ខេត្តសៀមរាប ៖ លោកអធិការរងនគរបាលក្រុងសៀមរាប ចិត្តភ្លើងទទួលបន្ទុកកិច្ចការម្នាក់បានទាញកាំបិតបុ័ងតោគប់ទៅលើកូនចៅរបស់ខ្លួនដែលយាមប្រចាំការនៅទីនោះ បណ្តាលឱ្យបែកក្បាលហូរឈាម ហេតុការណ៍នេះកើតឡើងនៅក្នុងអធិការដ្ឋាននគរបាលក្រុងសៀមរាប កាលពីម៉ោង៨និង៤៥នាទី ថ្ងៃទី១៩ ខែតុលា ឆ្នាំ២០១៨ ។
មន្ត្រីនគរបាលក្រុងសៀមរាបម្នាក់មិនបញ្ចេញឈ្មោះបានប្រាប់នៅល្ងាចថ្ងៃទី២០ តុលានេះថា ករណីលោកអធិការរងនគរបាលក្រុងសៀមរាប គឺលោកវរសេនីយ៍ត្រី សារិទ្ធ បញ្ញា ទទួលបន្ទុកកិច្ចការម្នាក់បានស្រវឹងជោកជាំ រហូតទៅយកកាំបិតបុ័ងតោគប់ទៅលើកូនចៅទាំងកំរោល បណ្តាលឱ្យបែកក្បាលហូរឈាមដេរ៣ថ្នេរ។ ហើយជនរងគ្រោះមានឈ្មោះ លីវ សុឈុនលេង ភេទប្រុស អាយុ២៨ឆ្នាំ អនុសេនីយ៍ទោ មានទីលំនៅក្នុងក្រុងសៀមរាប។
ប្រភពដដែលបញ្ជាក់ទៀតថា នៅពេលកើតហេតុ គឺជនរងគ្រោះត្រូវចំវេនយាមប្រចាំការ ខណៈកំពុងអង្គុយប្រចាំការនៅក្នុងអធិការដ្ឋានក្រុងសៀមរាប ដើម្បីរង់ចាំទទួលបទបញ្ជាពីថ្នាក់លើ ប្រសិនបើមានបទល្មើសកើតឡើង ។ សូមបញ្ជាក់ថា តាមបទបញ្ជាផ្ទៃក្នុងរបស់អធិការក្រុងសៀមរាបមានវេនប្រចាំរៀងៗខ្លួនម្នាក់ម្តង ស្រាប់តែដល់វេនប្រចាំការរបស់លោកវរសេនីយ៍ត្រី សារិទ្ធ បញ្ញា អធិការរងទទួលបន្ទុកកិច្ចការម្នាក់ មិនដឹងគាត់ទៅផឹកស្រវឹងមកពីណាទេ មកដល់កន្លែងបានប្រើពាក្យសម្តីមិនសមរម្យមកលើជនរងគ្រោះតែម្តង។ ខណៈនោះក៏ប្រកែកគ្នាបន្តិចបន្តួច រហូតដល់លោកអធិការរងខឹងក៏ដើរទៅទាញកាំបិតនៅជិតខ្លួនគប់មកលើជនរងគ្រោះ បណ្តាលឱ្យបែកក្បាលរយៈហូរចេញឈាមដេរ៣ថ្នេរភ្លាមៗ។
ប្រភពដដែលបន្តថា ខណៈពេលនោះជនរងគ្រោះមិនបានតបតវិញទេ ហើយក៏ដើរចេញជិះម៉ូតូទៅរកពេទ្យព្យាបាលដោយខ្លួនឯងតែម្តង។
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
