំនៅក្នុង ភូមិកើតហេតុខាងលើ ។
ប្រភពបន្តថា មូលហេតុដែលបុរសរងគ្រោះចង.កធ្វើអត្តឃាតនេះ ដោយសាររូបគេបានយកម៉ូតូ របស់ ឪពុក បង្កើតទៅបញ្ចាំ យកលុយចាយ អស់ ដោយអត់ហ៊ាន ចូលផ្ទះជួប ប្រពន្ធ-កូនទេ និងខ្លាចឪពុកវាយ ហើយបានគេច ខ្លួនរយៈពេល ៣ថ្ងៃមកហើយ ។
តាមប្រភពបានឱ្យដឹងថា កន្លងមកបុរសនោះបានយកម៉ូតូម៉ាកហុងដាឌ្រីមសេ១២៥ ស៊េរីឆ្នាំ២០១៥ ពណ៌ ខ្មៅ១គ្រឿង ដែលជាកម្មសិទ្ធិ របស់ឪពុកក្មេក យកទៅដាក់បញ្ចាំម្ដង រួចមកហើយ ប៉ុន្តែត្រូវប្រពន្ធ ទៅលោះយកមកវិញ ។ បន្ទាប់មកបាន ចូលផ្ទះជាធម្មតា ប៉ុន្តែមិនបាន កែខ្លួន នោះឡើយ ។ ដោយឡែកកាលពី ៣ ទៅ៤ថ្ងៃ នៅមុនពេលកើតហេតុ បុរសនោះបាន យកម៉ូតូម៉ាក ហុងដាឌ្រីមសេ ១២៥ស៊េរី ឆ្នាំ២០០៨ ពណ៌ខ្មៅ យកទៅបញ្ចាំយក លុយចាយអស់ទៀត ។
លើកចុងក្រោយ បុរសនេះលែងហ៊ានចូលផ្ទះ និងបានគេចខ្លួនរហូត ប៉ុន្តែមានសាច់ញាតិយកបាយយក ទឹកទៅឱ្យហូបរហូត ដោយមិន បានដឹងថា បុរសនេះមាន គំនិតចង.ក សម្លាប់ខ្លួននោះឡើយ ។ មុនពេលចង.ក សម្លាប់ខ្លួននោះ បានយកធ្យូងសរសេរ បណ្ដាំនៅលើ ជញ្ជាំង ផ្ទះនោះថា «ពុកម៉ែ មុនកូនផុតទៅ ឱ្យកូនសុំទោសផង ពីកូនថោកទាបម្នាក់នេះ កូនគ្មានមុខអ្វីជួប ប្រពន្ធកូនទេ និងមីងខ្ញុំទេ ពូព្រាប កុំភ្លេចយកកាត គ្រី 26-6-15 បានជាឪពុកម្ដាយ ទីពីររបស់ខ្ញុំសុំទោស អ្នកទាំងអស់គ្នា» ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
