ក្រោយសម្រាលកូនហើយ ថែខ្លួនបែបណា ឲ្យនៅតែទាក់ទាញស្វាមី កុំឲ្យបែកចិត្ត?

បន្ទាប់ពីសម្រាលកូនរួច អ្នកម្តាយគ្រប់រូបច្បាស់ជាបារម្ភណាស់អំពីរូបសម្រស់របស់ខ្លួន ហើយចង់បានសម្រស់ឱ្យមករកភាពស្រស់ស្អាតវិញដូចកាលពីក្រមុំជាក់ជាមិនខាន។ 

នេះជាកង្វល់មួយ ដែលស្រ្តីខ្វល់ខ្វាយយ៉ាងខ្លាំង ព្រោះបើសម្រស់មិនស្អាតខ្លាចថាថ្ងៃណាមួយស្វាមីអាចនឹងបែកចិត្តទៅមានស្រីថ្មីនៅខាងក្រៅផ្ទះ។ ដូច្នេះទោះបីជាមានកូនរួចទៅហើយក៏ដោយ ប៉ុន្តែរឿងភាពស្រស់ស្អាត ស្រ្តីជាអ្នកម្តាយគ្រប់រូបគឺមិនគួរមើលរំលងនោះឡើយ។

ប៉ុន្តែមុនពេលឈានទៅដល់គន្លឹះដែលធ្វើឱ្យអ្នកម្តាយទទួលបាននូវភាពស្រស់ស្អាតក្រោយពេលសម្រាលកូនរួច យើងមកដឹងជាមុនសិនថា ហេតុអ្វីបានជាអ្នកម្តាយត្រូវការសម្រស់មកវិញក្រោយពេលសម្រាល? 

#មូលហេតុទាំងនោះគឺបណ្តាលមកពី៖

A) ការថែរក្សាសម្ផស្សឱ្យស្រស់ស្អាត គឺជួយរក្សាជីវិតគូឱ្យបានយូរអង្វែង ព្រោះមនុស្សប្រុសគ្រប់រូបតែងស្រលាញ់ភាពស្រស់ស្អាតរបស់នារីៗជានិច្ច។ កុំគិតថាស្វាមីរបស់អ្នកនឹងកោតសរសើរពីការដែលអ្នកយកចិត្តទុកដាក់ថែរក្សាកូន ហើយបណ្តាលឱ្យសម្រស់ធ្លាក់ចុះ ព្រោះបើសម្រស់អ្នកធ្លាក់ចុះ សេចក្ដីស្នេហារបស់ស្វាមីអ្នកក៏ធ្លាក់ចុះទៅតាមនោះផងដែរ។

B) ភាពស្រស់ស្អាតនឹងជួយធ្វើឱ្យអ្នកមើលទៅមានទំនុកចិត្ត និងងាយស្រួលតុបតែងខ្លួនពេលទៅណាម្តងៗ។ កុំយកកូនមកធ្វើជាលេសក្នុងការបញ្ឈប់ភាពស្រស់ស្អាតរបស់អ្នកឱ្យសោះ គួរតែថែរក្សាខ្លួនឯងឱ្យបានល្អបំផុត ទាំងសុខភាពរាងកាយ និងសម្រស់។

C) ភាពស្រស់ស្អាតនឹងជួយឱ្យអ្នក និងមនុស្សជាទីស្រលាញ់មានសេចក្តីសុខ សប្បាយចិត្ត និងមានអារម្មណ៍ល្អជាមួយគ្នា ហើយទៅណាម្តងៗមានតែអ្នកសរសើរ ដោយមិនខ្លាចថាសា្វមីចេញទៅមានស្រីនៅខាងក្រៅផ្ទះនោះឡើយ។

D) សម្រស់ជួយអ្នកឱ្យក្លាយជាមនុស្សដែលពូកែ និងអស្ចារ្យបំផុតនៅក្នុងខ្សែភ្នែករបស់កូនៗលោកអ្នក និងអ្នកដទៃដែលនៅជុំវិញខ្លួន។

E) ភាពស្រស់ស្អាតធ្វើឱ្យអ្នកក្លាយជានិមិត្តរូបរបស់កូនប្រុសស្រី នាំឱ្យគេចង់បាននូវសម្រស់ស្អាតដូចជាអ្នកដែរ។ នេះគឺជាមោទនភាពមួយដែលមាននៅក្នុងខ្លួនលោកអ្នក ដែលអ្នកណាក៏មិនអាចដណ្តើមយកចេញពីអ្នកបាន។  

