ចំណាយលុយតិច ហើយបានផ្ទៃមុខស្រស់ស្អាតស្ទើរមិនគួរឱ្យជឿ ដោយរូបមន្តធម្មជាតិ៤យ៉ាង

គ្រឿងសម្អាង ដែលមានដាក់លក់នៅទីផ្សារភាគច្រើនមានតម្លៃថ្លៃ ពេលខ្លះអស់លុយថែមទាំងមិនបានស្អាតដូចចិត្ត ហើយអាចប៉ះពាល់ដល់សុខភាពផ្ទៃមុខទៀត។ ក៏ដូចជាខាងក្រោមនេះ ជាវិធីសាស្រ្តធម្មជាតិងាយៗដែលអាចធ្វើឱ្យផ្ទៃមុខអ្នកស្រស់ស្អាតជាមួយនឹងគ្រឿងផ្សំងាយៗស្រួលរក ហើយមានតម្លៃថោកទៀត តែគុណភាព និងប្រសិទ្ធភាពបែរជាល្អហួសពីការស្មាន។

តោះ! មករៀនធ្វើទាំងអស់គ្នាដូចតទៅ៖  

១. ម៉ាស់សម្រាប់បករោមមុខឱ្យរលោងស្អាត

គ្រឿងផ្សំ

- ទឹកក្រូចឆ្មារសម្បកលឿង ១០ ក្រាម ប្រហែលជា ១ស្លាបព្រា

(ប្រើក្រូចឆ្មារធម្មតាក៏បាន)

- ម្សៅហ្គ្រាម ៣០ ក្រាម ប្រហែលជា ៥ ទៅ ៦ស្លាបព្រា

(ម្សៅ Gram ឬ Checkpea flour រកងាយបាននៅផ្សារទំនើប)

- ទឹកស្អាតមួយពែង 

ការអនុវត្ត៖ គ្រាន់តែលាយគ្រឿងផ្សំខាងលើទាំងអស់បញ្ចូលគ្នាឱ្យសព្វ រួចយកមកលាបលើផ្ទៃមុខទុកចោលប្រមាណជា ១៥នាទី។ បន្ទាប់មកយកកន្សែង ឬក្រណាត់ស្អាតមកជូតលើផ្ទៃមុខរាងខ្លាំងបន្តិច រោមលើផ្ទៃមុខនឹងដោយមកតាមកម្លាំងជូតរបស់ក្រណាត់នោះជាមិនខាន។

២. ម៉ាស់ប្រឆាំងនឹងភាពចាស់ជ្រីវជ្រួញផ្តល់ឱ្យមុខក្មេងជាងវ័យ

គ្រឿងផ្សំ

- ថ្នាំអាស្ព្រីរីន ៣គ្រាប់ (Aspirin)

- ទឹកក្រូចឆ្មារសម្បកលឿង ៣ស្លាបព្រា (ទឹកក្រូចឆ្មារធម្មតាក៏បាន) 

ការអនុវត្ត៖ យកគ្រាប់ថ្នាំអាស្ព្រីរីន (Aspirin) មកកិនឱ្យហ្មត់ រួចលាយជាមួយទឹកក្រូចឆ្មារ។ បន្ទាប់មកលាងសម្អាតមុខឱ្យបានស្អាត រួចយកល្បាយម៉ាស់នេះមកលាបឱ្យសព្វផ្ទៃមុខ ទុកចោលរយៈពេល ១០នាទី ចាំលាងចេញជាមួយទឹកធម្មតាជាការស្រេច។ 

៣. ម៉ាស់សម្រាប់ផ្ទៃមុខ សស្រស់ស្អាតភ្លឺរលោងស្រស់ថ្លា

គ្រឿងផ្សំ

- ថ្នាំអាស្ព្រីរីន ៥ គ្រាប់ (Aspirin)

- ទឹកដោះគោជូរធម្មជាតិ ១ស្លាបព្រា (ទឹកដោះគោជូរធម្មជាតិគ្មានពណ៌ គ្មានជាតិស្ករ)

- ទឹកឃ្មុំ កន្លះស្លាបព្រា 

ការអនុវត្ត៖

- កិនថ្នាំអាស្ព្រីរីន (Aspirin) ឱ្យហ្មត់រួចលាយជាមួយទឹកដោះគោជូរ និងទឹកឃ្មុំបញ្ចូលគ្នា។

- យកកន្សែង ឬក្រណាត់ស្អាតជ្រលក់ពូតជាមួយទឹកក្តៅ រួចយកក្រណាត់នោះមកគ្របលើផ្ទៃមុខរហូតដល់ស្ងួតដើម្បីបើករន្ធញើសផ្ទៃមុខ

- បន្ទាប់មកយកម៉ាស់ដែលលាយរួចមកលាបឱ្យសព្វផ្ទៃមុខ ទុកចោលរយៈពេល ៣០នាទី រួចចាំលាងចេញជាមួយទឹកក្តៅឧណ្ហៗជាការស្រេច។  

៤. ម៉ាស់ជម្រះជាតិកខ្វក់លើផ្ទៃមុខឱ្យមុខ ​ស ហ្មត់រលោងស្រស់ថ្លា

គ្រឿងផ្សំ

- ថ្នាំអាស្ព្រីរីន ៣ គ្រាប់ (Aspirin)

- ទឹកក្តៅឧណ្ហៗ ៣ស្លាបព្រាបាយ 

ការអនុវត្ត៖ កិនថ្នាំអាស្ព្រីរីន (Aspirin) ឱ្យហ្មត់លាយជាមួយទឹកក្តៅឧណ្ហៗ រួចលាបឱ្យសព្វលើផ្ទៃមុខ ទុកចោលរយៈពេល ១០នាទី ចាំលាងចេញជាមួយទឹកធម្មតា។

វិធីសាស្រ្តខាងលើអ្នកអាចយកមួយណាមកអនុវត្តក៏បាន ដែលសាកសមនឹងផ្ទៃមុខរបស់អ្នកប្រមាណជា ២ ទៅ ៣ ដងក្នុងមួយសប្តាហ៍ ដើម្បីទទួលបានភាពស្រស់ស្អាត ស ខ្ចីស្រស់ថ្លា ហ្មត់ រលោង និងបំបាត់ស្នាមជ្រីវជ្រួញក្មេងជាងវ័យបានផងដែរ។ កុំភ្លេចអនុវត្តទាំងអស់គ្នា!