ការពារពីជំងឺបេះដូង និងជំងឺដាច់សរសៃឈាមខួរក្បាល ដោយវិធីធម្មជាតិ ព្រមទាំងគន្លឹះសំខាន់ៗទាំងអស់នេះ

រាល់ជំងឺទាក់ទងនឹងបេះដូង និងជំងឺដាច់សរសៃឈាមខួរក្បាល គឺជាជំងឺមួយដែលកំពុងបន្តគំរាមកំហែងអាយុជីវិតរបស់មនុស្សនៅក្នុងពេលសម័យបច្ចុប្បន្ននេះ ដែលភាគច្រើនកើតមាននៅលើអ្នកដែលមានវ័យកណ្តាលឡើងទៅដល់វ័យចំណាស់។

ជាពិសេស គឺជំងឺដាច់សរសៃឈាមខួរក្បាល គឺជាស្ថានភាពមួយដែលខួរក្បាលរងការរលាក ឬរងការរាំងស្ទះផ្សេងៗ ហើយមានការហូរឈាមភ្លាមៗនៅក្នុងខួរក្បាល ដែលអាចធ្វើឱ្យស្លាប់ផ្នែកណាមួយនៃខួរក្បាល នាំឱ្យឈានទៅរកពិការភាពអវយវៈមួយចំនួនក្នុងរាងកាយ ព្រមទាំងអាចប្រឈមមុខនឹងសេចក្តីស្លាប់ផងដែរ។ 

ដោយសារតែជំងឺបេះដូង និងជំងឺដាច់សរសៃឈាមខួរក្បាលវាជាស្ថានភាពមួយ ដែលកើតឡើងភ្លាមៗ ដូច្នេះហើយមានតែការថែទាំសុខភាពឱ្យបានត្រឹមត្រូវ និងចៀសវាងទម្លាប់ដូចជាការផឹកគ្រឿងស្រវឹងហួសកម្រិត និងជក់បារី ជាដើម។ ដោយងាកមកធ្វើការហាត់ប្រាណឱ្យបានទៀងទាត់ទើបជាការប្រសើរ។

ក្រៅពីនេះ យើងនឹងលើកយកវិធីធម្មជាតិ និងគន្លឹះមួយចំនួនដែលអាចជួយការពារអ្នកពីជំងឺបេះដូង និងជំងឺដាច់សរសៃឈាមខួរក្បាលបានផងដែរដូចខាងក្រោម៖

# វីធីធម្មជាតិការពារជំងឺបេះដូង និងដាច់សរសៃឈាមខួរក្បាល

១. ទឹកខ្មេះប៉ោម (Apple Cider Vinegar)

ទឹកខ្មេះប៉ោម គឺជាគ្រឿងផ្សំធម្មជាតិមួយដែលមានប្រយោជន៍ជាច្រើនសម្រាប់សុខភាព និងសម្រស់ ហើយវាក៏មានលទ្ធភាពអាចទប់ស្កាត់រាល់ជំងឺទាក់ទងនឹងបេះដូង និងដាច់សរសៃឈាមខួរក្បាល ដូចជា ជួយបន្សាបជាតិពុលចេញពីឈាម និងជួយជំរុញចលនាលំហូរឈាមជាដើម។

មានវិធីជាច្រើនដែលអ្នកអាចយកទឹកខ្មេះប៉ោម( ទឹកខ្មេះប៉ោម Apple Cider Vinegar រកទិញនៅរាល់ផ្សារទំនើប) មកធ្វើជាគ្រឿងផ្សំប៉ូវសុខភាព ឬអាចលាយជាមួយនឹងទឹកធម្មតា និងទឹកផ្លែឈើសម្រាប់ទទួលទានងាយៗក៏បាន។

២. ខ្លាញ់ត្រី

ពពួកខ្លាញ់ត្រីបាតសមុទ្រ មានផ្ទុកនូវអូមេហ្គា៣ (Omega3) ដែលមានប្រយោជន៍សម្រាប់សុខភាពបេះដូង និងអ្នកដែលមានបញ្ហាកម្រិតកូឡេស្តឺរ៉ល។ ជាពិសេសវាក៏អាចជំនួយបេះដូង ប្រព័ន្ធសរសៃប្រសាទ និងសុខភាពផ្លូវចិត្តផងដែរ។