តទៅនេះគឺជាគន្លឹះទាំង ១០ យ៉ាង ដើម្បីបង្កើននូវភាពស្រស់ស្អាត សម្រាប់អ្នកម្តាយទាំងឡាយ៖

១) ត្រូវផឹកទឹកឱ្យបានច្រើនក្នុងមួយថ្ងៃៗ៖ មិនថាជាទឹកសុទ្ធ ទឹកផ្លែឈើ ឬទឹកថ្នាំធម្មជាតិពីរុក្ខជាតិបុរាណនានានោះទេ។ ធ្វើដូច្នេះវានឹងអាចជួយពង្រឹងរាងកាយរបស់អ្នកឱ្យមានភាពស្រស់ថ្លា ដោយជួយផ្តល់សំណើមដល់ស្បែកបានយ៉ាងល្អ។

២) លាបក្រែមថែរក្សាស្បែកជាប់ជានិច្ច៖ មិនត្រូវបណ្តោយឱ្យស្បែកបាត់បង់ជាតិសំណើមនោះឡើយ។ អ្នកគួរប្រើក្រែមលាបស្បែកឱ្យបានជាប់លាប់ យ៉ាងហោចណាស់២ដងក្នុងមួយថ្ងៃ ប៉ុន្តែគួរប្រុងប្រយ័ត្នខ្ពស់ដោយជ្រើសយកក្រែមលាបស្បែកណាដែលមិនប៉ះពាល់ដល់សុខភាពកូនតូចរបស់លោកអ្នក។

៣) គួរបន្ថែមវីតាមីន C ឱ្យបានច្រើន៖ វីតាមីននឹងជួយធ្វើឱ្យអ្នកទទួលបាននូវភាពស្រស់ថ្លាកាន់តែខ្លាំងឡើង ដូចជាការទទួលទានផ្លែក្រូចប្រភេទផ្សេងៗជាដើម ពីព្រោះវាសម្បូរទៅដោយវីតាមីន C យ៉ាងខ្ពស់ ខុសប្លែកពីផ្លែឈើដទៃៗទៀត។ 

៤) បម្រុងស្បែកនៅក្រោមភ្នែកឱ្យមានភាពភ្លឺថ្លាគ្រប់ពេល៖ អ្នកអាចជ្រើសរើសប្រើផ្លែត្រសក់ ឬប៉េងប៉ោះជាដើម ដើម្បីយកមកបិទក្រោមភ្នែករយៈពេល១៥នាទីជារៀងរាល់ថ្ងៃបន្ថែមនូវភាពស្រស់ស្អាត។ 

ឬក៏អាចបន្ថែមភាពស្រស់ថ្លា ដល់ស្បែករាងកាយតាមវិធីធម្មជាតិដូចតទៅនេះបានផងដែរគឺ៖

+ខាត់ស្បែកឱ្យស្រស់ស្អាតជាមួយនឹងប្រទាលកន្ទុយក្រពើ៖ ប្រើប្រទាលកន្ទុយក្រពើមកលាបលើផ្ទៃមុខ ទុកចោលរយៈពេល១០ទៅ១៥នាទីជារៀងរាល់ថ្ងៃ។ ធ្វើដូច្នេះជែលនឹងជួយស្ដារស្បែកឱ្យមានសភាពស្រស់ថ្លាឡើងវិញ កម្ចាត់ភាពស្រអាប់ បំបាត់ភាពជ្រីវជ្រួញ ធ្វើឱ្យស្បែកមានសំណើមទ្វេឡើង។ ហើយនៅពេលដែលបានប្រើវាជាញឹកញាប់ នោះក៏នឹងជួយកាត់បន្ថយស្នាមមុន រុយ និងចំណុចខ្មៅៗនៅលើមុខយ៉ាងល្អ។

+ផ្តល់សំណើមដល់ស្បែកជាមួយនឹងត្រសក់៖ លក្ខណៈសម្បត្តិរបស់ត្រសក់គឺមិនត្រឹមតែជួយឱ្យស្បែកមានសំណើមប៉ុណ្ណោះទេ តែក៏អាចជួយកាត់បន្ថយការហើម និងជួយព្យាបាលស្បែកបានល្អផងដែរ។ 

