គន្លឹះ ១៤ យ៉ាងដើម្បីកសាងទំនាក់ទំនងល្អជាមួយមិត្តរួមការងាររបស់អ្នក

មានពំនោលដ៏ល្បីល្បាញមួយថា “ទាល់តែដៃពីរទើបទះទៅវាលឺសម្លេង” ហើយការលើកឡើងនេះពិតជាត្រឹមត្រូវណាស់ នៅពេលយើងនិយាយទៅដល់អាជីពការងាររបស់យើងនៅក្នុងប្រទេសកម្ពុជា។ ជាការពិតណាស់ អ្នកគួរតែគិតអំពីរឿងនេះ។ 

បុគ្គលសំខាន់បំផុតពីរនាក់ដែលអ្នកត្រូវពឹងផ្អែកនៅកន្លែងការងារ ដើម្បីសម្រេចកិច្ចការដែលបានដាក់ឱ្យធ្វើនោះគឺ ចៅហ្វាយនិងមិត្តរួមការងាររបស់អ្នក។ ខណៈពេលដែលយើងមួយចំនួនប្រហែលជា ចង់ធ្វើការដូចជាអ្នកសច្ចំ ដោយមិនចាំបាច់ស្តាប់នូវរាល់ពាក្យរអ៊ូរទាំពីមិត្តរួមការងាររបស់យើងនោះទេ យើងនឹងត្រូវការសុំជំនួយពីពួកគេជាញឹកញាប់ ដើម្បីឱ្យប្រាកដថាយើង បានបំពេញការងារចប់សព្វគ្រប់នៅក្នុងថ្ងៃនេះ។

ដូច្នេះ អ្នកអាចពិនិត្យមើលខាងក្រោមនេះដើម្បីស្វែងយល់ពីគន្លឹះ ដែលមានប្រយោជន៍មួយចំនួន ដែលអ្នកគួរពិចារណាប្រសិនបើអ្នកចង់មានទំនាក់ទំនងល្អជាមួយមិត្តរួមការងារទាំងឡាយរបស់អ្នក។

ពិចារណាពង្រឹងជំនាញទំនាក់ទំនងរវាងបុគ្គល

ទំនាក់ទំនងវិជ្ជាជីវៈដ៏ល្អគឺពឹងផ្អែកលើកម្រិតនៃជំនាញទំនាក់ទំនងរវាងបុគ្គលដោយរួមទាំងអ្នកនិងអ្នកដទៃផងដែរ។ ចំណុចនេះរួមបញ្ចូលទាំងការទំនាក់ទំនង ការសហការ ឬសូម្បីតែការដោះស្រាយជម្លោះ ដែលនៅពេលត្រូវបានពង្រឹងហើយនោះវានឹងអនុញ្ញាតឱ្យបុគ្គលម្នាក់ៗមានទំនាក់ទំនងល្អជាមួយអ្នកដទៃ។

1. កំណត់នូវអ្វីដែលអ្នកត្រូវការពីអ្នកដទៃ

អ្នកគួរពិចារណាពីទំនាក់ទំនងផ្ទាល់ខ្លួនរបស់អ្នក។ តើអ្នកបានយល់ពីអ្វីដែលអ្នកពិតជាត្រូវការពីអ្នកដទៃឫទេ? លើសពីនេះទៀត តើអ្នកបានយល់ពីអ្វីដែលអ្នកដទៃត្រូវការពីអ្នកវិញទេ? ការយល់ដឹងអំពីភាពរឹងមាំនៃទំនាក់ទំនងបែបនេះនឹងមានសារៈសំខាន់សម្រាប់អ្នកក្នុងការបង្កើតទំនាក់ទំនងដែលមានប្រសិទ្ធភាពជាមួយមនុស្សនៅជុំវិញខ្លួនអ្នក។ ការគោរពទំនាក់ទំនងរវាងគ្នានឹងគ្នាគឺកើតមានឡើងនៅក្នុងវប្បធម៌របស់ប្រទេសកម្ពុជាហើយយើងក៏អាចអនុវត្តវានៅក្នុងវប្បធម៌ការងាររបស់យើងបានផងដែរ។

2. ចំណាយពេលវេលាខ្លះដើម្បីបង្កើតទំនាក់ទំនង

ការដែលគ្រាន់តែនិយាយគ្នានោះគឺមិនគ្រប់គ្រាន់ទេដើម្បីកសាងទំនាក់ទំនងល្អជាមួយសហការីរបស់អ្នក។ ប្រសិនបើអ្នកចង់កាត់បន្ថយការយល់ច្រឡំខណៈពេលដែលធ្វើអោយប្រសើរឡើងនូវប្រសិទ្ធិភាពក្នុងការសហការគ្នា អ្នកគួរតែពិចារណាបែងចែកពេលវេលាដែលសាកសមដើម្បីពង្រឹងទំនាក់ទំនងការងារដែលអ្នកមានជាមួយមិត្តរួមការងាររបស់អ្នក។

