មិនចាំបាច់ដើរចេញទៅរកបាយព្រឹក បាយថ្ងៃញុំាទៀតទេ ! គ្រាន់តែកុម្ម៉ងម្ហូបភ្លាម រ៉ូបូតនេះនឹងដឹកជញ្ជូនអាហារដល់កន្លែងធ្វើការតែម្តង (មានវីដេអូ)

អង់គ្លេស៖ កាលពីពេលថ្មីៗនេះ មានក្រុមហ៊ុនបច្ចេកវិទ្យាមួយឈ្មោះថា Starship Technology បានបង្កើតរ៉ូបូត (Robot) ដែលអាចដឹកជញ្ជូនអាហារដល់កន្លែងអ្នកធ្វើការតែម្តង ដោយមិនចាំបាច់យើងចេញទៅក្រៅរកអីញុំាទៀតទេ។

នៅឆ្នាំនេះ Starship Technology គ្រោងនឹងដាក់ឲ្យវាដំណើរការចំនួន ១០០០ គ្រឿងនៅក្នុងប្រទេសផ្សេងៗគ្នាចំនួន ២០ ក្នុងទ្វីបអឺរ៉ុប និងសហរដ្ឋអាមេរិក។

ក្រុមហ៊ុនដដែលបាននិយាយថា ដើម្បីឲ្យរ៉ូបូតនេះដឹកជញ្ជូនម្ហូបអាហារមកយើងបាន គឺជាដំបូងយើងត្រូវកំណត់ទីតាំងដែលយើងស្ថិតនៅឲ្យបានច្បាស់លាស់ជាក់លាក់ ហើយបន្ទាប់មកជ្រើសរើសម្ហូបអាហារដែលយើងចង់បានជាការស្រេច ដែលចំណាយពេលជាមធ្យម ១៧នាទីប៉ុណ្ណោះ យើងនឹងបានម្ហូបមកដល់មិនខាន។

រ៉ូបូតដែលអាចដឹកជញ្ជូនអាហារនេះមានកង់ចំនួន ៦  អាចធ្វើដំណើរបានដោយខ្លួនឯង និងទៅទីតាំងដែលយើងបានកំណត់បញ្ជាឲ្យវាទៅ។

រ៉ូបូតនេះមានកម្ពស់ ៥៥ សង់ទីម៉ែត្រ និង ប្រវែង ៧០សង់ទីម៉ែត្រ អាចធ្វើដំណើរបានដោយខ្លួនឯង និងទៅទីតាំងដែលយើងបានកំណត់បញ្ជាឲ្យវាទៅ។ វាអាចធ្វើដំណើរបានក្នុងល្បឿនរហូតដល់ ៦,៤គីឡូម៉ែត្រក្នុងមួយម៉ោង។ វាមានសមត្ថភាពអាចផ្ទុកអាហារបានដល់ទៅ ១០ គីឡូក្រាម  និងបញ្ជាដោយប្រើកម្មវិធីនៅលើស្មាតហ្វូនដែល Starship Technologies បានបង្កើត។

រ៉ូបូតនេះមិនត្រឹមតែចែកចាយម្ហូបអាហារប៉ុណ្ណោះទេ តែវាថែមទាំងអាចប្រើប្រាស់សម្រាប់ការផ្គត់ផ្គង់ និងចែកចាយទំនិញតូចៗមួយចំនួនទៀតផងដែរ។

លើសពីនេះទៅទៀត រ៉ូបូតនេះមានកាមេរ៉ាដល់ទៅ ៩គ្រាប់ដែលវាអាចធ្វើដំណើរដោយសុវត្ថិភាព ហើយប្រសិនបើមានចោរចង់យកវាទៅកន្លែងណាផ្សេង វានឹងរាយការណ៍ទៅប៉ូលិសភ្លាមៗតែម្តង៕

ខាងក្រោមជារូបភាព និង វីដេអូពីរ៉ូបូត៖