វិធីប្រើគឺបន្ទាប់ពីការសម្អាតផ្ទៃមុខ ត្រូវយកត្រសក់ស្រស់ៗមកបិទនៅលើមុខឱ្យពេញ។ អាចធ្វើបានច្រើនម្តងក្នុងមួយសប្តាហ៍ នោះវាជួយសម្អាតស្បែកឱ្យមានភាពភ្លឺថ្លា ពិសេសក៏ជួយព្យាបាលជំងឺមហារីកនៅលើស្បែកមុខបានផងដែរ។

+ស្បែកមុខ ស រលោងជាមួយនឹងប៉េងប៉ោះ៖ ប៉េងប៉ោះមានលក្ខណៈសម្បត្តិជួយធ្វើឱ្យស្បែកស្រស់ថ្លា ការពារស្បែកពីរ៉ាឌីកាល់សេរី ជួយឱ្យមុខសឡើង។ វិធីធ្វើគឺនាំប៉េងប៉ោះទៅចម្អិនហើយបុកឱ្យហ្មត់ បន្ទាប់មកលាយទឹកដោះគោស្រស់ចូលបន្តិច សឹមនាំមកបិទមុខប្រមាណជា ១៥-២០នាទី។ រូបមន្តនេះបើធ្វើជាប្រចាំនឹងនាំឱ្យស្បែកមុខដែលខ្មៅ មានស្នាម ត្រូវបានលុបបំបាត់បន្តិចម្តងៗ។

+ខាត់ស្បែកដោយប្រើអម្ពិល៖ អំពិលអាចជួយការពារស្បែកពីរ៉ាឌីកាល់សេរី ធ្វើឱ្យស្បែក រាបស្មើរ និងស្រស់ថ្លា។ ត្រូវយកអំពិលទុំមកលាយជាមួយម្សៅរមៀត និងទឹកដោះគោស្រស់។ លាយគ្រឿងផ្សំទាំង៣រួមគ្នា បន្ទាប់មកយកខាត់ស្បែកនៅលើរាងកាយ ហើយងូតទឹកសម្អាតខ្លួនតាមធម្មតា។ ក្រោយមកអ្នកអាចលាបឡេថែទាំស្បែកតាមទម្លាប់។ ប្រសិនបើខាត់ស្បែកញឹកញាប់ វានឹងជួយឱ្យស្បែកខ្លួនរលោង និងមានសុខភាពល្អ។

+កម្ចាត់កោសិកាស្បែកដែលងាប់ចោលដោយអប់ ឬស្ប៉ាស្បែក៖ អ្នកអាចរកពេលវេលាទំនេរប្រហែល១-២ម៉ោងជារៀងរាល់សប្តាហ៍ដើម្បីទៅស្ប៉ាស្បែក។ តែបើអ្នករវល់ខ្លាំង អាចធ្វើនៅផ្ទះក៏បាន ដោយប្រើឱសថបុរាណងាយៗដូចជា ក្រូចសើច និងអំបិលខាត់ស្បែកចូលសម្រាប់ស្ប៉ា។ ធ្វើបែបនេះនឹងជួយស្បែកបញ្ចេញញើសបាននល្អ។ ក្រោយមកអ្នកអាចលាបឡេការពារស្បែក ដើម្បីបន្ថែមសំណើម ហើយក្នុងអំឡុងពេលថ្ងៃគួរទទួលទានទឹកឱ្យបានច្រើនបំផុត។

សរុបមកការថែទាំស្បែក ក្រោយពេលសម្រាលគឺមិនពិបាកនោះទេ គ្រាន់តែអ្នកអ្នករកឃើញ ហើយអាចធ្វើវាបានច្រើនប៉ុណ្ណាតែប៉ុណ្ណោះ ដើម្បីថែរក្សាសុខភាពស្បែកខ្លួនឯង។  

៥) បិទបាំងស្នាមអុចខ្មៅ និងស្នាមជ្រីវជ្រួញនៅលើមុខដោយប្រើគ្រឿងសំអាង៖ ប្រសិនបើអ្នកត្រូវចេញទៅធ្វើការ ឬនៅតាមកម្មវិធីធំៗនានា ប៉ុន្តែមិនគួរប្រើវាជាប្រចាំនោះទេ ព្រោះខ្លាចប៉ះពាល់ដល់សុវត្ថិភាពកូនតូចរបស់លោកអ្នក។

