រាជធានីភ្នំពេញ ៖ ស្ត្រីមេម៉ាយកូនមួយម្នាក់រស់នៅជាមួយបុរសម្នាក់ជាប្តីប្រពន្ធជិត៦ឆ្នាំមកហើយ ត្រូវប្តីវាយធ្វើបាបរាល់ថ្ងៃ រហូតទ្រាំលែងបានប្តឹងសមត្ថកិច្ចឃាត់ខ្លួនបុរសជាប្តី តែបានរត់គេចខ្លួនបាត់ បង្កឲ្យភ្ញាក់ផ្អើលកាលពីវេលាម៉ោង០៨យប់ ថ្ងៃទី១៥ ខែមីនា ឆ្នាំ២០១៨ តាមបណ្ដាយផ្លូវ១១០កែងផ្លូវ១៣ នៅចំណុចម្តុំផ្សារចាស់ ស្ថិតនៅសង្កាត់វត្តភ្នំ ខណ្ឌដូនពេញ ។
តាមប្រភពព័ត៌មានពីជនរងគ្រោះមានឈ្មោះ ស.ទ ភេទស្រី អាយុ២៩ឆ្នាំ មុខរបរនៅផ្ទះ មានស្រុកកំណើតនៅឃុំផ្សារប្រសូត ស្រុកស្វាយរៀង ខេត្តស្វាយរៀង បានឲ្យដឹងថា គាត់ជាស្ត្រីមេម៉ាយកូនស្រីអាយុ១១ឆ្នាំម្នាក់ ។ ក្រោយមកគាត់បានស្គាល់ឈ្មោះ ពិសិដ្ឋ បានរួមរស់ជាមួយគ្នាជាប្តីប្រពន្ធជិត៦ឆ្នាំមកហើយ តាំងពីរស់នៅជាមួយគ្នាមក ប្តីគាត់ឲ្យតែផឹកស៊ីស្រវឹងតែងតែវាយធ្វើបាបរូបគាត់ជាប់ជាប្រចាំ ។
ប្រភពដដែលបានបន្តទៀតថា កន្លងមកនេះគាត់បានទិញរ៉ឺម៉កម៉ូតូមួយគ្រឿងឲ្យប្តីរត់នឹងគេ គ្រាន់បានប្រាក់ផ្គត់ផ្គង់ជីវភាព បែរជាលោកប្តីនៅផឹកស៊ីវាយធ្វើបាបគាត់មិនស្វាង រហូតគាត់ចង់ឈប់នៅជាមួយ ។ នៅយប់កើតហេតុ ពេលដែលបុរសជាប្តីផឹកស៊ីស្រវឹងបានរករឿងឈ្លោះប្រកែក ហើយវាយរូបគាត់ចាប់ក្បាលបោកផ្ទប់ទៅនឹងជញ្ជាំង បណ្ដាលឲ្យបែកក្បាលហូរឈាមស្រោចពេលខ្លួនផ្អើលពេញតែផ្លូវ បង្កឲ្យមានការភ្ញាក់ផ្អើលទៅដល់សមត្ថកិច្ចមូលដ្ឋានចុះមកកន្លែងកើតហេតុ ដើម្បីចាប់ជនបង្ក ប៉ុន្តែជនបង្ករត់គេចខ្លួនបាត់ស្រមោល ។ ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍រដ្ឋបាលនគរបាលវត្តភ្នំដើម្បីឲ្យសមត្ថកិច្ចតាមចាប់ជនបង្កយកមកផ្តន្តាទោសតាមច្បាប់ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