4. ពិចារណាពង្រឹងជំនាញបញ្ញាស្មារតីរបស់អ្នក

ក្នុងចំណោមការធ្វើអ្វីផ្សេងទៀត អ្នកក៏គួរតែយកចិត្តទុកដាក់ក្នុងការបង្កើនជំនាញបញ្ញាស្មារតីរបស់អ្នកប្រសិនបើអ្នកចង់មានទំនាក់ទំនងរលូននិងមានប្រសិទ្ធភាពមិនមែនត្រឹមតែជាមួយមិត្តរួមការងាររបស់អ្នកប៉ុណ្ណោះទេ ប៉ុន្តែគឺជាមួយមនុស្សគ្រប់គ្នាដែលអ្នកជួបប្រទះក្នុងជីវិតរបស់អ្នកផងដែរ។

5. តែងតែលើកសរសើរពីមនុស្សនៅជុំវិញខ្លួនអ្នក តែត្រូវប្រាកដថាអ្នកនិយាយឱ្យបានសមរម្យ

ចាប់តាំងពីចៅហ្វាយរបស់អ្នករហូតដល់ជំនួយការិយាល័យ អ្នកគ្រប់គ្នាតែងមានអារម្មណ៍ថាចង់ទទួលបានការកោតសរសើរចំពោះការងារដ៏លំបាកដែលពួកគេធ្វើ។ ដូច្នេះ អ្នកគួរឆ្លៀតពេលខ្លះដើម្បីកោតសរសើរពួកគេសម្រាប់ការខិតខំកន្លងមកនេះ។ សូម្បីតែការនិយាយថា “សូមអរគុណ” ក៏អាចចាត់ទុកថាជាការកោតគោរពដែរ។ ការធ្វើបែបនេះប្រាកដជាអាចធ្វើឱ្យជីវិតរបស់អ្នកមានភាពសប្បាយរីករាយនិងការគោរពគ្នាទៅវិញទៅមកនៅក្នុងកន្លែងធ្វើការ។

6. រក្សាអាកប្បកិរិយាជាវិជ្ជមានគ្រប់ពេលវេលា

គ្មាននរណាម្នាក់ចូលចិត្តនៅជាមួយបុគ្គលដែលតែងតែមានអាកប្បកិរិយាអវិជ្ជមានទៅកាន់អ្នកជុំវិញខ្លួនគេនោះទេ។ ដូច្នេះ ប្រសិនបើអ្នកចង់អោយមិត្តរួមការងាររបស់អ្នករាប់អានជាមួយអ្នកគ្រប់ពេលវេលាដោយឃើញពីចំណុចវិជ្ជមានរបស់អ្នកនោះ អ្នកគួររក្សាខ្លួនជាបុគ្គលដែលមានគំនិតវិជ្ជមានជានិច្ច។

7. ត្រូវស្គាល់ច្បាស់ពីព្រំដែនផ្ទាល់ខ្លួនរបស់អ្នក

ការរួសរាយរាក់ទាក់ជាមួយមនុស្សគ្រប់រូបមិនមែនមានន័យថាអ្នកត្រូវតែបោះបង់ចោលខ្លួនអ្នកនោះទេ។ ការធ្វើដូច្នេះមិនត្រឹមតែធ្វើឱ្យអ្នកមិនសប្បាយចិត្តប៉ុណ្ណោះទេប៉ុន្តែវាក៏អាចប៉ះពាល់ដល់ទំនាក់ទំនងជាមួយសហការីរបស់អ្នកផងដែរ។ ដូច្នេះ អ្នកត្រូវប្រាកដថាអ្នកបានកំណត់ព្រំដែនសំរាប់ខ្លួនឯង។

8. ចៀសវាងការនិយាយដល់គោលនយោបាយក្នុងការិយាល័យ

អ្នកគួរជៀសវាងការចូលរួមជជែកអំពីគោលនយោបាយរបស់ការិយាល័យនៅគ្រប់កម្រិតទាំងអស់។ រឿងមួយចំនួនដូចជាការនិយាយដើម ឬការផ្សព្វផ្សាយពាក្យចចាមអារាមដោយចេតនា ឬដោយអចេតនាក្ដីដែលអាចធ្វើអោយអ្នកមើលទៅជាមនុស្សមិនល្អនៅក្នុងខ្សែភ្នែកអ្នកដទៃ។

9. អនុវត្តន៍ជំនាញក្នុងការស្ដាប់របស់អ្នក

ទង្វើនៃការធ្វើជាបុគ្គលដែលចូលចិត្តស្ដាប់អាចធ្វើឱ្យអ្នកធ្វើការបានយូរ។ មនុស្សម្នាក់ៗតែងមានវិធីក្នុងការឆ្លើយតបទៅនឹងបុគ្គលដែលពិតជាចង់ស្តាប់នូវអ្វីដែលគេនិយាយ។ ដូច្នេះ នៅពេលចៅហ្វាយឬមិត្តរួមការងាររបស់អ្នកកំពុងនិយាយជាមួយអ្នកសូមយកចិត្តទុកដាក់ស្ដាប់។ ពួកគេនឹងចាត់ទុកអ្នកថាជាមនុស្សទៀងត្រង់និងគួរឱ្យទុកចិត្ត។