៦) ត្រូវសម្រកទម្ងន់ក្រោយពេលផ្តល់កំណើតដល់កូន៖ ដោយគួរកែតម្រូវនូវទម្លាប់នៃការទទួលទានអាហារ។ ត្រូវបរិភោគអាហារ ដែលមានប្រយោជន៍ចំពោះសុខភាព និងធ្វើលំហាត់ប្រាណឱ្យបានទៀងទាត់។ ប៉ុន្តែត្រូវចាំថា មិនគួរបញ្ចុះទម្ងន់ឱ្យហួសកម្រិតពេកនោះទេ ព្រោះវាអាចបណ្តាលឱ្យប៉ះពាល់ដល់ការបញ្ចេញទឹកដោះសម្រាប់បំបៅកូន។  

#ឬអ្នកអាចអនុវត្តវិធីសម្រកទម្ងន់ងាយៗដូចខាងក្រោមនេះគឺ៖

-ចាប់ផ្តើមពីការទទួលទានអាហារ៖ គឺមានសារៈសំខាន់បំផុតសម្រាប់ស្រ្តីក្រោយសម្រាលបុត្រ និងអ្នកម្តាយទាំងឡាយ។ អ្នកគួរជ្រើសអាហារទាំង៥ក្រុម ដើម្បីផ្តល់សារធាតុចិញ្ចឹមដល់រាងកាយបានគ្រប់ចំនួន។ គួរកាត់បន្ថយអាហារពពួក ម្ស៉ៅ នំបុ័ង បង្អែម ដែលសម្បូរជាតិស្ករច្រើន ពិសេសគឺអាហារដែលអាចបង្កើនជាតិខ្លាញ់ច្រើននៅក្នុងរាងកាយ។

-ចៀសវាងចំណីអាហារដែលមានជាតិប្រៃ ជូរ និងហឹរខ្លាំង៖ ដោយបន្ថែមនូវការបរិភោគបន្លែឱ្យបានច្រើនបំផុតតាមដែលអាចធ្វើបាន។ ទន្ទឹមនឹងនេះ ការផឹកទឹកឱ្យបាន ៨ កែវក្នុងមួយថ្ងៃ គឺជារឿងចាំបាច់បំផុតដើម្បីរក្សាជាតិសំណើមនៅក្នុងរាងកាយ ព្រមទាំងស្បែកឱ្យមានសុខភាពល្អ។ ធ្វើដូច្នេះនឹងធ្វើឱ្យរាងកាយរបស់អ្នក ទៅរកភាពស្រស់ស្អាតវិញបានជាមិនខាន។

-ជ្រើសរើសបរិភោគអាហារដោយឈ្លាសវៃ៖ ត្រូវទទួលទានអាហារតិចៗ ប៉ុន្តែឱ្យបានញឹកញាប់ ច្រើនពេលក្នុងមួយថ្ងៃ តែត្រូវចំណាំចៀសវាងអាហារដែលប៉ះពាល់ដល់ការបញ្ចេញទឹកដោះ។

-កុំតប់ប្រមល់នៅក្នុងការសម្រកទម្ងន់៖ អ្នកត្រូវតែត្រៀមខ្លួនធ្វើផែនការឱ្យរួចជាស្រេចដូចជាគួរ ញ៉ាំផ្លែឈើឱ្យបានច្រើនដោយទិញផ្លែឈើស្រស់ៗយកមកទុករៀបចំក្នុងទូទឹកកករួចជាស្រេច ហើយញ៉ាំនៅពេលឃ្លាន។ មួយទៀតជ្រើសអាហារដែលមានជាតិខ្លាញ់ទាប និងបន្លែដែលសម្បូរប្រូតេអ៊ីន។ យកល្អគួររៀបចំវាទុកក្នុងចាន១ឱ្យរួចស្រេចស្រួលយកមកញ៉ាំ និងដាក់តាមរថយន្តពេលមានដំណើរកម្សាន្តខាងក្រៅផ្ទះម្តងៗ។

-ដាក់វិន័យដល់ខ្លួនឯងក្នុងការហាត់ប្រាណ៖ បន្ទាប់ពីសម្រាលកូន ៦-៨ សបា្តហ៍ ទំហំចង្កេះអ្នកនឹងរីកធំឡើងៗ ដូច្នេះត្រូវចេះរៀបចំផែនការយ៉ាងម៉ត់ចត់ដើម្បីសម្រក់ទម្ងន់ ហើយរឿងដំបូងដែលអ្នកត្រូវធ្វើគឺបរិភោគអាហារដែលសម្បូរកាបូអ៊ីដ្រាតល្អដល់រាងកាយ ដែលវាសម្បូរនៅក្នុងពពួកគ្រាប់ធញ្ញជាតិ និងដំឡូងជាដើម។ ណែនាំឱ្យបរិភោគដំឡូងបារាំងពាក់កណ្តាលដុំមុន១ម៉ោងពេលចេញហាត់ប្រាណ។ វិធីនេះជួយអ្នកឆាប់ស្រកគីឡូ និងមានទឹកដោះហូរល្អសម្រាប់ឱ្យកូនបៅដោះផងដែរ។ ប្រសិនបើអ្នកចង់ប្រើវិធីវះកាត់សម្រក់ទម្ងន់ ដោយខ្ជិលហាត់ប្រាណ សូមទៅពិគ្រោះជាមួយគ្រូពេទ្យជាមុនសិនមុននឹងធ្វើ។ 

