ប្រវត្តិ​ត្រួសៗ​របស់​កម្ពុជា និង​ហ្ស៊ក​ដានី មុន​ប៉ះ​គ្នា​ម៉ោង ១១​យប់​នេះ

(ភ្នំពេញ)៖ រវាងក្រុមបាល់ទាត់ជម្រើសជាតិកម្ពុជា និងប្រទេសហ្ស៊កដានី ស្ថិតក្នុងទ្វីបអាស៊ីដូចគ្នាពុំមានប្រវត្តិជួបគ្នាពី មុនមកនោះទេ ហើយក៏ជាក្រុមមិនដែលឡើងដល់វគ្គចែកពូលនៃ World Cup ដូចគ្នាដែរ ក្រៅពីពានរង្វាន់ប្រចាំទ្វីបអាស៊ី AFC Asian Cup ទៀតផង តែហ្ស៊កដានី ធ្លាប់ឡើងដល់វគ្គ៨ក្រុមចុងក្រោយនៃ Asian Cup បាន២ដងដែរគឺក្នុង ឆ្នាំ២០០៤ និងឆ្នាំ២០១១ ក្នុងការបង្ហាញខ្លួន៣ដង។

កីឡាករដែលត្រូវបានកោះហៅចូលជួយក្រុមជម្រើសជាតិហ្ស៊កដានី (Jordan) នាពេលបច្ចុប្បន្នភាគច្រើនលេងនៅក្រៅ ប្រទេសមានដូចជា ចកចៀ លីបង់ ម៉ូរ៉ុក ហុងកុង អូម៉ង់ បារ៉ែន កាតា និងអូស្រ្តាលីជាដើម ដោយមានលោក Abdullah Mester ជនជាតិហ្ស៊កដានី ជាគ្រូបង្វឹកបង្គោល គ្រាដែលកីឡាកររបស់ក្រុមគោព្រៃកម្ពុជាមាន ធារី ចន្ថាប៊ីន លេងនៅថៃ និងខ្សែប្រយុទ្ធ ចាន់ វឌ្ឍនាកា លេងនៅលីគលំដាប់ទី៣ របស់ជប៉ុន ក្រៅពីនោះ សុទ្ធតែជាកីឡាករលេងក្នុងស្រុក ដោយមានលោក Leonardo Luiz សញ្ជាតិប្រេស៊ីល ជាគ្រូបង្វឹកធំ។

អាចនិយាយបានថា ហ៊្សកដានី កំពុងឡើងជើងគួរឲ្យកត់សម្គាល់ តាមរយៈលេង៣ប្រកួតចុងក្រោយនេះមិនដែលស្មើ ឡើយ ដោយបានយកឈ្នះចកចៀ ១-០ ឈ្នះហុងកុង ៤-០ និងស្មើ ០-០ ទល់នឹងលីបង់ ខណៈ៣ប្រកួតចុងក្រោយ របស់កម្ពុជាធ្វើមិនបានល្អសោះ ដោយចាញ់វៀតណាម ២-១ ចាញ់អារ៉ាប់ប៊ីសាអូឌីត ៧-២ និងចាញ់ឥណ្ឌា ៣-២។

សូមបញ្ជាក់ផងដែរថា ក្នុងជំនួបផ្លូវការរបស់គ្រូបង្វឹកថ្មី Leonardo Luiz កម្ពុជា ប៉ះហ្ស៊កដានី នាម៉ោង ១១៖០០នាទី យប់នេះ (ម៉ោងនៅកម្ពុជា) ក៏មានការផ្សាយបន្តផ្ទាល់នៅលើកញ្ចក់ទូរទស្សន៍ BTV-News ផងដែរនេះបើតាមការប្រកាសលើទំព័រ Facebook ផ្លូវការរបស់ទូរទស្សន៍ BTV-News ពីជំនួបបើកឆាកជើងទី១ នៃវគ្គសន្សំ ពិន្ទុប្រចាំពូល C ដោយមានកម្ពុជា ហ្ស៊កដានី អាហ្វហ្គានីស្ថាន និងវៀតណាម៕

ប្រភព៖ Khmertalking

ដោយឡែករំលឹកព័ត៌មានមួយផ្សេងទៀត៖ ស្ដេចអុក ២ជំនាន់ ឈាវ បូរ៉ា បន្ដឈ្នះគូប្រកួតអវត្តមាន! តើមូលហេតុអ្វី?

(ភ្នំពេញ)៖ ម្សិលមិញកីឡាករ ឈាវ បូរ៉ា អតីតស្ដេចអុក ២ជំនាន់(២០១៤-២០១៥) បានឆ្លងកាត់វគ្គជម្រុះជុំទី១ ដោយមិនបាច់ប្រកួតម្ដងហើយ ដោយសារគូប្រកួតអវត្តមាននោះ ។ ប៉ុន្ដែបើតាមការឲ្យដឹងពីអ្នកស្រុកមកពីខេត្តកំពង់ចាមរូបនេះ បានឲ្យដឹងថា ការប្រកួតជម្រុះជុំទី២ នាព្រឹកថ្ងៃទី២៨ ខែមីនានេះ គូប្រកួតរបស់ខ្លួន ក៏នឹងអវត្តមានដែរ ។ បានន័យថា ឈាវ បូរ៉ា បានឈ្នះ ២ប្រកួតជាប់គ្នា ដោយមិនបាច់ចំណាយគំនិតគិតក្នុងការប្រកួតឡើយ ។

តើមូលហេតុអ្វី បានជាដៃគូរបស់ស្ដេចអុក ២ជំនាក់ខាងលើ បន្ដអវត្តមានមិនហ៊ានប្រកួតដូច្នេះ? ជាការឆ្លើយតបជុំវិញបញ្ហានេះ កីឡាករ ឈាវ បូរ៉ា បានឆ្លើយយ៉ាងខ្លះថា «ពួកគាត់ជាកូនសិស្សខ្ញុំ ពួកគាត់ថាមិនចង់ប្រកួតជាមួយខ្ញុំទេ» ។ នេះគឺជាមូលហេតុ ដែលគូប្រកួតរបស់ បូរ៉ា អវត្តមានជាបន្ដបន្ទាប់បែបនេះ ប៉ុន្ដែសាមីខ្លួនផ្ទាល់បានអះអាងថា ការប្រកួតជម្រុះជុំទី៣ គឺមិនអាចប៉ះគូប្រកួតអវត្តមានទៀតឡើយ ផ្ទុយទៅវិញ គឺអាចជួបកីឡាករជើងខ្លាំងទៀតផង ។

គួរបញ្ជាក់ថា ការប្រកួតអុកចត្រង្គអង្គរសង្ក្រាន្ដ ឆ្នាំ២០១៧ ដំណាក់កាលទី១ បានបញ្ចប់វគ្គជម្រុះជុំទី១ ហើយ ដោយរកឃើញកីឡាករ ៨០នាក់ឡើងទៅវគ្គជម្រុះជុំទី២ ដែលនឹងធ្វើការប្រកួតនាព្រឹកថ្ងៃទី២៨ ខែមីនា ឆ្នាំ២០១៧ ដើម្បីជម្រុះទុកត្រឹម ៤០នាក់ឡើងទៅប្រកួតជម្រុះជុំទី៣ នៅល្ងាចថ្ងៃដដែលនេះ នៅលើទីលាននៃទីស្នាក់ការគណៈកម្មាធិការជាតិអូឡាំពិកកម្ពុជា ៕