ពីតូចអ្នកណាធ្លាប់ញ៉ាំ «ផ្លែក្រចាប់ ឬផ្លែស្នែងក្របី» ខ្លះ? ពេលនេះមកស្គាល់ពីគុណប្រយោជន៍សុខភាពរបស់ផ្លែនេះទាំងអស់គ្នា

បើនិយាយពី «ផ្លែក្រចាប់» ប្រហែលជាមិនសូវមានអ្នកស្គាល់ តែប្រសិនជាឈ្មោះថា ផ្លែស្នែងក្របី ប្រាកដជាមនុស្សមិនតិចនាក់ទេដែលបានដឹង តែធាតុពិតវាជាផ្លែតែមួយ គ្រាន់តែការហៅឈ្មោះផ្សេងៗដាច់ដោយឡែកពីគ្នាតែប៉ុណ្ណោះ ជាពិសេសនៅបណ្តាប្រទេសដទៃ ក៏មានការដាក់ឈ្មោះឱ្យផ្លែនេះតាមការនិយម ឬទម្លាប់រៀងៗខ្លួនផងដែរ។

ជាការពិតណាស់ ផ្លែក្រចាប់នេះ បើផ្អែកទៅតាមវចនានុក្រមខ្មែរសម្តេចព្រះសង្ឃរាជជួនណាត បានឱ្យដឹងថា វាជាប្រភេទ សេវាលជាតិ (រុក្ខជាតិដែលដុះលើទឹកដូចជា ចក ឈូក និងព្រលិតជាដើម) ហើយវាមានផ្លែរូបរាងជាបន្លាដូចជាស្នែង។ ចំណែករសជាតិរបស់វាវិញ អ្នកដែលធ្លាប់ទទួលទានប្រាកដជាដឹងហើយថា នៅពេលដែលវាស្ងោរឆ្អិនរួចបកសម្បករឹងៗខាងក្រៅវាចេញ វាមានឱជារសផ្អែមឆ្ងាញ់ពិសាណាស់ ថែមទាំងមានសាច់ផុយដូចជាគ្រាប់ខ្នុរ ឬដូចជាផ្លែកៅឡាក់ជប៉ុនដូច្នេះដែរ។

ដូច្នេះហើយ បានជាថ្ងៃនេះយើងនឹងលើកយកពីគុណប្រយោជន៍នៃការទទួលទានផ្លែ ក្រចាប់នេះមកជម្រាបមិត្តអ្នកអានឱ្យកាន់តែបានជ្រាបច្បាស់៖

# ផ្ទុកនូវសារធាតុចិញ្ចឹមច្រើន

ផ្លែក្រចាប់ មានផ្ទុកនូវសារធាតុបំប៉នសុខភាពរាងកាយជាច្រើនយ៉ាងដែលអ្នកស្ទើរតែមិននឹកស្មានដល់ដូចជា៖

- មានជាតិម្សៅល្អៗជំនួយរាងកាយ និងជាតិប្រូតេអ៊ីន

- គ្មានកូឡេស្តឺរ៉ល និងមានកម្រិតជាតិខ្លាញ់ទាប

- មានជាតិកាកសរសៃអាហារ ដែលជំនួយប្រព័ន្ធរំលាយអាហារ និងការលូតលាស់នៃបាក់តេរីល្អៗសម្រាប់សុខភាពក្រពះពោះវៀន (Probiotic Bacteria)

- សម្បូរទៅដោយជាតិដែក ការពារការស្លេកស្លាំង និងខ្វះឈាម

- មានជាតិកាល់ស្យូម និងផូស្វ័រ ជំនួយឆ្អឹងឱ្យកាន់តែរឹងមាំ

- ផ្ទុកនូវ ម៉ាញ៉េស្យូម និងម៉ងហ្គាណែស ជំនួយផលការផលិតអង់ស៊ីម និងបំបាត់ស្ត្រេស

- មានជាតិសង្កសី ដែលធ្វើឱ្យប្រព័ន្ធការពាររាងកាយ ឬប្រព័ន្ធភាពស៊ាំកាន់តែរឹងមាំ ទប់ស្កាត់នឹងជំងឺផ្សេងៗ

- សម្បូរទៅដោយជាតិប៉ូតាស្យូម ជំនួយឱ្យសុខភាពបេះដូង សរសៃឈាម និងកាត់បន្ថយសម្ពាធឈាម

# សារធាតុអ៊ីយ៉ូត(Iodine)

សារធាតុអ៊ីយ៉ូត (Iodine) ដែលមាននៅក្នុងផ្លែក្រចាប់ ត្រូវបានគេដឹងថាមានប្រយោជន៍ខ្លាំងណាស់ ក្នុងការទប់ស្កាត់ជំងឺពក.ក និងជំងឺទាក់ទងនឹងក្រពេញទីរ៉ូអ៊ីតជាច្រើនមុខផ្សេងទៀត។

# វីតាមីន​ B

ផ្លែក្រចាប់ មានផ្ទុកទៅដោយវីតាមីន B ដែលអាចជួយដល់បញ្ហាសុខភាពផ្លូវចិត្តឱ្យកាន់តែប្រសើរឡើង ជាពិសេសបំបាត់ស្ត្រេស កាត់បន្ថយភាពតានតឹង និងអស់កម្លាំង ជាពិសេសផ្តល់ថាមពលរាងកាយផងដែរ។