៧) ព្យាបាលស្នាមសង្វារនៅលើស្បែក៖ ស្វាមីគ្រប់រូបពិតជាមិនចង់ឃើញភរិយាខ្លួនមានស្នាមសង្វារនៅលើក្បាលពោះ ឬដៃជើងក្រោយសម្រាលកូនរួចនោះទេ។ ដូចនេះអ្នកត្រូវប្រញាប់រកវិធីបំបាត់វាក្នុងរយៈពេលដ៏ខ្លី។ អ្នកអាចជ្រើសវិធីដោយការប្រើក្រែមលាបកាត់បន្ថយស្នាមជ្រីវជ្រួញ ក៏ដូចជាស្នាមសង្វារនេះបាន ព្រោះក្រែមនឹងជួយបំបាត់ស្នាមបានយ៉ាងងាយ គឺវាសម្បូរទៅដោយជាតិខូឡាជែលច្រើន។

៨) គេងសម្រាក៖ ឱ្យបានច្រើនបំផុត តាមដែលអាចធ្វើបានគឺយ៉ាងហោចណាស់ក៏៦ ទៅ ៨ ម៉ោងដែរ ក្នុងមួយថ្ងៃ។ ដោយការចូលគេងឱ្យបានលឿន និងឆាប់ក្រោកពីព្រលឹម ហើយក្រោយទទួលទានអាហារថ្ងៃត្រង់ គួររកពេលវេលាសម្រាកឱ្យបានតិចណាស់៣០នាទី ហើយមិនគួរកាន់ ឬយួររបស់អ្វីធ្ងន់ៗ ហួសពីកម្លាំងនោះឡើយ។

៩) ទៅម៉ាស្សា៖ គួរស្វែងរកពេលវេលាទំនេរខ្លះ ដើម្បីទៅហាងម៉ាស្សាបន្ថយភាពតានតឹងក្នុងអារម្មណ៍ ក៏ដូចជារាងកាយផងដែរ។ អ្នកដឹងទេថាការទៅម៉ាស្សាក៏អាចបណ្តេញនូវជាតិពុល និងកាកសំណល់អាក្រក់ៗនានាចេញពីក្នុងរាងកាយបានយ៉ាងល្អ ដើម្បីបង្កើនូវភាពស្រស់ស្អាតពីខាងក្នុងខ្លួនរបស់អ្នក។

១០) គួរបន្ថែមទំហំដើមទ្រូងរបស់អ្នកឱ្យធំជាងមុន៖ នេះគឺជាចំណុចពិសេសបំផុតដែលស្រ្តីមានបុត្រគ្រប់រូបគួរធ្វើ ឬស្ត្រីដែលទើបសម្រាកកូនក៏អាចធ្វើបានដែរ នៅពេលកូនផ្ដាច់ដោះ។ អ្នកអាចជ្រើសយកវិធីធ្វើធម្មជាតិៗដូចជាការធ្វើម៉ាស្សាជាប្រចាំ ឬហាត់ប្រាណពង្រីកដើមទ្រូងឱ្យធំជាដើម។ ក្រៅពីនេះអ្នកម្តាយក៏អាចទទួលទានវីតាមីន និងប្រូតេអ៊ីនជំនួយដើមទ្រូងបន្ថែមក៏បាន។ 

នេះគឺចំណុចសំខាន់សម្រាប់ស្រ្តីគ្រប់រូបដើម្បីចងចិត្តស្វាមីមិនឱ្យមានថ្មី ឬមានលួចលាក់ក្នុងផ្ទះក្រៅផ្ទះបាន ព្រោះទោះបីជាអ្នកមានកូនហើយ ក៏សម្រស់នៅតែស្រស់ស្អាត ហើយជួនកាលកាន់តែស្រស់ស្អាតជាងមុនក៏អាចថាបាន៕

ប្រភព៖ Amarinbabyandkids / Srichandbaby / Maerakluke