ដូច្នេះអ្នកអាចទទួលទានពពួកត្រីសមុទ្រដូចជា សាម៉ុងជាដើម ឬអាចប្រើគ្រាប់ថ្នាំខ្លាញ់ត្រី (Fish Oil) ក៏បាន តែកុំភ្លេចប្រឹក្សាជាមួយនឹងវេជ្ជបណ្ឌិតជំនាញមុននឹងធ្វើការប្រើប្រាស់ទើបជាការប្រសើរ។

៣. ខ្ញី

ជាតិហឹរដែលមាននៅក្នុងខ្ញី អាចជំនួយដល់សុខភាពបានច្រើនយ៉ាងណាស់ ជាពិសេសថែមទាំងអាចជួយកាត់បន្ថយកម្រិតកូឡេស្តឺរ៉លមិនល្អ ធ្វើឱ្យចលនាឈាមរត់បានស្រួល ថែមទាំងអាចកាត់បន្ថយហានិភ័យនៃជំងឺបេះដូង ដូចជាគាំងបេះដូង និងជំងឺដាច់សរសៃឈាមខួរក្បាលជាដើម។

ដូច្នេះដើម្បីសុខភាពបេះដូង អ្នកអាចទទួលទានខ្ញីក្នុងរបបអាហារទទួលទានប្រចាំថ្ងៃក្នុងមួយសប្តាហ៍ ២ស្លាបព្រា (ម្សៅខ្ញី) ឬអាចទទួលទានជាតែខ្ញីសុទ្ធៗក៏បាន។

៤. មើមការ៉ុត

ការ៉ុត មានផ្ទុកទៅដោយសារធាតុ Beta-Carotene និងសារធាតុ Carotenoids សំខាន់ៗជាច្រើនមុខទៀត ដែលមានប្រយោជន៍សម្រាប់ជំនួយសុខភាពបេះដូង ថែមទាំងអាចមានសមត្ថភាពកាត់បន្ថយហារនិភ័យនៃជំងឺទាក់ទងនឹងបញ្ហាបេះដូងដល់ទៅ ៦៤ភាគរយ។

អ្នកអាចប្រើប្រាស់មើមការ៉ុតជាអាហារសម្រាប់ទទួលទានបានច្រើនបែប ដោយការយកវាជារបបអាហារ ឬបន្លែទទួលទាន និងអាចយកមកកិនក្រឡុកជាភេសជ្ជៈស្រស់ៗក៏បានដែរ។

៥.ផ្ទីរបន្លា

បន្លែមួយនេះ ផ្ទុកទៅដោយជាតិកាល់ស្យូម ដែលអាចជំនួយសុខភាពបេះដូង និងកាត់បន្ថយហានិភ័យបញ្ហាជំងឺបេះដូងដូចជា ជំងឺគាំងបេះដូង និងជំងឺដាច់សរសៃឈាមបេះដូងជាដើម។

ដូច្នេះគួរតែយកបន្លែមួយនេះជារបបអាហារទទួលទានជាប្រចាំ និងយកធ្វើជាសាឡាត់ក៏បាន។

៦. ប្រេងដូង

ប្រេងដូងពោរពេញដោយអាស៊ីតខ្លាញ់ឆ្អែត ដែលអាចជួយបង្កើនការស្រូបយកសារធាតុចិញ្ចឹមពីរបបអាហារទទួលទានផ្សេងៗ និងជំនួយដល់សុខភាពបេះដូង ចៀសឆ្ងាយពីបញ្ហាជំងឺទាក់ទងនឹងបេះដូងដូចជា ជំងឺគាំងបេះដូង និងដាច់សរសៃឈាមបេះដូងជាដើម។ ក្រៅពីនេះវាក៏អាចមានសមត្ថភាពជួយបង្កើនសុខភាពខួរក្បាលបានផងដែរ។

៧. ទឹកសណ្តែក

ទឹកសណ្តែកអាចមានលទ្ធភាពជួយព្យាបាល និងទប់ស្កាត់រាល់បញ្ហាជំងឺទាក់ទងនឹងបេះដូង ដូចជាជំងឺគាំងបេះដូង និងដាច់សរសៃឈាមខួរក្បាល។ ក្រៅពីនេះ វាថែមទាំងអាចកាត់បន្ថយឱកាសនៃការកើតជំងឺបេះដូង ដោយសារតែវាអាចជួយកាត់បន្ថយសម្ពាធឈាមបានផងដែរ។