# វីតាមីន C

វីតាមីន C ដែលមាននៅក្នុងផ្លែក្រចាប់អាចជួយធ្វើឱ្យប្រព័ន្ធភាពស៊ាំកាន់តែរឹងមាំ ទប់ស្កាត់ជំងឺផ្សេងៗដែលកើតមានចំពោះសុខភាព ជាពិសេសគឺជំងឺ គ្រុន ក្តៅ និងផ្តាសាយជាដើម។ ក្រៅពីនេះ វាតាមីន C នេះអាចជំនួយដល់សរសៃសក់ និងក្រចកឱ្យកាន់តែរឹងមាំ ថែមទាំងជំនួយស្បែកឱ្យកាន់តែមានភាពស្រស់ស្អាតទៀតផង។

# សារធាតុប្រឆាំងអុកស៊ីតកម្ម

ផ្លែក្រចាប់ មានផ្ទុកនូវសារធាតុប្រឆាំងអុកស៊ីតកម្ម និងរ៉ាឌីកាល់សេរី ដែលអាចការពារ និងព្យាបាលការខូចខាតនៃកោសិកា DNA និងកោសិកាខួរក្បាលពីផលប៉ះពាល់ផ្សេងៗ។ ក្រៅពីនេះ សារធាតុប្រឆាំងអុកស៊ីតកម្ម ថែមទាំងអាចជួយប្រឆាំងនឹងភាពចាស់ និងស្នាមជ្រីវជ្រួញជាងវ័យផងដែរ។

# បណ្តេញជាតិពុល

ក្រចាប់ មានសមត្ថភាពអាចបណ្តេញជាតិពុលផ្សេងៗចេញពីរាងកាយបានល្អ ជាពិសេសគឺពីថ្លើមតែម្តង។ ជាពិសេសវាអាចជួយធ្វើឱ្យអ្នកមានសុខភាពល្អ និងព្យាបាលអាការរាគរូសបានយ៉ាងមានប្រសិទ្ធភាព។

# មានជាតិម្សៅ

ក្រចាប់ ក៏សម្បូរទៅដោយជាតិម្សៅម្យ៉ាងមានឈ្មោះថា Amylose ដែលមិនត្រូវបានរំលាយនៅក្នុងពោះវៀនតូច ហើយវាក៏មានប្រយោជន៍ជាបាក់តេរីល្អៗជំនួយដល់ពោះវៀនទាំងមូលផងដែរ។ បន្ថែមពីនេះ វាអាចជំនួយដល់សុខភាពទូទៅ រួមទាំងជួយធ្វើឱ្យប្រព័ន្ធភាពស៊ាំរាងកាយដំណើរការល្អ និងរឹងមាំជាងមុន។

# ជំងឺត្រអក ឬប្រទាលត្រអាក

ក្រចាប់ក៏អាចមានលទ្ធភាពជួយធ្វើការព្យាបាល ជំងឺស្បែកមានឈ្មោះថា ត្រអក ឬប្រទាលត្រអាកបាន ដោយគ្រាន់តែបកសាច់ក្រចាប់ចម្អិនលាយជាមួយនឹងទឹកបន្តិច និងក្រូចឆ្មារសម្បកលឿងបន្តិច(ក្រូចឆ្មារធម្មតាក៏បាន) រួចយកទៅបិទ ឬលាបនៅត្រង់តំបន់ស្បែកដែលមានបញ្ហាជាការស្រេច។

# កម្ចាត់កំហាក និងស្លេស្ម៍

ការទទួលទានផ្លែក្រចាប់ ក៏អាចជួយបន្ថយ និងកម្ចាត់បញ្ហាស្លេស្ម៍ ឬកំហាកដែលជាប់នឹង.កបានផងដែរ ដែលភាគច្រើនបណ្តាលមកពីជំងឺផ្តាសាយ។

# ប្រឆាំងនឹងមេរោគ ឬបាក់តេរី

តាមការស្រាវជ្រាវបានរកឃើញថា ផ្លែក្រចាប់ អាចមានប្រសិទ្ធភាពក្នុងការប្រឆាំងនឹងមេរោគបាក់តេរី និងជំងឺឆ្លងផ្សេងៗបានយ៉ាងប្រសើរ។

# ប្រឆាំងនឹងការរលាក

ក្រចាប់ មានប្រយោជន៍ណាស់នៅក្នុងទទួលទាន ដើម្បីជួយព្យាបាល និងការពារអាការរលាកផ្សេងៗនៅក្នុងរាងកាយដូចជា៖ រលាកសន្លាក់ ការឈឺចុកចាប់នៅតាមរាងកាយ អាការហើម ឬក្រហមជាដើម។

# ដំបៅក្រពះ

តាមការសិក្សាក៏បានរកឃើញដែរថា ការទទួលទានផ្លែក្រចាប់ អាចជួយព្យាបាលអាការដំបៅក្រពះបានផងដែរ៕