10. ប្រតិបត្តិការគួរសមសាមញ្ញៗ

ជាការពិតណាស់ថា ការអនុវត្តការគួរសមដ៏សាមញ្ញដូចជាការនិយាយថា “អរុណសួស្ដី” នៅពេលព្រឹក ឬការសំឡឹងមើលភ្នែកនៅពេលនិយាយជាមួយនរណាម្នាក់នោះពិតជាអាចជួយដល់អ្នកក្នុងការខិតខំប្រឹងប្រែងកសាងទំនាក់ទំនងល្អជាមួយមិត្តរួមការងារ។ ការគួរសមដោយសាមញ្ញៗតែងតែត្រូវចាត់ទុកថាជាផ្នែកមួយដ៏សំខាន់នៃវប្បធម៌របស់ប្រទេសកម្ពុជា។ ហេតុដូចនេះអ្នកគួរបន្តអនុវត្តន៍វាបន្ថែមទៀត។

11. ប្រើប្រាស់វិធីទំនាក់ទំនងខុសៗគ្នាចំពោះបុគ្គលផ្សេងៗគ្នា

បុគ្គលផ្សេងគ្នាតែងចូលចិត្តវិធីសាស្រ្តក្នុងការទំនាក់ទំនងផ្សេងៗពីគ្នា។ ឧទាហរណ៍ មិត្តរួមការងារមួយចំនួនរបស់អ្នកប្រហែលជាចូលចិត្តទំនាក់ទំនងតាមរយៈអ៊ីម៉ែលព្រោះវាផ្តល់នូវកំណត់ត្រាជាលាយលក្ខណ៍អក្សរ ខណៈពេលដែលអ្នកផ្សេងទៀតអាចចូលចិត្តការនិយាយទូរស័ព្ទដើម្បីឱ្យវាកាន់តែងាយស្រួល។ ដូច្នេះ អ្នកគួរប្រើមធ្យោបាយទំនាក់ទំនងណាដែលមិត្តរួមការងាររបស់អ្នកទំលាប់ប្រើដើម្បីទាក់ទាញនូវចំណាប់អារម្មណ៍របស់ពួកគេ។

12. គោរពសិទ្ធសេរីភាពអ្នកដទៃ

អ្នកដទៃក៏ដូចជាអ្នកដែរ ពួកគេត្រូវការមានពេលវេលាផ្ទាល់ខ្លួនសម្រាប់ពួកគេ។ ការមិនគោរពព្រំដែនផ្ទាល់ខ្លួនអាចជាមធ្យោបាយមួយដែលអាចបំផ្លាញទំនាក់ទំនងដែលអ្នកមានជាមួយពួកគេ។ ដោយហេតុផលនេះ អ្នកត្រូវដឹងពីព្រំដែនផ្ទាល់ខ្លួនរបស់អ្នកដទៃដូច្នេះអ្នកនឹងអាចដឹងថាអ្នកមិនបានឆ្លងហួសព្រំដែននោះទេ។

13. ត្រូវច្បាស់ពីអ្វីដែលអ្នកចង់បានមុននឹងធ្វើការសួរសំណួរ

នៅកន្លែងធ្វើការបុគ្គលិកគ្រប់គ្នាតែងតែឱ្យតម្លៃពេលវេលារបស់ខ្លួនណាស់ព្រោះវាបានគ្រប់គ្រងទៅលើចំនួនការងារដែលពួកគេអាចសម្រេចបានក្នុងរយៈពេលជាក់លាក់ណាមួយ។ ដូច្នេះ អ្នកត្រូវប្រាកដថាអ្នកចង់បានអ្វីមុននឹងសួរសំណួរទៅកាន់មិត្តរួមការងាររបស់អ្នក។

14. កុំលើកដាក់កំហុសឱ្យអ្នកដទៃ

វាពិតជាពិបាកដែរក្នុងការបំពេញការងារដោយមិនគ្មានកំហុសសោះនោះ។ ទោះជាយ៉ាងណាក៏ដោយ អ្វីដែលអាក្រក់ជាងការប្រព្រឹត្តកំហុសឆ្គងទៀតនោះគឺការទំលាក់កំហុសទៅបុគ្គលម្នាក់ផ្សេងទៀតនៅពេលដែលវាគួរតែជាអ្នកដែលត្រូវបានស្តីបន្ទោស។ ដូច្នេះ អ្នកគួរតែចាប់ផ្តើមមានទំនួលខុសត្រូវខ្ពស់ ប្រសិនបើអ្នកចង់អោយមិត្តរួមការងារជឿ។

ផ្ដល់សិទ្ធដោយ everjobs

• ការងារ
• មិត្ត