ដូច្នេះការទទួលទានទឹកសណ្តែកត្រឹមតែ ៥០០មីលីលីត្រ ជាមួយនឹងស្ករស ៥០ក្រាមជាប្រចាំ អាចបញ្ឈប់ការកន្តរាក់នៃសាច់ដុំបេះដូង ថែមទាំងអាចបន្ថយឱកាសនៃការកើតជំងឺទាក់ទងនឹងបេះដូងបានយ៉ាងប្រសើរ។

ក្រៅពីការពារជំងឺបេះដូង និងដាច់សរសៃឈាមខួរក្បាល យើងក៏បន្តមកតាមដានគន្លឹះសំខាន់ៗមួយចំនួនទៀត ដែលអ្នកត្រូវតែអនុវត្តដើម្បីធ្វើឱ្យជំងឺកាចសាហាវទាំងនោះកាន់តែបាត់បង់ឱកាសក្នុងការប៉ះពាល់ដល់សុខភាពរបស់អ្នកបានដូចខាងក្រោមនេះ៖

# គន្លឹះការពារជំងឺបេះដូង និងដាច់សរសៃឈាមខួរក្បាល

១. ត្រូវធ្វើការបន្ថយសម្ពាធឈាម និងការពារសម្ពាធឈាមឡើងខ្ពស់ដោយការហាត់ប្រាណ និងហាត់យូហ្គា។ ដោយសារតែជំងឺលើសឈាម អាចជួយទៅបង្កើនឱកាសនៃការកើតជំងឺទាក់ទងនឹង បេះដូង និងដាច់សរសៃឈាមខួរក្បាល។

២. ត្រូវឧស្សាហ៍តាមដានសុខភាពឱ្យបានទៀងទាត់ ព្រោះអាចនឹងមានរោគសញ្ញាមួយចំនួន ដាស់តឿនមុននឹងកើតមានបញ្ហាជំងឺបេះដូង និងដាស់សរសៃឈមខួរក្បាល។ នៅពេលដែលអ្នកបានដឹងមុន អ្នកនឹងអាចត្រូវបានណែនាំដោយវេជ្ជបណ្ឌិតក្នុងការប្រើប្រាស់ថ្នាំមួយចំនួនដែលអាចទប់ស្កាត់រាល់បញ្ហាកុំឱ្យកើតមានបាន។

៣. មិនត្រូវទទួលទានអាហារដែលមានជាតិស្ករច្រើនពេក និងជាតិសូដ្យូម(ប្រៃ) ច្រើនពេកនោះទេ។ ព្រោះវាសុទ្ធតែអាចធ្វើឱ្យមានបញ្ហាស្ទះសរសៃឈាមអាក់ទ័រ និងបង្កើនឱកាសនៃការកើតជំងឺបេះដូង និងដាច់សរសៃឈាមខួរក្បាល។

៤. ត្រូវហាត់ប្រាណជាប្រចាំ មិនថាតែរត់ ដើរ ធាក់កង់ ហែលទឹក និងទម្លាប់ហាត់ងាយៗនៅផ្ទះទេ សុទ្ធតែមានផលល្អចំពោះសុខភាពបេះដូង រក្សាសម្ពាធឈាម និងអាចជួយបន្ថយហានិភ័យនៃជំងឺទាក់ទងនឹងបេះដូង ព្រមទាំងបញ្ហាប្រព័ន្ធរំលាយអាហារទៀតផង។

៥.គេងឱ្យបានគ្រប់គ្រាន់យ៉ាងហោចឱ្យបាន ៦ទៅ៨ម៉ោងក្នុងមួយថ្ងៃ។ ដោយសារតែការគេងគ្រប់គ្រាន់មិនត្រឹមតែល្អចំពោះសុខភាពរាងកាយទាំងមូលទេ តែថែមទាំងល្អចំពោះសុខភាពបេះដូង និងការពារជំងឺទាក់ទងនឹងបេះដូងបានយ៉ាងប្រសើរផងដែរ៕